Gyaandweep | Atharva Veda , Kanda 1, Sukta 7

स्तुवानमग्न आ वह यातुधानं किमीदिनम् ।त्वं हि देव वन्दितो हन्ता दस्योर्बभूविथ ॥१॥

stuvānamagna ā vaha yātudhānaṃ kimīdinam |tvaṃ hi deva vandito hantā dasyorbabhūvitha ||1||

आज्यस्य परमेष्ठिन् जातवेदस्तनूवशिन् ।अग्ने तौलस्य प्राशान यातुधानान् वि लापय ॥२॥

ājyasya parameṣṭhin jātavedastanūvaśin |agne taulasya prāśāna yātudhānān vi lāpaya ||2||

वि लपन्तु यातुधाना अत्त्रिणो ये किमीदिनः ।अथेदमग्ने नो हविरिन्द्रश्च प्रति हर्यतम् ॥३॥

vi lapantu yātudhānā attriṇo ye kimīdinaḥ |athedamagne no havirindraśca prati haryatam ||3||

अग्निः पूर्व आ रभतां प्रेन्द्रो नुदतु बाहुमान् ।ब्रवीतु सर्वो यातुमान् अयमस्मीत्येत्य ॥४॥

agniḥ pūrva ā rabhatāṃ prendro nudatu bāhumān |bravītu sarvo yātumān ayamasmītyetya ||4||

पश्याम ते वीर्यं जातवेदः प्र णो ब्रूहि यातुधानान् नृचक्षः ।त्वया सर्वे परितप्ताः पुरस्तात्त आ यन्तु प्रब्रुवाणा उपेदम् ॥५॥

paśyāma te vīryaṃ jātavedaḥ pra ṇo brūhi yātudhānān nṛcakṣaḥ |tvayā sarve paritaptāḥ purastātta ā yantu prabruvāṇā upedam ||5||

आ रभस्व जातवेदोऽस्माकार्थाय जज्ञिषे ।दूतो नो अग्ने भूत्वा यातुधानान् वि लापय ॥६॥

ā rabhasva jātavedo'smākārthāya jajñiṣe |dūto no agne bhūtvā yātudhānān vi lāpaya ||6||

त्वमग्ने यातुधानान् उपबद्धामिहा वह ।अथैषामिन्द्रो वज्रेणापि शीर्षाणि वृश्चतु ॥७॥

tvamagne yātudhānān upabaddhāmihā vaha |athaiṣāmindro vajreṇāpi śīrṣāṇi vṛścatu ||7||

Languages