अग्निं ब्रूमो वनस्पतीन् ओषधीरुत वीरुधः ।इन्द्रं बृहस्पतिं सूर्यं ते नो मुञ्चन्त्वंहसः ॥१॥
agniṃ brūmo vanaspatīn oṣadhīruta vīrudhaḥ |indraṃ bṛhaspatiṃ sūryaṃ te no muñcantvaṃhasaḥ ||1||
ब्रूमो राजानं वरुणं मित्रं विष्णुमथो भगम् ।अंशं विवस्वन्तं ब्रूमस्ते नो मुञ्चन्त्वंहसः ॥२॥
brūmo rājānaṃ varuṇaṃ mitraṃ viṣṇumatho bhagam |aṃśaṃ vivasvantaṃ brūmaste no muñcantvaṃhasaḥ ||2||
ब्रूमो देवं सवितारं धातारमुत पूषणम् ।त्वष्टारमग्रियं ब्रूमस्ते नो मुञ्चन्त्वंहसः ॥३॥
brūmo devaṃ savitāraṃ dhātāramuta pūṣaṇam |tvaṣṭāramagriyaṃ brūmaste no muñcantvaṃhasaḥ ||3||
गन्धर्वाप्सरसो ब्रूमो अश्विना ब्रह्मणस्पतिम् ।अर्यमा नाम यो देवस्ते नो मुञ्चन्त्वंहसः ॥४॥
gandharvāpsaraso brūmo aśvinā brahmaṇaspatim |aryamā nāma yo devaste no muñcantvaṃhasaḥ ||4||
अहोरात्रे इदं ब्रूमः सूर्याचन्द्रमसावुभा ।विश्वान् आदित्यान् ब्रूमस्ते नो मुञ्चन्त्वंहसः ॥५॥
ahorātre idaṃ brūmaḥ sūryācandramasāvubhā |viśvān ādityān brūmaste no muñcantvaṃhasaḥ ||5||
वातं ब्रूमः पर्जन्यमन्तरिक्षमथो दिशः ।आशाश्च सर्वा ब्रूमस्ते नो मुञ्चन्त्वंहसः ॥६॥
vātaṃ brūmaḥ parjanyamantarikṣamatho diśaḥ |āśāśca sarvā brūmaste no muñcantvaṃhasaḥ ||6||
मुञ्चन्तु मा शपथ्यादहोरात्रे अथो उषाः ।सोमो मा देवो मुञ्चतु यमाहुश्चन्द्रमा इति ॥७॥
muñcantu mā śapathyādahorātre atho uṣāḥ |somo mā devo muñcatu yamāhuścandramā iti ||7||
पार्थिवा दिव्याः पशव आरण्या उत ये मृगाः ।शकुन्तान् पक्षिणो ब्रूमस्ते नो मुञ्चन्त्वंहसः ॥८॥
pārthivā divyāḥ paśava āraṇyā uta ye mṛgāḥ |śakuntān pakṣiṇo brūmaste no muñcantvaṃhasaḥ ||8||
भवाशर्वाविदं ब्रूमो रुद्रं पशुपतिश्च यः ।इषूर्या एषां संविद्म ता नः सन्तु सदा शिवाः ॥९॥
bhavāśarvāvidaṃ brūmo rudraṃ paśupatiśca yaḥ |iṣūryā eṣāṃ saṃvidma tā naḥ santu sadā śivāḥ ||9||
दिवं ब्रूमो नक्षत्राणि भूमिं यक्षाणि पर्वतान् ।समुद्रा नद्यो वेशन्तास्ते नो मुञ्चन्त्वंहसः ॥१०॥ {१७}
divaṃ brūmo nakṣatrāṇi bhūmiṃ yakṣāṇi parvatān |samudrā nadyo veśantāste no muñcantvaṃhasaḥ ||10|| {17}
सप्तऋषीन् वा इदं ब्रूमोऽपो देवीः प्रजापतिम् ।पितॄन् यमश्रेष्ठान् ब्रूमस्ते नो मुञ्चन्त्वंहसः ।११॥
saptaṛṣīn vā idaṃ brūmo'po devīḥ prajāpatim |pitṝn yamaśreṣṭhān brūmaste no muñcantvaṃhasaḥ |11||
ये देवा दिविषदो अन्तरिक्षसदश्च ये ।पृथिव्यां शक्रा ये श्रितास्ते नो मुञ्चन्त्वंहसः ॥१२॥
ye devā diviṣado antarikṣasadaśca ye |pṛthivyāṃ śakrā ye śritāste no muñcantvaṃhasaḥ ||12||
