Gyaandweep | Atharva Veda , Kanda 1, Sukta 9

अस्मिन् वसु वसवो धारयन्त्विन्द्रः पूषा वरुणो मित्रो अग्निः ।इममादित्या उत विश्वे च देवा उत्तरस्मिन् ज्योतिषि धारयन्तु ॥१॥

asmin vasu vasavo dhārayantvindraḥ pūṣā varuṇo mitro agniḥ |imamādityā uta viśve ca devā uttarasmin jyotiṣi dhārayantu ||1||

अस्य देवाः प्रदिशि ज्योतिरस्तु सूर्यो अग्निरुत वा हिरण्यम् ।सपत्ना अस्मदधरे भवन्तूत्तमं नाकमधि रोहयेमम् ॥२॥

asya devāḥ pradiśi jyotirastu sūryo agniruta vā hiraṇyam |sapatnā asmadadhare bhavantūttamaṃ nākamadhi rohayemam ||2||

येनेन्द्राय समभरः पयांस्युत्तमेन ब्रह्मणा जातवेदः ।तेन त्वमग्न इह वर्धयेमं सजातानां श्रैष्ठ्य आ धेह्येनम् ॥३॥

yenendrāya samabharaḥ payāṃsyuttamena brahmaṇā jātavedaḥ |tena tvamagna iha vardhayemaṃ sajātānāṃ śraiṣṭhya ā dhehyenam ||3||

ऐषां यज्ञमुत वर्चो ददेऽहं रायस्पोषमुत चित्तान्यग्ने ।सपत्ना अस्मदधरे भवन्तूत्तमं नाकमधि रोहयेमम् ॥४॥

aiṣāṃ yajñamuta varco dade'haṃ rāyaspoṣamuta cittānyagne |sapatnā asmadadhare bhavantūttamaṃ nākamadhi rohayemam ||4||

Languages