Gyaandweep | Atharva Veda , Kanda 1, Sukta 15

सं सं स्रवन्तु सिन्धवः सं वाताः सं पतत्रिणः ।इमं यज्ञं प्रदिवो मे जुषन्तां संस्राव्येण हविषा जुहोमि ॥१॥

saṃ saṃ sravantu sindhavaḥ saṃ vātāḥ saṃ patatriṇaḥ |imaṃ yajñaṃ pradivo me juṣantāṃ saṃsrāvyeṇa haviṣā juhomi ||1||

इहैव हवमा यात म इह संस्रावणा उतेमं वर्धयता गिरः ।इहैतु सर्वो यः पशुरस्मिन् तिष्ठतु या रयिः ॥२॥

ihaiva havamā yāta ma iha saṃsrāvaṇā utemaṃ vardhayatā giraḥ |ihaitu sarvo yaḥ paśurasmin tiṣṭhatu yā rayiḥ ||2||

ये नदीनां संस्रवन्त्युत्सासः सदमक्षिताः ।तेभिर्मे सर्वैः संस्रावैर्धनं सं स्रावयामसि ॥३॥

ye nadīnāṃ saṃsravantyutsāsaḥ sadamakṣitāḥ |tebhirme sarvaiḥ saṃsrāvairdhanaṃ saṃ srāvayāmasi ||3||

ये सर्पिषः संस्रवन्ति क्षीरस्य चोदकस्य चतेभिर्मे सर्वैः संस्रावैर्धनं सं स्रावयामसि ॥४॥

ye sarpiṣaḥ saṃsravanti kṣīrasya codakasya catebhirme sarvaiḥ saṃsrāvairdhanaṃ saṃ srāvayāmasi ||4||

Languages