Gyaandweep | Atharva Veda , Kanda 1, Sukta 25

यदग्निरापो अदहत्प्रविश्य यत्राकृण्वन् धर्मधृतो नमांसि ।तत्र त आहुः परमं जनित्रं स नः संविद्वान् परि वृङ्ग्धि तक्मन् ॥१॥

yadagnirāpo adahatpraviśya yatrākṛṇvan dharmadhṛto namāṃsi |tatra ta āhuḥ paramaṃ janitraṃ sa naḥ saṃvidvān pari vṛṅgdhi takman ||1||

यद्यर्चिर्यदि वासि शोचिः शकल्येषि यदि वा ते जनित्रम् ।ह्रूडुर्नामासि हरितस्य देव स नः संविद्वान् परि वृङ्ग्धि तक्मन् ॥२॥

yadyarciryadi vāsi śociḥ śakalyeṣi yadi vā te janitram |hrūḍurnāmāsi haritasya deva sa naḥ saṃvidvān pari vṛṅgdhi takman ||2||

यदि शोको यदि वाभिशोको यदि वा राज्ञो वरुणस्यासि पुत्रः ।ह्रूडुर्नामासि हरितस्य देव स नः संविद्वान् परि वृङ्ग्धि तक्मन् ॥३॥

yadi śoko yadi vābhiśoko yadi vā rājño varuṇasyāsi putraḥ |hrūḍurnāmāsi haritasya deva sa naḥ saṃvidvān pari vṛṅgdhi takman ||3||

नमः शीताय तक्मने नमो रूराय शोचिषे कृणोमि ।यो अन्येद्युरुभयद्युरभ्येति तृतीयकाय नमो अस्तु तक्मने ॥४॥

namaḥ śītāya takmane namo rūrāya śociṣe kṛṇomi |yo anyedyurubhayadyurabhyeti tṛtīyakāya namo astu takmane ||4||

Languages