भवाशर्वौ मृडतं माभि यातं भूतपती पशुपती नमो वाम् ।प्रतिहितामायतां मा वि स्राष्टं मा नो हिंसिष्टं द्विपदो मा चतुष्पदः ॥१॥
bhavāśarvau mṛḍataṃ mābhi yātaṃ bhūtapatī paśupatī namo vām |pratihitāmāyatāṃ mā vi srāṣṭaṃ mā no hiṃsiṣṭaṃ dvipado mā catuṣpadaḥ ||1||
शुने क्रोष्ट्रे मा शरीराणि कर्तमलिक्लवेभ्यो गृध्रेभ्यो ये च कृष्णा अविष्यवः ।मक्षिकास्ते पशुपते वयांसि ते विघसे मा विदन्त ॥२॥
śune kroṣṭre mā śarīrāṇi kartamaliklavebhyo gṛdhrebhyo ye ca kṛṣṇā aviṣyavaḥ |makṣikāste paśupate vayāṃsi te vighase mā vidanta ||2||
क्रन्दाय ते प्राणाय याश्च ते भव रोपयः ।नमस्ते रुद्र कृण्मः सहस्राक्षायामर्त्य ॥३॥
krandāya te prāṇāya yāśca te bhava ropayaḥ |namaste rudra kṛṇmaḥ sahasrākṣāyāmartya ||3||
पुरस्तात्ते नमः कृण्म उत्तरादधरादुत ।अभीवर्गाद्दिवस्पर्यन्तरिक्षाय ते नमः ॥४॥
purastātte namaḥ kṛṇma uttarādadharāduta |abhīvargāddivasparyantarikṣāya te namaḥ ||4||
मुखाय ते पशुपते यानि चक्षूंषि ते भव ।त्वचे रूपाय संदृशे प्रतीचीनाय ते नमः ॥५॥
mukhāya te paśupate yāni cakṣūṃṣi te bhava |tvace rūpāya saṃdṛśe pratīcīnāya te namaḥ ||5||
अङ्गेभ्यस्त उदराय जिह्वाया आस्याय ते ।दद्भ्यो गन्धाय ते नमः ॥६॥
aṅgebhyasta udarāya jihvāyā āsyāya te |dadbhyo gandhāya te namaḥ ||6||
अस्त्रा नीलशिखण्डेन सहस्राक्षेण वाजिना ।रुद्रेणार्धकघातिना तेन मा समरामहि ॥७॥
astrā nīlaśikhaṇḍena sahasrākṣeṇa vājinā |rudreṇārdhakaghātinā tena mā samarāmahi ||7||
स नो भवः परि वृणक्तु विश्वत आप इवाग्निः परि वृणक्तु नो भवः ।मा नोऽभि मांस्त नमो अस्त्वस्मै ॥८॥
sa no bhavaḥ pari vṛṇaktu viśvata āpa ivāgniḥ pari vṛṇaktu no bhavaḥ |mā no'bhi māṃsta namo astvasmai ||8||
चतुर्नमो अष्टकृत्वो भवाय दश कृत्वः पशुपते नमस्ते ।तवेमे पञ्च पशवो विभक्ता गावो अश्वाः पुरुषा अजावयः ॥९॥
caturnamo aṣṭakṛtvo bhavāya daśa kṛtvaḥ paśupate namaste |taveme pañca paśavo vibhaktā gāvo aśvāḥ puruṣā ajāvayaḥ ||9||
तव चतस्रः प्रदिशस्तव द्यौस्तव पृथिवी तवेदमुग्रोर्वन्तरिक्षम् ।तवेदं सर्वमात्मन्वद्यत्प्राणत्पृथिवीमनु ॥१०॥ {५}
tava catasraḥ pradiśastava dyaustava pṛthivī tavedamugrorvantarikṣam |tavedaṃ sarvamātmanvadyatprāṇatpṛthivīmanu ||10|| {5}
उरुः कोशो वसुधानस्तवायं यस्मिन्न् इमा विश्वा भुवनान्यन्तः ।स नो मृड पशुपते नमस्ते परः क्रोष्टारो अभिभाः श्वानः परो यन्त्वघरुदो विकेश्यः ॥११॥
