Gyaandweep | Atharva Veda , Kanda 15, Sukta 10

तद्यस्यैवं विद्वान् व्रात्यो राज्ञोऽतिथिर्गृहान् आगछेत्॥१॥

tadyasyaivaṃ vidvān vrātyo rājño'tithirgṛhān āgachet||1||

श्रेयांसमेनमात्मनो मानयेत्तथा क्षत्राय ना वृश्चते तथा राष्ट्राय ना वृश्चते ॥२॥

śreyāṃsamenamātmano mānayettathā kṣatrāya nā vṛścate tathā rāṣṭrāya nā vṛścate ||

अतो वै ब्रह्म च क्षत्रं चोदतिष्ठतां ते अब्रूतां कं प्र विशावेति ॥३॥

ato vai brahma ca kṣatraṃ codatiṣṭhatāṃ te abrūtāṃ kaṃ pra viśāveti ||3||

बृहस्पतिमेव ब्रह्म प्रविशत्विन्द्रं क्षत्रं तथा वा इति ॥४॥

bṛhaspatimeva brahma praviśatvindraṃ kṣatraṃ tathā vā iti ||4||

अतो वै बृहस्पतिमेव ब्रह्म प्राविशदिन्द्रं क्षत्रम् ॥५॥

ato vai bṛhaspatimeva brahma prāviśadindraṃ kṣatram ||5||

इयं वा उ पृथिवी बृहस्पतिर्द्यौरेवेन्द्रः ॥६॥

iyaṃ vā u pṛthivī bṛhaspatirdyaurevendraḥ ||6||

अयं वा उ अग्निर्ब्रह्मासावादित्यः क्षत्रम् ॥७॥

ayaṃ vā u agnirbrahmāsāvādityaḥ kṣatram ||7||

ऐनं ब्रह्म गच्छति ब्रह्मवर्चसी भवति ॥८॥

ainaṃ brahma gacchati brahmavarcasī bhavati ||8||

यः पृथिवीं बृहस्पतिमग्निं ब्रह्म वेद ॥९॥

yaḥ pṛthivīṃ bṛhaspatimagniṃ brahma veda ||9||

ऐनमिन्द्रियं गच्छतीन्द्रियवान् भवति ॥१०॥

ainamindriyaṃ gacchatīndriyavān bhavati ||10||

य आदित्यं क्षत्रं दिवमिन्द्रं वेद ॥११॥

ya ādityaṃ kṣatraṃ divamindraṃ veda ||11||

Languages