अथ तासां वदन्तीनां परुषं दारुणं बहु । राक्षसीनामसौम्यानां रुरोद जनकात्मजा ।। १।।
atha tasam vadantinam parusam darunam bahu । raksasinamasaumyanam ruroda janakatmaja ।। 1।।
एवमुक्ता तु वैदेही राक्षसीभिर्मनस्विनी । उवाच परमत्रस्ता बाष्पगद्गदया गिरा ।। २।।
evamukta tu vaidehi raksasibhirmanasvini । uvaca paramatrasta baspagadgadaya gira ।। 2।।
न मानुषी राक्षसस्य भार्या भवितुमर्हति । कामं खादत मां सर्वा न करिष्यामि वो वचः ।। ३।।
na manusi raksasasya bharya bhavitumarhati । kamam khadata mam sarva na karisyami vo vacah ।। 3।।
सा राक्षसी मध्यगता सीता सुरसुतोपमा । न शर्म लेभे दुःखार्ता रावणेन च तर्जिता ।। ४।।
sa raksasi madhyagata sita surasutopama । na sarma lebhe duhkharta ravanena ca tarjita ।। 4।।
वेपते स्माधिकं सीता विशन्तीवाङ्गमात्मनः । वने यूथपरिभ्रष्टा मृगी कोकैरिवार्दिता ।। ५।।
vepate smadhikam sita visantivangamatmanah । vane yuthaparibhrasta mrgi kokairivardita ।। 5।।
सा त्वशोकस्य विपुलां शाखामालम्ब्य पुष्पिताम् । चिन्तयामास शोकेन भर्तारं भग्नमानसा ।। ६।।
sa tvasokasya vipulam sakhamalambya puspitam । cintayamasa sokena bhartaram bhagnamanasa ।। 6।।
सा स्नापयन्ती विपुलौ स्तनौ नेत्रजलस्रवैः । चिन्तयन्ती न शोकस्य तदान्तमधिगच्छति ।। ७।।
sa snapayanti vipulau stanau netrajalasravaih । cintayanti na sokasya tadantamadhigacchati ।। 7।।
सा वेपमाना पतिता प्रवाते कदली यथा । राक्षसीनां भयत्रस्ता विवर्णवदनाभवत् ।। ८।।
sa vepamana patita pravate kadali yatha । raksasinam bhayatrasta vivarnavadanabhavat ।। 8।।
तस्या सा दीर्घविपुला वेपन्त्याः सीतया तदा । ददृशे कम्पिनी वेणी व्यालीव परिसर्पती ।। ९।।
tasya sa dirghavipula vepantyah sitaya tada । dadrse kampini veni vyaliva parisarpati ।। 9।।
सा निःश्वसन्ती दुःखार्ता शोकोपहतचेतना । आर्ता व्यसृजदश्रूणि मैथिली विललाप ह ।। १०।।
sa nihsvasanti duhkharta sokopahatacetana । arta vyasrjadasruni maithili vilalapa ha ।। 10।।
हा रामेति च दुःखार्ता पुनर्हा लक्ष्मणेति च । हा श्वश्रु मम कौसल्ये हा सुमित्रेति भाविनि ।। ११।।
ha rameti ca duhkharta punarha laksmaneti ca । ha svasru mama kausalye ha sumitreti bhavini ।। 11।।
लोकप्रवादः सत्योऽयं पण्डितैः समुदाहृतः । अकाले दुर्लभो मृत्युः स्त्रिया वा पुरुषस्य वा ।। १२।।
lokapravadah satyo- ayam panditaih samudahrtah । akale durlabho mrtyuh striya va purusasya va ।। 12।।
यत्राहमाभिः क्रूराभी राक्षसीभिरिहार्दिता । जीवामि हीना रामेण मुहूर्तमपि दुःखिता ।। १३।।
yatrahamabhih krurabhi raksasibhirihardita । jivami hina ramena muhurtamapi duhkhita ।। 13।।
एषाल्पपुण्या कृपणा विनशिष्याम्यनाथवत् । समुद्रमध्ये नौ पूर्णा वायुवेगैरिवाहता ।। १४।।
esalpapunya krpana vinasisyamyanathavat । samudramadhye nau purna vayuvegairivahata ।। 14।।
भर्तारं तमपश्यन्ती राक्षसीवशमागता । सीदामि खलु शोकेन कूलं तोयहतं यथा ।। १५।।
bhartaram tamapasyanti raksasivasamagata । sidami khalu sokena kulam toyahatam yatha ।। 15।।
तं पद्मदलपत्राक्षं सिंहविक्रान्तगामिनम् । धन्याः पश्यन्ति मे नाथं कृतज्ञं प्रियवादिनम् ।। १६।।
tam padmadalapatraksam simhavikrantagaminam । dhanyah pasyanti me natham krtajnam priyavadinam ।। 16।।
सर्वथा तेन हीनाया रामेण विदितात्मना । तीष्क्णं विषमिवास्वाद्य दुर्लभं मम जीवितम् ।। १७।।
sarvatha tena hinaya ramena viditatmana । tisknam visamivasvadya durlabham mama jivitam ।। 17।।
कीदृशं तु मया पापं पुरा देहान्तरे कृतम् । येनेदं प्राप्यते दुःखं मया घोरं सुदारुणम् ।। १८।।
kidrsam tu maya papam pura dehantare krtam । yenedam prapyate duhkham maya ghoram sudarunam ।। 18।।
जीवितं त्यक्तुमिच्छामि शोकेन महता वृता । राक्षसीभिश्च रक्षन्त्या रामो नासाद्यते मया ।। १९।।
jivitam tyaktumicchami sokena mahata vrta । raksasibhisca raksantya ramo nasadyate maya ।। 19।।
धिगस्तु खलु मानुष्यं धिगस्तु परवश्यताम् । न शक्यं यत्परित्यक्तुमात्मच्छन्देन जीवितम् ।। २०।।
dhigastu khalu manusyam dhigastu paravasyatam । na sakyam yatparityaktumatmacchandena jivitam ।। 20।।
AnonymousUser
150
5 Days
Learn
Teach
Discuss
Panchanga
Dashboard
Verses & Playlist
Flashcards
Saved Chants
Saved Discussions
Logout
Copy Shloka
Shloka Link
