अयं मे वरणो मणिः सपत्नक्षयणो वृषा ।तेना रभस्व त्वं शत्रून् प्र मृणीहि दुरस्यतः ॥१॥
ayaṃ me varaṇo maṇiḥ sapatnakṣayaṇo vṛṣā |tenā rabhasva tvaṃ śatrūn pra mṛṇīhi durasyataḥ ||1||
प्रैणान् छृणीहि प्र मृणा रभस्व मणिस्ते अस्तु पुरएता पुरस्तात्।अवारयन्त वरणेन देवा अभ्याचारमसुराणां श्वःश्वः ॥२॥
praiṇān chṛṇīhi pra mṛṇā rabhasva maṇiste astu puraetā purastāt|avārayanta varaṇena devā abhyācāramasurāṇāṃ śvaḥśvaḥ ||2||
अयं मणिर्वरणो विश्वभेषजः सहस्राक्षो हरितो हिरण्ययः ।स ते शत्रून् अधरान् पादयाति पूर्वस्तान् दभ्नुहि ये त्वा द्विषन्ति ॥३॥
ayaṃ maṇirvaraṇo viśvabheṣajaḥ sahasrākṣo harito hiraṇyayaḥ |sa te śatrūn adharān pādayāti pūrvastān dabhnuhi ye tvā dviṣanti ||3||
अयं ते कृत्यां विततां पौरुषेयादयं भयात्।अयं त्वा सर्वस्मात्पापाद्वरणो वारयिष्यते ॥४॥
ayaṃ te kṛtyāṃ vitatāṃ pauruṣeyādayaṃ bhayāt|ayaṃ tvā sarvasmātpāpādvaraṇo vārayiṣyate ||4||
वरणो वारयाता अयं देवो वनस्पतिः ।यक्ष्मो यो अस्मिन्न् आविष्टस्तमु देवा अवीवरन् ॥५॥
varaṇo vārayātā ayaṃ devo vanaspatiḥ |yakṣmo yo asminn āviṣṭastamu devā avīvaran ||5||
स्वप्नं सुप्त्वा यदि पश्यासि पापं मृगः सृतिं यति धावादजुष्टाम् ।परिक्षवाच्छकुनेः पापवादादयं मणिर्वरणो वारयिष्यते ॥६॥
svapnaṃ suptvā yadi paśyāsi pāpaṃ mṛgaḥ sṛtiṃ yati dhāvādajuṣṭām |parikṣavācchakuneḥ pāpavādādayaṃ maṇirvaraṇo vārayiṣyate ||6||
अरात्यास्त्वा निर्ऋत्या अभिचारादथो भयात्।मृत्योरोजीयसो वधाद्वरणो वारयिष्यते ॥७॥
arātyāstvā nirṛtyā abhicārādatho bhayāt|mṛtyorojīyaso vadhādvaraṇo vārayiṣyate ||7||
यन् मे माता यन् मे पिता भ्रातरो यच्च मे स्वा यदेनश्चकृमा वयम् ।ततो नो वारयिष्यतेऽयं देवो वनस्पतिः ॥८॥
yan me mātā yan me pitā bhrātaro yacca me svā yadenaścakṛmā vayam |tato no vārayiṣyate'yaṃ devo vanaspatiḥ ||8||
वरणेन प्रव्यथिता भ्रातृव्या मे सबन्धवः ।असूर्तं रजो अप्यगुस्ते यन्त्वधमं तमः ॥९॥
varaṇena pravyathitā bhrātṛvyā me sabandhavaḥ |asūrtaṃ rajo apyaguste yantvadhamaṃ tamaḥ ||9||
अरिष्टोऽहमरिष्टगुरायुष्मान्त्सर्वपूरुषः ।तं मायं वरणो मणिः परि पातु दिशोदिशः ॥१०॥ {७}
ariṣṭo'hamariṣṭagurāyuṣmāntsarvapūruṣaḥ |taṃ māyaṃ varaṇo maṇiḥ pari pātu diśodiśaḥ ||10|| {7}
अयं मे वरण उरसि राजा देवो वनस्पतिः ।स मे शत्रून् वि बाधतामिन्द्रो दस्यून् इवासुरान् ॥११॥
ayaṃ me varaṇa urasi rājā devo vanaspatiḥ |sa me śatrūn vi bādhatāmindro dasyūn ivāsurān ||11||
इमं बिभर्मि वरणमायुष्मान् छतशारदः ।स मे राष्ट्रं च क्षत्रं च पशून् ओजश्च मे दधत्॥१२॥
imaṃ bibharmi varaṇamāyuṣmān chataśāradaḥ |sa me rāṣṭraṃ ca kṣatraṃ ca paśūn ojaśca me dadhat||12||
यथा वातो वनस्पतीन् वृक्षान् भनक्त्योजसा ।एवा सपत्नान् मे भङ्ग्धि पूर्वान् जातामुतापरान् वरणस्त्वाभि रक्षतु ॥१३॥
yathā vāto vanaspatīn vṛkṣān bhanaktyojasā |evā sapatnān me bhaṅgdhi pūrvān jātāmutāparān varaṇastvābhi rakṣatu ||13||
यथा वातश्चाग्निश्च वृक्षान् प्सातो वनस्पतीन् ।एवा सपत्नान् मे प्साहि पूर्वान् जातामुतापरान् वरणस्त्वाभि रक्षतु ॥१४॥
yathā vātaścāgniśca vṛkṣān psāto vanaspatīn |evā sapatnān me psāhi pūrvān jātāmutāparān varaṇastvābhi rakṣatu ||14||
