उदस्य केतवो दिवि शुक्रा भ्राजन्त ईरते ।आदित्यस्य नृचक्षसो महिव्रतस्य मीढुषः ॥१॥
udasya ketavo divi śukrā bhrājanta īrate |ādityasya nṛcakṣaso mahivratasya mīḍhuṣaḥ ||1||
दिशां प्रज्ञानां स्वरयन्तमर्चिषा सुपक्षमाशुं पतयन्तमर्णवे ।स्तवाम सूर्यं भुवनस्य गोपां यो रश्मिभिर्दिश आभाति सर्वाः ॥२॥
diśāṃ prajñānāṃ svarayantamarciṣā supakṣamāśuṃ patayantamarṇave |stavāma sūryaṃ bhuvanasya gopāṃ yo raśmibhirdiśa ābhāti sarvāḥ ||2||
यत्प्राङ्प्रत्यङ्स्वधया यासि शीभं नानारूपे अहनी कर्षि मायया ।तदादित्य महि तत्ते महि श्रवो यदेको विश्वं परि भूम जायसे ॥३॥
yatprāṅpratyaṅsvadhayā yāsi śībhaṃ nānārūpe ahanī karṣi māyayā |tadāditya mahi tatte mahi śravo yadeko viśvaṃ pari bhūma jāyase ||3||
विपश्चितं तरणिं भ्राजमानं वहन्ति यं हरितः सप्त बह्वीः ।स्रुताद्यमत्त्रिर्दिवमुन्निनाय तं त्वा पश्यन्ति परियान्तमाजिम् ॥४॥
vipaścitaṃ taraṇiṃ bhrājamānaṃ vahanti yaṃ haritaḥ sapta bahvīḥ |srutādyamattrirdivamunnināya taṃ tvā paśyanti pariyāntamājim ||4||
मा त्वा दभन् परियान्तमाजिं स्वस्ति दुर्गामति याहि शीभम् ।दिवं च सूर्य पृथिवीं च देवीमहोरात्रे विमिमानो यदेषि ॥५॥
mā tvā dabhan pariyāntamājiṃ svasti durgāmati yāhi śībham |divaṃ ca sūrya pṛthivīṃ ca devīmahorātre vimimāno yadeṣi ||5||
स्वस्ति ते सूर्य चरसे रथाय येनोभावन्तौ परियासि सद्यः ।यं ते वहन्ति हरितो वहिष्ठाः शतमश्वा यदि वा सप्त बह्वीः ॥६॥
svasti te sūrya carase rathāya yenobhāvantau pariyāsi sadyaḥ |yaṃ te vahanti harito vahiṣṭhāḥ śatamaśvā yadi vā sapta bahvīḥ ||6||
सुखं सूर्य रथमंशुमन्तं स्योनं सुवह्निमधि तिष्ठ वाजिनम् ।यं ते वहन्ति हरितो वहिष्ठाः शतमश्वा यदि वा सप्त बह्वीः ॥७॥
sukhaṃ sūrya rathamaṃśumantaṃ syonaṃ suvahnimadhi tiṣṭha vājinam |yaṃ te vahanti harito vahiṣṭhāḥ śatamaśvā yadi vā sapta bahvīḥ ||7||
सप्त सूर्यो हरितो यातवे रथे हिरण्यत्वचसो बृहतीरयुक्त ।अमोचि शुक्रो रजसः परस्ताद्विधूय देवस्तमो दिवमारुहत्॥८॥
sapta sūryo harito yātave rathe hiraṇyatvacaso bṛhatīrayukta |amoci śukro rajasaḥ parastādvidhūya devastamo divamāruhat||8||
उत्केतुना बृहता देव आगन्न् अपावृक्तमोऽभि ज्योतिरश्रैत्।दिव्यः सुपर्णः स वीरो व्यख्यददितेः पुत्रो भुवनानि विश्वा ॥९॥
utketunā bṛhatā deva āgann apāvṛktamo'bhi jyotiraśrait|divyaḥ suparṇaḥ sa vīro vyakhyadaditeḥ putro bhuvanāni viśvā ||9||
उद्यन् रश्मीन् आ तनुषे विश्वा रुपाणि पुष्यसि ।उभा समुद्रौ क्रतुना वि भासि सर्वांल्लोकान् परिभूर्भ्राजमानः ॥१०॥ {७}
udyan raśmīn ā tanuṣe viśvā rupāṇi puṣyasi |ubhā samudrau kratunā vi bhāsi sarvāṃllokān paribhūrbhrājamānaḥ ||10|| {7}
पूर्वापरं चरतो माययैतौ शिशू क्रीडन्तौ परि यातोऽर्णवम् ।विश्वान्यो भुवना विचष्टे हैरण्यैरन्यं हरितो वहन्ति ॥११॥
