Gyaandweep | Atharva Veda , Kanda 2, Sukta 36

आ नो अग्ने सुमतिं संभलो गमेदिमां कुमारीं सह नो भगेन ।जुष्टा वरेषु समनेषु वल्गुरोषं पत्या सौभगमस्तु अस्यै ॥१॥

ā no agne sumatiṃ saṃbhalo gamedimāṃ kumārīṃ saha no bhagena |juṣṭā vareṣu samaneṣu valguroṣaṃ patyā saubhagamastu asyai ||1||

सोमजुष्टं ब्रह्मजुष्टमर्यम्ना संभृतं भगम् ।धातुर्देवस्य सत्येन कृणोमि पतिवेदनम् ॥२॥

somajuṣṭaṃ brahmajuṣṭamaryamnā saṃbhṛtaṃ bhagam |dhāturdevasya satyena kṛṇomi pativedanam ||2||

इयमग्ने नारी पतिं विदेष्ट सोमो हि राजा सुभगां कृणोति ।सुवाना पुत्रान् महिषी भवाति गत्वा पतिं सुभगा वि राजतु ॥३॥

iyamagne nārī patiṃ videṣṭa somo hi rājā subhagāṃ kṛṇoti |suvānā putrān mahiṣī bhavāti gatvā patiṃ subhagā vi rājatu ||3||

यथाखरो मघवंश्चारुरेष प्रियो मृगाणां सुषदा बभूव ।एवा भगस्य जुष्टेयमस्तु नारी संप्रिया पत्याविराधयन्ती ॥४॥

yathākharo maghavaṃścārureṣa priyo mṛgāṇāṃ suṣadā babhūva |evā bhagasya juṣṭeyamastu nārī saṃpriyā patyāvirādhayantī ||4||

भगस्य नावमा रोह पूर्णामनुपदस्वतीम् ।तयोपप्रतारय यो वरः प्रतिकाम्यः ॥५॥

bhagasya nāvamā roha pūrṇāmanupadasvatīm |tayopapratāraya yo varaḥ pratikāmyaḥ ||5||

आ क्रन्दय धनपते वरमामनसं कृणु ।सर्वं प्रदक्षिणं कृणु यो वरः प्रतिकाम्यः ॥६॥

ā krandaya dhanapate varamāmanasaṃ kṛṇu |sarvaṃ pradakṣiṇaṃ kṛṇu yo varaḥ pratikāmyaḥ ||6||

इदं हिरण्यं गुल्गुल्वयमौक्षो अथो भगः ।एते पतिभ्यस्त्वामदुः प्रतिकामाय वेत्तवे ॥७॥

idaṃ hiraṇyaṃ gulgulvayamaukṣo atho bhagaḥ |ete patibhyastvāmaduḥ pratikāmāya vettave ||7||

आ ते नयतु सविता नयतु पतिर्यः प्रतिकाम्यः ।त्वमस्यै धेह्योषधे ॥८॥

ā te nayatu savitā nayatu patiryaḥ pratikāmyaḥ |tvamasyai dhehyoṣadhe ||8||

Languages