आदित्या रुद्रा वसवो दिवि देवा अथर्वाणः ।अङ्गिरसो मनीषिणस्ते नो मुञ्चन्त्वंहसः ॥१३॥
ādityā rudrā vasavo divi devā atharvāṇaḥ |aṅgiraso manīṣiṇaste no muñcantvaṃhasaḥ ||13||
यज्ञं ब्रूमो यजमानमृचः सामानि भेषजा ।यजूंषि होत्रा ब्रूमस्ते नो मुञ्चन्त्वंहसः ॥१४॥
yajñaṃ brūmo yajamānamṛcaḥ sāmāni bheṣajā |yajūṃṣi hotrā brūmaste no muñcantvaṃhasaḥ ||14||
पञ्च राज्यानि वीरुधां सोमश्रेष्ठानि ब्रूमः ।दर्भो भङ्गो यवः सहस्ते नो मुञ्चन्त्वंहसः ॥१५॥
pañca rājyāni vīrudhāṃ somaśreṣṭhāni brūmaḥ |darbho bhaṅgo yavaḥ sahaste no muñcantvaṃhasaḥ ||15||
अरायान् ब्रूमो रक्षांसि सर्पान् पुण्यजनान् पितॄन् ।मृत्यून् एकशतं ब्रूमस्ते नो मुञ्चन्त्वंहसः ॥१६॥
arāyān brūmo rakṣāṃsi sarpān puṇyajanān pitṝn |mṛtyūn ekaśataṃ brūmaste no muñcantvaṃhasaḥ ||16||
ऋतून् ब्रूम ऋतुपतीन् आर्तवान् उत हायनान् ।समाः संवत्सरान् मासांस्ते नो मुञ्चन्त्वंहसः ॥१७॥
ṛtūn brūma ṛtupatīn ārtavān uta hāyanān |samāḥ saṃvatsarān māsāṃste no muñcantvaṃhasaḥ ||17||
एत देवा दक्षिणतः पश्चात्प्राञ्च उदेत ।पुरस्तादुत्तराच्छक्रा विश्वे देवाः समेत्य ते नो मुञ्चन्त्वंहसः ॥१८॥
eta devā dakṣiṇataḥ paścātprāñca udeta |purastāduttarācchakrā viśve devāḥ sametya te no muñcantvaṃhasaḥ ||18||
विश्वान् देवान् इदं ब्रूमः सत्यसन्धान् ऋतावृधः ।विश्वाभिः पत्नीभिः सह ते नो मुञ्चन्त्वंहसः ॥१९॥
viśvān devān idaṃ brūmaḥ satyasandhān ṛtāvṛdhaḥ |viśvābhiḥ patnībhiḥ saha te no muñcantvaṃhasaḥ ||19||
सर्वान् देवान् इदं ब्रूमः सत्यसन्धान् ऋतावृधः ।सर्वाभिः पत्नीभिः सह ते नो मुञ्चन्त्वंहसः ॥२०॥
sarvān devān idaṃ brūmaḥ satyasandhān ṛtāvṛdhaḥ |sarvābhiḥ patnībhiḥ saha te no muñcantvaṃhasaḥ ||20||
भूतं ब्रूमो भूतपतिं भूतानामुत यो वशी ।भूतानि सर्वा संगत्य ते नो मुञ्चन्त्वंहसः ॥२१॥
bhūtaṃ brūmo bhūtapatiṃ bhūtānāmuta yo vaśī |bhūtāni sarvā saṃgatya te no muñcantvaṃhasaḥ ||21||
या देवीः पञ्च प्रदिशो ये देवा द्वादश ऋतवः ।संवत्सरस्य ये दंष्ट्रास्ते नः सन्तु सदा शिवाः ॥२२॥
yā devīḥ pañca pradiśo ye devā dvādaśa ṛtavaḥ |saṃvatsarasya ye daṃṣṭrāste naḥ santu sadā śivāḥ ||22||
यन् मातली रथक्रीतममृतं वेद भेषजम् ।तदिन्द्रो अप्सु प्रावेशयत्तदापो दत्त भेषजम् ॥२३॥ {१८}
yan mātalī rathakrītamamṛtaṃ veda bheṣajam |tadindro apsu prāveśayattadāpo datta bheṣajam ||23|| {18}
AnonymousUser
150
5 Days
Learn
Teach
Discuss
Dashboard
Verses & Playlist
Flashcards
Saved Chants
Saved Discussions
Logout
Copy Shloka
Shloka Link