pūrvāparaṃ carato māyayaitau śiśū krīḍantau pari yāto'rṇavam |viśvānyo bhuvanā vicaṣṭe hairaṇyairanyaṃ harito vahanti ||11||
दिवि त्वात्त्रिरधारयत्सूर्या मासाय कर्तवे ।स एषि सुधृतस्तपन् विश्वा भूतावचाकशत्॥१२॥
divi tvāttriradhārayatsūryā māsāya kartave |sa eṣi sudhṛtastapan viśvā bhūtāvacākaśat||12||
उभावन्तौ समर्षसि वत्सः संमातराविव ।नन्वेतदितः पुरा ब्रह्म देवा अमी विदुः ॥१३॥
ubhāvantau samarṣasi vatsaḥ saṃmātarāviva |nanvetaditaḥ purā brahma devā amī viduḥ ||13||
यत्समुद्रमनु श्रितं तत्सिषासति सूर्यः ।अध्वास्य विततो महान् पूर्वश्चापरश्च यः ॥१४॥
yatsamudramanu śritaṃ tatsiṣāsati sūryaḥ |adhvāsya vitato mahān pūrvaścāparaśca yaḥ ||14||
तं समाप्नोति जूतिभिस्ततो नाप चिकित्सति ।तेनामृतस्य भक्षं देवानां नाव रुन्धते ॥१५॥
taṃ samāpnoti jūtibhistato nāpa cikitsati |tenāmṛtasya bhakṣaṃ devānāṃ nāva rundhate ||15||
उदु त्यं जातवेदसं देवं वहन्ति केतवः ।दृशे विश्वाय सूर्यम् ॥१६॥
udu tyaṃ jātavedasaṃ devaṃ vahanti ketavaḥ |dṛśe viśvāya sūryam ||16||
अप त्ये तायवो यथा नक्षत्रा यन्त्यक्तुभिः ।सूराय विश्वचक्षसे ॥१७॥
apa tye tāyavo yathā nakṣatrā yantyaktubhiḥ |sūrāya viśvacakṣase ||17||
अदृश्रन्न् अस्य केतवो वि रश्मयो जनामनु ।भ्राजन्तो अग्नयो यथा ॥१८॥
adṛśrann asya ketavo vi raśmayo janāmanu |bhrājanto agnayo yathā ||18||
तरणिर्विश्वदर्शतो ज्योतिष्कृदसि सूर्य ।विश्वमा भासि रोचन ॥१९॥
taraṇirviśvadarśato jyotiṣkṛdasi sūrya |viśvamā bhāsi rocana ||19||
प्रत्यङ्देवानां विशः प्रत्यङ्ङुदेषि मानुषीः ।प्रत्यङ्विश्वं स्वर्दृशे ॥२०॥ {८}
pratyaṅdevānāṃ viśaḥ pratyaṅṅudeṣi mānuṣīḥ |pratyaṅviśvaṃ svardṛśe ||20|| {8}
येना पावक चक्षसा भुरण्यन्तं जनामनु ।त्वं वरुण पश्यसि ॥२१॥
yenā pāvaka cakṣasā bhuraṇyantaṃ janāmanu |tvaṃ varuṇa paśyasi ||21||
वि द्यामेषि रजस्पृथ्वहर्मिमानो अक्तुभिः ।पश्यन् जन्मानि सूर्य ॥२२॥
vi dyāmeṣi rajaspṛthvaharmimāno aktubhiḥ |paśyan janmāni sūrya ||22||
सप्त त्वा हरितो रथे वहन्ति देव सूर्य ।शोचिष्केशं विचक्षणम् ॥२३॥
sapta tvā harito rathe vahanti deva sūrya |śociṣkeśaṃ vicakṣaṇam ||23||
अयुक्त सप्त शुन्ध्युवः सूरो रथस्य नप्त्यः ।ताभिर्याति स्वयुक्तिभिः ॥२४॥
ayukta sapta śundhyuvaḥ sūro rathasya naptyaḥ |tābhiryāti svayuktibhiḥ ||24||
रोहितो दिवमारुहत्तपसा तपस्वी ।स योनिमैति स उ जायते पुनः स देवानामधिपतिर्बभूव ॥२५॥
rohito divamāruhattapasā tapasvī |sa yonimaiti sa u jāyate punaḥ sa devānāmadhipatirbabhūva ||25||
यो विश्वचर्षणिरुत विश्वतोमुखो यो विश्वतस्पाणिरुत विश्वतस्पृथः ।सं बाहुभ्यां भरति सं पतत्रैर्द्यावापृथिवी जनयन् देव एकः ॥२६॥
yo viśvacarṣaṇiruta viśvatomukho yo viśvataspāṇiruta viśvataspṛthaḥ |saṃ bāhubhyāṃ bharati saṃ patatrairdyāvāpṛthivī janayan deva ekaḥ ||26||
