कङ्क॑तो॒ न कङ्क॒तोऽथो॑ सती॒नक॑ङ्कतः । द्वाविति॒ प्लुषी॒ इति॒ न्य॑दृष्टा॑ अलिप्सत ॥ १.१९१.०१ ॥
kaṅka̍to̱ na kaṅka̱to'tho̍ satī̱naka̍ṅkataḥ | dvāviti̱ pluṣī̱ iti̱ nya1̱̍dṛṣṭā̍ alipsata || 1.191.01 ||
अ॒दृष्टा॑न्हन्त्याय॒त्यथो॑ हन्ति पराय॒ती । अथो॑ अवघ्न॒ती ह॒न्त्यथो॑ पिनष्टि पिंष॒ती ॥ १.१९१.०२ ॥
a̱dṛṣṭā̍nhantyāya̱tyatho̍ hanti parāya̱tī | atho̍ avaghna̱tī ha̱ntyatho̍ pinaṣṭi piṁṣa̱tī || 1.191.02 ||
श॒रासः॒ कुश॑रासो द॒र्भासः॑ सै॒र्या उ॒त । मौ॒ञ्जा अ॒दृष्टा॑ वैरि॒णाः सर्वे॑ सा॒कं न्य॑लिप्सत ॥ १.१९१.०३ ॥
śa̱rāsa̱ḥ kuśa̍rāso da̱rbhāsa̍ḥ sai̱ryā u̱ta | mau̱ñjā a̱dṛṣṭā̍ vairi̱ṇāḥ sarve̍ sā̱kaṁ nya̍lipsata || 1.191.03 ||
नि गावो॑ गो॒ष्ठे अ॑सद॒न्नि मृ॒गासो॑ अविक्षत । नि के॒तवो॒ जना॑नां॒ न्य॑दृष्टा॑ अलिप्सत ॥ १.१९१.०४ ॥
ni gāvo̍ go̱ṣṭhe a̍sada̱nni mṛ̱gāso̍ avikṣata | ni ke̱tavo̱ janā̍nā̱ṁ nya1̱̍dṛṣṭā̍ alipsata || 1.191.04 ||
ए॒त उ॒ त्ये प्रत्य॑दृश्रन्प्रदो॒षं तस्क॑रा इव । अदृ॑ष्टा॒ विश्व॑दृष्टाः॒ प्रति॑बुद्धा अभूतन ॥ १.१९१.०५ ॥
e̱ta u̱ tye pratya̍dṛśranprado̱ṣaṁ taska̍rā iva | adṛ̍ṣṭā̱ viśva̍dṛṣṭā̱ḥ prati̍buddhā abhūtana || 1.191.05 ||
द्यौर्वः॑ पि॒ता पृ॑थि॒वी मा॒ता सोमो॒ भ्रातादि॑तिः॒ स्वसा॑ । अदृ॑ष्टा॒ विश्व॑दृष्टा॒स्तिष्ठ॑ते॒लय॑ता॒ सु क॑म् ॥ १.१९१.०६ ॥
dyaurva̍ḥ pi̱tā pṛ̍thi̱vī mā̱tā somo̱ bhrātādi̍ti̱ḥ svasā̍ | adṛ̍ṣṭā̱ viśva̍dṛṣṭā̱stiṣṭha̍te̱laya̍tā̱ su ka̍m || 1.191.06 ||
ये अंस्या॒ ये अङ्ग्याः॑ सू॒चीका॒ ये प्र॑कङ्क॒ताः । अदृ॑ष्टाः॒ किं च॒नेह वः॒ सर्वे॑ सा॒कं नि ज॑स्यत ॥ १.१९१.०७ ॥
ye aṁsyā̱ ye aṅgyā̍ḥ sū̱cīkā̱ ye pra̍kaṅka̱tāḥ | adṛ̍ṣṭā̱ḥ kiṁ ca̱neha va̱ḥ sarve̍ sā̱kaṁ ni ja̍syata || 1.191.07 ||
उत्पु॒रस्ता॒त्सूर्य॑ एति वि॒श्वदृ॑ष्टो अदृष्ट॒हा । अ॒दृष्टा॒न्सर्वा॑ञ्ज॒म्भय॒न्सर्वा॑श्च यातुधा॒न्यः॑ ॥ १.१९१.०८ ॥
utpu̱rastā̱tsūrya̍ eti vi̱śvadṛ̍ṣṭo adṛṣṭa̱hā | a̱dṛṣṭā̱nsarvā̍ñja̱mbhaya̱nsarvā̍śca yātudhā̱nya̍ḥ || 1.191.08 ||
उद॑पप्तद॒सौ सूर्यः॑ पु॒रु विश्वा॑नि॒ जूर्व॑न् । आ॒दि॒त्यः पर्व॑तेभ्यो वि॒श्वदृ॑ष्टो अदृष्ट॒हा ॥ १.१९१.०९ ॥
uda̍paptada̱sau sūrya̍ḥ pu̱ru viśvā̍ni̱ jūrva̍n | ā̱di̱tyaḥ parva̍tebhyo vi̱śvadṛ̍ṣṭo adṛṣṭa̱hā || 1.191.09 ||