uruḥ kośo vasudhānastavāyaṃ yasminn imā viśvā bhuvanānyantaḥ |sa no mṛḍa paśupate namaste paraḥ kroṣṭāro abhibhāḥ śvānaḥ paro yantvagharudo vikeśyaḥ ||11||
धनुर्बिभर्षि हरितं हिरण्ययं सहस्रघ्निं शतवधं शिखण्डिन् ।रुद्रस्येषुश्चरति देवहेतिस्तस्यै नमो यतमस्यां दिशीतः ॥१२॥
dhanurbibharṣi haritaṃ hiraṇyayaṃ sahasraghniṃ śatavadhaṃ śikhaṇḍin |rudrasyeṣuścarati devahetistasyai namo yatamasyāṃ diśītaḥ ||12||
योऽभियातो निलयते त्वां रुद्र निचिकीर्षति ।पश्चादनुप्रयुङ्क्षे तं विद्धस्य पदनीरिव ॥१३॥
yo'bhiyāto nilayate tvāṃ rudra nicikīrṣati |paścādanuprayuṅkṣe taṃ viddhasya padanīriva ||13||
भवारुद्रौ सयुजा संविदानावुभावुग्रौ चरतो वीर्याय ।ताभ्यां नमो यतमस्यां दिशीतः ॥१४॥
bhavārudrau sayujā saṃvidānāvubhāvugrau carato vīryāya |tābhyāṃ namo yatamasyāṃ diśītaḥ ||14||
नमस्ते अस्त्वायते नमो अस्तु परायते ।नमस्ते रुद्र तिष्ठत आसीनायोत ते नमः ॥१५॥
namaste astvāyate namo astu parāyate |namaste rudra tiṣṭhata āsīnāyota te namaḥ ||15||
नमः सायं नमः प्रातर्नमो रात्र्या नमो दिवा ।भवाय च शर्वाय चोभाभ्यामकरं नमः ॥१६॥
namaḥ sāyaṃ namaḥ prātarnamo rātryā namo divā |bhavāya ca śarvāya cobhābhyāmakaraṃ namaḥ ||16||
सहस्राक्षमतिपश्यं पुरस्ताद्रुद्रमस्यन्तं बहुधा विपश्चितम् ।मोपाराम जिह्वयेयमानम् ॥१७॥
sahasrākṣamatipaśyaṃ purastādrudramasyantaṃ bahudhā vipaścitam |mopārāma jihvayeyamānam ||17||
श्यावाश्वं कृष्णमसितं मृणन्तं भीमं रथं केशिनः पादयन्तम् ।पूर्वे प्रतीमो नमो अस्त्वस्मै ॥१८॥
śyāvāśvaṃ kṛṣṇamasitaṃ mṛṇantaṃ bhīmaṃ rathaṃ keśinaḥ pādayantam |pūrve pratīmo namo astvasmai ||18||
मा नोऽभि स्रा मत्यं देवहेतिं मा नः क्रुधः पशुपते नमस्ते ।अन्यत्रास्मद्दिव्यां शाखां वि धूनु ॥१९॥
mā no'bhi srā matyaṃ devahetiṃ mā naḥ krudhaḥ paśupate namaste |anyatrāsmaddivyāṃ śākhāṃ vi dhūnu ||19||
मा नो हिंसीरधि नो ब्रूहि परि णो वृङ्धि मा क्रुधः ।मा त्वया समरामहि ॥२०॥ {६}
mā no hiṃsīradhi no brūhi pari ṇo vṛṅdhi mā krudhaḥ |mā tvayā samarāmahi ||20|| {6}
मा नो गोषु पुरुषेषु मा गृधो नो अजाविषु ।अन्यत्रोग्र वि वर्तय पियारूणां प्रजां जहि ॥२१॥
mā no goṣu puruṣeṣu mā gṛdho no ajāviṣu |anyatrogra vi vartaya piyārūṇāṃ prajāṃ jahi ||21||
यस्य तक्मा कासिका हेतिरेकमश्वस्येव वृषणः क्रन्द एति ।अभिपूर्वं निर्णयते नमो अस्त्वस्मै ॥२२॥
yasya takmā kāsikā hetirekamaśvasyeva vṛṣaṇaḥ kranda eti |abhipūrvaṃ nirṇayate namo astvasmai ||22||