एकपाद्द्विपदो भूयो वि चक्रमे द्विपात्त्रिपादमभ्येति पश्चात्।द्विपाद्ध षट्पदो भूयो वि चक्रमे त एकपदस्तन्वं समासते ॥२७॥
ekapāddvipado bhūyo vi cakrame dvipāttripādamabhyeti paścāt|dvipāddha ṣaṭpado bhūyo vi cakrame ta ekapadastanvaṃ samāsate ||27||
अतन्द्रो यास्यन् हरितो यदास्थाद्द्वे रूपे कृणुते रोचमानः ।केतुमान् उद्यन्त्सहमानो रजांसि विश्वा आदित्य प्रवतो वि भासि ॥२८॥
atandro yāsyan harito yadāsthāddve rūpe kṛṇute rocamānaḥ |ketumān udyantsahamāno rajāṃsi viśvā āditya pravato vi bhāsi ||28||
बण्महामसि सूर्य बडादित्य महामसि ।महांस्ते महतो महिमा त्वमादित्य महामसि ॥२९॥
baṇmahāmasi sūrya baḍāditya mahāmasi |mahāṃste mahato mahimā tvamāditya mahāmasi ||29||
रोचसे दिवि रोचसे अन्तरिक्षे पतङ्ग पृथिव्यां रोचसे रोचसे अप्स्वन्तः ।उभा समुद्रौ रुच्या व्यापिथ देवो देवासि महिषः स्वर्जित्॥३०॥ {९}
rocase divi rocase antarikṣe pataṅga pṛthivyāṃ rocase rocase apsvantaḥ |ubhā samudrau rucyā vyāpitha devo devāsi mahiṣaḥ svarjit||30|| {9}
अर्वाङ्परस्तात्प्रयतो व्यध्व आशुर्विपश्चित्पतयन् पतङ्गः ।विष्णुर्विचित्तः शवसाधितिष्ठन् प्र केतुना सहते विश्वमेजत्॥३१॥
arvāṅparastātprayato vyadhva āśurvipaścitpatayan pataṅgaḥ |viṣṇurvicittaḥ śavasādhitiṣṭhan pra ketunā sahate viśvamejat||31||
चित्राश्चिकित्वान् महिषः सुपर्ण आरोचयन् रोदसी अन्तरिक्षम् ।अहोरात्रे परि सूर्यं वसाने प्रास्य विश्वा तिरतो वीर्याणि ॥३२॥
citrāścikitvān mahiṣaḥ suparṇa ārocayan rodasī antarikṣam |ahorātre pari sūryaṃ vasāne prāsya viśvā tirato vīryāṇi ||32||
तिग्मो विभ्राजन् तन्वं शिशानोऽरंगमासः प्रवतो रराणः ।ज्योतिष्मान् पक्षी महिषो वयोधा विश्वा आस्थात्प्रदिशः कल्पमानः ॥३३॥
tigmo vibhrājan tanvaṃ śiśāno'raṃgamāsaḥ pravato rarāṇaḥ |jyotiṣmān pakṣī mahiṣo vayodhā viśvā āsthātpradiśaḥ kalpamānaḥ ||33||
चित्रं देवानां केतुरनीकं ज्योतिष्मान् प्रदिशः सूर्य उद्यन् ।दिवाकरोऽति द्युम्नैस्तमांसि विश्वातारीद्दुरितानि शुक्रः ॥३४॥
citraṃ devānāṃ keturanīkaṃ jyotiṣmān pradiśaḥ sūrya udyan |divākaro'ti dyumnaistamāṃsi viśvātārīdduritāni śukraḥ ||34||
चित्रं देवानामुदगादनीकं चक्षुर्मित्रस्य वरुणस्याग्नेः ।आप्राद्द्यावापृथिवी अन्तरिक्षं सूर्य आत्मा जगतस्तस्थुषश्च ॥३५॥
citraṃ devānāmudagādanīkaṃ cakṣurmitrasya varuṇasyāgneḥ |āprāddyāvāpṛthivī antarikṣaṃ sūrya ātmā jagatastasthuṣaśca ||35||
उच्चा पतन्तमरुणं सुपर्णं मध्ये दिवस्तरणिं भ्राजमानम् ।पश्यम त्वा सवितारं यमाहुरजस्रं ज्योतिर्यदविन्ददत्त्रिः ॥३६॥
uccā patantamaruṇaṃ suparṇaṃ madhye divastaraṇiṃ bhrājamānam |paśyama tvā savitāraṃ yamāhurajasraṃ jyotiryadavindadattriḥ ||36||