सूर्ये॑ वि॒षमा स॑जामि॒ दृतिं॒ सुरा॑वतो गृ॒हे । सो चि॒न्नु न म॑राति॒ नो व॒यं म॑रामा॒रे अ॑स्य॒ योज॑नं हरि॒ष्ठा मधु॑ त्वा मधु॒ला च॑कार ॥ १.१९१.१० ॥
sūrye̍ vi̱ṣamā sa̍jāmi̱ dṛti̱ṁ surā̍vato gṛ̱he | so ci̱nnu na ma̍rāti̱ no va̱yaṁ ma̍rāmā̱re a̍sya̱ yoja̍naṁ hari̱ṣṭhā madhu̍ tvā madhu̱lā ca̍kāra || 1.191.10 ||
इ॒य॒त्ति॒का श॑कुन्ति॒का स॒का ज॑घास ते वि॒षम् । सो चि॒न्नु न म॑राति॒ नो व॒यं म॑रामा॒रे अ॑स्य॒ योज॑नं हरि॒ष्ठा मधु॑ त्वा मधु॒ला च॑कार ॥ १.१९१.११ ॥
i̱ya̱tti̱kā śa̍kunti̱kā sa̱kā ja̍ghāsa te vi̱ṣam | so ci̱nnu na ma̍rāti̱ no va̱yaṁ ma̍rāmā̱re a̍sya̱ yoja̍naṁ hari̱ṣṭhā madhu̍ tvā madhu̱lā ca̍kāra || 1.191.11 ||
त्रिः स॒प्त वि॑ष्पुलिङ्ग॒का वि॒षस्य॒ पुष्य॑मक्षन् । ताश्चि॒न्नु न म॑रन्ति॒ नो व॒यं म॑रामा॒रे अ॑स्य॒ योज॑नं हरि॒ष्ठा मधु॑ त्वा मधु॒ला च॑कार ॥ १.१९१.१२ ॥
triḥ sa̱pta vi̍ṣpuliṅga̱kā vi̱ṣasya̱ puṣya̍makṣan | tāści̱nnu na ma̍ranti̱ no va̱yaṁ ma̍rāmā̱re a̍sya̱ yoja̍naṁ hari̱ṣṭhā madhu̍ tvā madhu̱lā ca̍kāra || 1.191.12 ||
न॒वा॒नां न॑वती॒नां वि॒षस्य॒ रोपु॑षीणाम् । सर्वा॑सामग्रभं॒ नामा॒रे अ॑स्य॒ योज॑नं हरि॒ष्ठा मधु॑ त्वा मधु॒ला च॑कार ॥ १.१९१.१३ ॥
na̱vā̱nāṁ na̍vatī̱nāṁ vi̱ṣasya̱ ropu̍ṣīṇām | sarvā̍sāmagrabha̱ṁ nāmā̱re a̍sya̱ yoja̍naṁ hari̱ṣṭhā madhu̍ tvā madhu̱lā ca̍kāra || 1.191.13 ||
त्रिः स॒प्त म॑यू॒र्यः॑ स॒प्त स्वसा॑रो अ॒ग्रुवः॑ । तास्ते॑ वि॒षं वि ज॑भ्रिर उद॒कं कु॒म्भिनी॑रिव ॥ १.१९१.१४ ॥
triḥ sa̱pta ma̍yū̱rya̍ḥ sa̱pta svasā̍ro a̱gruva̍ḥ | tāste̍ vi̱ṣaṁ vi ja̍bhrira uda̱kaṁ ku̱mbhinī̍riva || 1.191.14 ||
इ॒य॒त्त॒कः कु॑षुम्भ॒कस्त॒कं भि॑न॒द्म्यश्म॑ना । ततो॑ वि॒षं प्र वा॑वृते॒ परा॑ची॒रनु॑ सं॒वतः॑ ॥ १.१९१.१५ ॥
i̱ya̱tta̱kaḥ ku̍ṣumbha̱kasta̱kaṁ bhi̍na̱dmyaśma̍nā | tato̍ vi̱ṣaṁ pra vā̍vṛte̱ parā̍cī̱ranu̍ sa̱ṁvata̍ḥ || 1.191.15 ||
कु॒षु॒म्भ॒कस्तद॑ब्रवीद्गि॒रेः प्र॑वर्तमान॒कः । वृश्चि॑कस्यार॒सं वि॒षम॑र॒सं वृ॑श्चिक ते वि॒षम् ॥ १.१९१.१६ ॥
ku̱ṣu̱mbha̱kastada̍bravīdgi̱reḥ pra̍vartamāna̱kaḥ | vṛści̍kasyāra̱saṁ vi̱ṣama̍ra̱saṁ vṛ̍ścika te vi̱ṣam || 1.191.16 ||
AnonymousUser
150
5 Days
Learn
Teach
Discuss
Dashboard
Verses & Playlist
Flashcards
Saved Chants
Saved Discussions
Logout
Copy Shloka
Shloka Link