योऽन्तरिक्षे तिष्ठति विष्टभितोऽयज्वनः प्रमृणन् देवपीयून् ।तस्मै नमो दशभिः शक्वरीभिः ॥२३॥
yo'ntarikṣe tiṣṭhati viṣṭabhito'yajvanaḥ pramṛṇan devapīyūn |tasmai namo daśabhiḥ śakvarībhiḥ ||23||
तुभ्यमारण्याः पशवो मृगा वने हिता हंसाः सुपर्णाः शकुना वयांसि ।तव यक्षं पशुपते अप्स्वन्तस्तुभ्यं क्षरन्ति दिव्या आपो वृधे ॥२४॥
tubhyamāraṇyāḥ paśavo mṛgā vane hitā haṃsāḥ suparṇāḥ śakunā vayāṃsi |tava yakṣaṃ paśupate apsvantastubhyaṃ kṣaranti divyā āpo vṛdhe ||24||
शिंशुमारा अजगराः पुरीकया जषा मत्स्या रजसा येभ्यो अस्यसि ।न ते दूरं न परिष्ठास्ति ते भव सद्यः सर्वां परि पश्यसि भूमिं पूर्वस्माद्धंस्युत्तरस्मिन्त्समुद्रे ॥२५॥
śiṃśumārā ajagarāḥ purīkayā jaṣā matsyā rajasā yebhyo asyasi |na te dūraṃ na pariṣṭhāsti te bhava sadyaḥ sarvāṃ pari paśyasi bhūmiṃ pūrvasmāddhaṃsyuttarasmintsamudre ||25||
मा नो रुद्र तक्मना मा विषेण मा नः सं स्रा दिव्येनाग्निना ।अन्यत्रास्मद्विद्युतं पातयैताम् ॥२६॥
mā no rudra takmanā mā viṣeṇa mā naḥ saṃ srā divyenāgninā |anyatrāsmadvidyutaṃ pātayaitām ||26||
भवो दिवो भव ईशे पृथिव्या भव आ पप्र उर्वन्तरिक्षम् ।तस्यै नमो यतमस्यां दिशीतः ॥२७॥
bhavo divo bhava īśe pṛthivyā bhava ā papra urvantarikṣam |tasyai namo yatamasyāṃ diśītaḥ ||27||
भव राजन् यजमानाय मृड पशूनां हि पशुपतिर्बभूथ ।यः श्रद्दधाति सन्ति देवा इति चतुष्पदे द्विपदेऽस्य मृड ॥२८॥
bhava rājan yajamānāya mṛḍa paśūnāṃ hi paśupatirbabhūtha |yaḥ śraddadhāti santi devā iti catuṣpade dvipade'sya mṛḍa ||28||
मा नो महान्तमुत मा नो अर्भकं मा नो वहन्तमुत मा नो वक्ष्यतः ।मा नो हिंसीः पितरं मातरं च स्वां तन्वं रुद्र मा रीरिषो नः ॥२९॥
mā no mahāntamuta mā no arbhakaṃ mā no vahantamuta mā no vakṣyataḥ |mā no hiṃsīḥ pitaraṃ mātaraṃ ca svāṃ tanvaṃ rudra mā rīriṣo naḥ ||29||
रुद्रस्यैलबकारेभ्योऽसंसूक्तगिलेभ्यः ।इदं महास्येभ्यः श्वभ्यो अकरं नमः ॥३०॥
rudrasyailabakārebhyo'saṃsūktagilebhyaḥ |idaṃ mahāsyebhyaḥ śvabhyo akaraṃ namaḥ ||30||
नमस्ते घोषिणीभ्यो नमस्ते केशिनीभ्यः ।नमो नमस्कृताभ्यो नमः संभुञ्जतीभ्यः ।नमस्ते देव सेनाभ्यः स्वस्ति नो अभयं च नः ॥३१॥ {७}
namaste ghoṣiṇībhyo namaste keśinībhyaḥ |namo namaskṛtābhyo namaḥ saṃbhuñjatībhyaḥ |namaste deva senābhyaḥ svasti no abhayaṃ ca naḥ ||31|| {7}
AnonymousUser
150
5 Days
Learn
Teach
Discuss
Dashboard
Verses & Playlist
Flashcards
Saved Chants
Saved Discussions
Logout
Copy Shloka
Shloka Link