दिवस्पृष्ठे धावमानं सुपर्णमदित्याः पुत्रं नाथकाम उप यामि भीतः ।स नः सूर्य प्र तिर दीर्घमायुर्मा रिषाम सुमतौ ते स्याम ॥३७॥
divaspṛṣṭhe dhāvamānaṃ suparṇamadityāḥ putraṃ nāthakāma upa yāmi bhītaḥ |sa naḥ sūrya pra tira dīrghamāyurmā riṣāma sumatau te syāma ||37||
सहस्राह्ण्यं वियतावस्य पक्षौ हरेर्हंसस्य पततः स्वर्गम् ।स देवान्त्सर्वान् उरस्युपदद्य संपश्यन् याति भुवनानि विश्वा ॥३८॥
sahasrāhṇyaṃ viyatāvasya pakṣau harerhaṃsasya patataḥ svargam |sa devāntsarvān urasyupadadya saṃpaśyan yāti bhuvanāni viśvā ||38||
रोहितः कालो अभवद्रोहितोऽग्रे प्रजापतिः ।रोहितो यज्ञानां मुखं रोहितः स्वराभरत्॥३९॥
rohitaḥ kālo abhavadrohito'gre prajāpatiḥ |rohito yajñānāṃ mukhaṃ rohitaḥ svarābharat||39||
रोहितो लोको अभवद्रोहितोऽत्यतपद्दिवम् ।रोहितो रश्मिभिर्भूमिं समुद्रमनु सं चरत्॥४०॥ {१०}
rohito loko abhavadrohito'tyatapaddivam |rohito raśmibhirbhūmiṃ samudramanu saṃ carat||40|| {10}
सर्वा दिशः समचरद्रोहितोऽधिपतिर्दिवः ।दिवं समुद्रमाद्भूमिं सर्वं भूतं वि रक्षति ॥४१॥
sarvā diśaḥ samacaradrohito'dhipatirdivaḥ |divaṃ samudramādbhūmiṃ sarvaṃ bhūtaṃ vi rakṣati ||41||
आरोहन् छुक्रो बृहतीरतन्द्रो द्वे रूपे कृणुते रोचमानः ।चित्रश्चिकित्वान् महिषो वातमाया यावतो लोकान् अभि यद्विभाति ॥४२॥
ārohan chukro bṛhatīratandro dve rūpe kṛṇute rocamānaḥ |citraścikitvān mahiṣo vātamāyā yāvato lokān abhi yadvibhāti ||42||
अभ्यन्यदेति पर्यन्यदस्यतेऽहोरात्राभ्यां महिषः कल्पमानः ।सूर्यं वयं रजसि क्षियन्तं गातुविदं हवामहे नाधमानाः ॥४३॥
abhyanyadeti paryanyadasyate'horātrābhyāṃ mahiṣaḥ kalpamānaḥ |sūryaṃ vayaṃ rajasi kṣiyantaṃ gātuvidaṃ havāmahe nādhamānāḥ ||43||
पृथिवीप्रो महिषो नाधमानस्य गातुरदब्धचक्षुः परि विश्वं बभूव ।विश्वं संपश्यन्त्सुविदत्रो यजत्र इदं शृणोतु यदहं ब्रवीमि ॥४४॥
pṛthivīpro mahiṣo nādhamānasya gāturadabdhacakṣuḥ pari viśvaṃ babhūva |viśvaṃ saṃpaśyantsuvidatro yajatra idaṃ śṛṇotu yadahaṃ bravīmi ||44||
पर्यस्य महिमा पृथिवीं समुद्रं ज्योतिषा विभ्राजन् परि द्यामन्तरिक्षम् ।सर्वं संपश्यन्त्सुविदत्रो यजत्र इदं शृणोतु यदहं ब्रवीमि ॥४५॥
paryasya mahimā pṛthivīṃ samudraṃ jyotiṣā vibhrājan pari dyāmantarikṣam |sarvaṃ saṃpaśyantsuvidatro yajatra idaṃ śṛṇotu yadahaṃ bravīmi ||45||
अबोध्यग्निः समिधा जनानां प्रति धेनुमिवायतीमुषासम् ।यह्वा इव प्र वयामुज्जिहानाः प्र भानवः सिस्रते नाकमच्छ ॥४६॥ {११}
abodhyagniḥ samidhā janānāṃ prati dhenumivāyatīmuṣāsam |yahvā iva pra vayāmujjihānāḥ pra bhānavaḥ sisrate nākamaccha ||46|| {11}
AnonymousUser
150
5 Days
Learn
Teach
Discuss
Panchanga
Dashboard
Verses & Playlist
Flashcards
Saved Chants
Saved Discussions
Logout
Copy Shloka
Shloka Link