यथा वातेन प्रक्षीणा वृक्षाः शेरे न्यर्पिताः ।एवा सपत्नांस्त्वं मम प्र क्षिणीहि न्यर्पय ।पूर्वान् जातामुतापरान् वरणस्त्वाभि रक्षतु ॥१५॥
yathā vātena prakṣīṇā vṛkṣāḥ śere nyarpitāḥ |evā sapatnāṃstvaṃ mama pra kṣiṇīhi nyarpaya |pūrvān jātāmutāparān varaṇastvābhi rakṣatu ||15||
तांस्त्वं प्र छिन्द्धि वरण पुरा दिष्टात्पुरायुषः ।य एनं पशुषु दिप्सन्ति ये चास्य राष्ट्रदिप्सवः ॥१६॥
tāṃstvaṃ pra chinddhi varaṇa purā diṣṭātpurāyuṣaḥ |ya enaṃ paśuṣu dipsanti ye cāsya rāṣṭradipsavaḥ ||16||
यथा सूर्यो अतिभाति यथास्मिन् तेज आहितम् ।एवा मे वरणो मणिः कीर्तिं भूतिं नि यच्छतु ।तेजसा मा समुक्षतु यशसा समनक्तु मा ॥१७॥
yathā sūryo atibhāti yathāsmin teja āhitam |evā me varaṇo maṇiḥ kīrtiṃ bhūtiṃ ni yacchatu |tejasā mā samukṣatu yaśasā samanaktu mā ||17||
यथा यशश्चन्द्रमस्यादित्ये च नृचक्षसि ।एवा मे वरणो मणिः कीर्तिं भूतिं नि यच्छतु ।तेजसा मा समुक्षतु यशसा समनक्तु मा ॥१८॥
yathā yaśaścandramasyāditye ca nṛcakṣasi |evā me varaṇo maṇiḥ kīrtiṃ bhūtiṃ ni yacchatu |tejasā mā samukṣatu yaśasā samanaktu mā ||18||
यथा यशः पृथिव्यां यथास्मिन् जातवेदसि ।एवा मे वरणो मणिः कीर्तिं भूतिं नि यच्छतु ।तेजसा मा समुक्षतु यशसा समनक्तु मा ॥१९॥
yathā yaśaḥ pṛthivyāṃ yathāsmin jātavedasi |evā me varaṇo maṇiḥ kīrtiṃ bhūtiṃ ni yacchatu |tejasā mā samukṣatu yaśasā samanaktu mā ||19||
यथा यशः कन्यायां यथास्मिन्त्संभृते रथे ।एवा मे वरणो मणिः कीर्तिं भूतिं नि यच्छतु ।तेजसा मा समुक्षतु यशसा समनक्तु मा ॥२०॥ {८}
yathā yaśaḥ kanyāyāṃ yathāsmintsaṃbhṛte rathe |evā me varaṇo maṇiḥ kīrtiṃ bhūtiṃ ni yacchatu |tejasā mā samukṣatu yaśasā samanaktu mā ||20|| {8}
यथा यशः सोमपीथे मधुपर्के यथा यशः ।एवा मे वरणो मणिः कीर्तिं भूतिं नि यच्छतु ।तेजसा मा समुक्षतु यशसा समनक्तु मा ॥२१॥
yathā yaśaḥ somapīthe madhuparke yathā yaśaḥ |evā me varaṇo maṇiḥ kīrtiṃ bhūtiṃ ni yacchatu |tejasā mā samukṣatu yaśasā samanaktu mā ||21||
यथा यशोऽग्निहोत्रे वषट्कारे यथा यशः ।एवा मे वरणो मणिः कीर्तिं भूतिं नि यच्छतु ।तेजसा मा समुक्षतु यशसा समनक्तु मा ॥२२॥
yathā yaśo'gnihotre vaṣaṭkāre yathā yaśaḥ |evā me varaṇo maṇiḥ kīrtiṃ bhūtiṃ ni yacchatu |tejasā mā samukṣatu yaśasā samanaktu mā ||22||
यथा यशो यजमाने यथास्मिन् यज्ञ आहितम् ।एवा मे वरणो मणिः कीर्तिं भूतिं नि यच्छतु ।तेजसा मा समुक्षतु यशसा समनक्तु मा ॥२३॥
yathā yaśo yajamāne yathāsmin yajña āhitam |evā me varaṇo maṇiḥ kīrtiṃ bhūtiṃ ni yacchatu |tejasā mā samukṣatu yaśasā samanaktu mā ||23||
यथा यशः प्रजापतौ यथास्मिन् परमेष्ठिनि ।एवा मे वरणो मणिः कीर्तिं भूतिं नि यच्छतु ।तेजसा मा समुक्षतु यशसा समनक्तु मा ॥२४॥
yathā yaśaḥ prajāpatau yathāsmin parameṣṭhini |evā me varaṇo maṇiḥ kīrtiṃ bhūtiṃ ni yacchatu |tejasā mā samukṣatu yaśasā samanaktu mā ||24||
यथा देवेष्वमृतं यथैषु सत्यमाहितम् ।एवा मे वरणो मणिः कीर्तिं भूतिं नि यच्छतु ।तेजसा मा समुक्षतु यशसा समनक्तु मा ॥२५॥ {९}
yathā deveṣvamṛtaṃ yathaiṣu satyamāhitam |evā me varaṇo maṇiḥ kīrtiṃ bhūtiṃ ni yacchatu |tejasā mā samukṣatu yaśasā samanaktu mā ||25|| {9}
AnonymousUser
150
5 Days
Learn
Teach
Discuss
Dashboard
Verses & Playlist
Saved Flashcards
Saved Chants
Saved Discussions
Logout
Copy Shloka
Shloka Link
