Gyaandweep | Atharva Veda , Kanda 19, Sukta 50

अध रात्रि तृष्टधूममशीर्षाणमहिं कृणु ।अक्षौ वृकस्य निर्जह्यास्तेन तं द्रुपदे जहि ॥१॥

adha rātri tṛṣṭadhūmamaśīrṣāṇamahiṃ kṛṇu |akṣau vṛkasya nirjahyāstena taṃ drupade jahi ||1||

ये ते रात्र्यनड्वाहस्तीक्ष्णशृङ्गाः स्वाशवः ।तेभिर्नो अद्य पारयाति दुर्गाणि विश्वहा ॥२॥

ye te rātryanaḍvāhastīkṣṇaśṛṅgāḥ svāśavaḥ |tebhirno adya pārayāti durgāṇi viśvahā ||2||

रात्रिंरात्रिमरिष्यन्तस्तरेम तन्वा वयम् ।गम्भीरमप्लवा इव न तरेयुररातयः ॥३॥

rātriṃrātrimariṣyantastarema tanvā vayam |gambhīramaplavā iva na tareyurarātayaḥ ||3||

यथा शाम्याकः प्रपतन्न् अपवान् नानुविद्यते ।एवा रात्रि प्र पातय यो अस्मामभ्यघायति ॥४॥

yathā śāmyākaḥ prapatann apavān nānuvidyate |evā rātri pra pātaya yo asmāmabhyaghāyati ||4||

अप स्तेनं वासयो गोअजमुत तस्करम् ।अथो यो अर्वतः शिरोऽभिधाय निनीषति ॥५॥

apa stenaṃ vāsayo goajamuta taskaram |atho yo arvataḥ śiro'bhidhāya ninīṣati ||5||

यदद्य रात्रि सुभगे विभजन्त्ययो वसु ।यदेतदस्मान् भोजय यथेदन्यान् उपायसि ॥६॥

yadadya rātri subhage vibhajantyayo vasu |yadetadasmān bhojaya yathedanyān upāyasi ||6||

उषसे नः परि देहि सर्वान् रात्र्यनागसः ।उषा नो अह्ने आ भजादहस्तुभ्यं विभावरि ॥७॥

uṣase naḥ pari dehi sarvān rātryanāgasaḥ |uṣā no ahne ā bhajādahastubhyaṃ vibhāvari ||7||

Languages