Gyaandweep | Atharva Veda , Kanda 1, Sukta 21

स्वस्तिदा विशां पतिर्वृत्रहा विमृधो वशी ।वृषेन्द्रः पुर एतु नः सोमपा अभयंकरः ॥१॥

svastidā viśāṃ patirvṛtrahā vimṛdho vaśī |vṛṣendraḥ pura etu naḥ somapā abhayaṃkaraḥ ||1||

वि न इन्द्र मृधो जहि नीचा यच्छ पृतन्यतः ।अधमं गमया तमो यो अस्मामभिदासति ॥२॥

vi na indra mṛdho jahi nīcā yaccha pṛtanyataḥ |adhamaṃ gamayā tamo yo asmāmabhidāsati ||2||

वि रक्षो वि मृधो जहि वि वृत्रस्य हनू रुज ।वि मन्युमिन्द्र वृत्रहन्न् अमित्रस्याभिदासतः ॥३॥

vi rakṣo vi mṛdho jahi vi vṛtrasya hanū ruja |vi manyumindra vṛtrahann amitrasyābhidāsataḥ ||3||

अपेन्द्र द्विषतो मनोऽप जिज्यासतो वधम् ।वि महच्छर्म यच्छ वरीयो यावया वधम् ॥४॥

apendra dviṣato mano'pa jijyāsato vadham |vi mahaccharma yaccha varīyo yāvayā vadham ||4||

Languages