| |
|

This overlay will guide you through the buttons:

Sukta 1
विषासहिं सहमानं सासहानं सहीयांसम् ।सहमानं सहोजितं स्वर्जितं गोजितं संधनाजितम् ।ईड्यं नाम ह्व इन्द्रमायुष्मान् भूयासम् ॥१॥
viṣāsahiṃ sahamānaṃ sāsahānaṃ sahīyāṃsam .sahamānaṃ sahojitaṃ svarjitaṃ gojitaṃ saṃdhanājitam .īḍyaṃ nāma hva indramāyuṣmān bhūyāsam ..1..

Sukta 2
विषासहिं सहमानं सासहानं सहीयांसम् ।सहमानं सहोजितं स्वर्जितं गोजितं संधनाजितम् ।ईड्यं नाम ह्व इन्द्रं प्रियो देवानां भूयासम् ॥२॥
viṣāsahiṃ sahamānaṃ sāsahānaṃ sahīyāṃsam .sahamānaṃ sahojitaṃ svarjitaṃ gojitaṃ saṃdhanājitam .īḍyaṃ nāma hva indraṃ priyo devānāṃ bhūyāsam ..2..

Sukta 3
विषासहिं सहमानं सासहानं सहीयांसम् ।सहमानं सहोजितं स्वर्जितं गोजितं संधनाजितम् ।ईड्यं नाम ह्व इन्द्रं प्रियः प्रजानां भूयासम् ॥३॥
viṣāsahiṃ sahamānaṃ sāsahānaṃ sahīyāṃsam .sahamānaṃ sahojitaṃ svarjitaṃ gojitaṃ saṃdhanājitam .īḍyaṃ nāma hva indraṃ priyaḥ prajānāṃ bhūyāsam ..3..

Sukta 4
विषासहिं सहमानं सासहानं सहीयांसम् ।सहमानं सहोजितं स्वर्जितं गोजितं संधनाजितम् ।ईड्यं नाम ह्व इन्द्रं प्रियः पशूनां भूयासम् ॥४॥
viṣāsahiṃ sahamānaṃ sāsahānaṃ sahīyāṃsam .sahamānaṃ sahojitaṃ svarjitaṃ gojitaṃ saṃdhanājitam .īḍyaṃ nāma hva indraṃ priyaḥ paśūnāṃ bhūyāsam ..4..

Sukta 5
विषासहिं सहमानं सासहानं सहीयांसम् ।सहमानं सहोजितं स्वर्जितं गोजितं संधनाजितम् ।ईड्यं नाम ह्व इन्द्रं प्रियः समानानां भूयासम् ॥५॥
viṣāsahiṃ sahamānaṃ sāsahānaṃ sahīyāṃsam .sahamānaṃ sahojitaṃ svarjitaṃ gojitaṃ saṃdhanājitam .īḍyaṃ nāma hva indraṃ priyaḥ samānānāṃ bhūyāsam ..5..

Sukta 6
उदिह्युदिहि सूर्य वर्चसा माभ्युदिहि ।द्विषंश्च मह्यं रध्यतु मा चाहं द्विषते रधं तवेद्विष्णो बहुधा वीर्याणि ।त्वं नः पृणीहि पशुभिर्विश्वरूपैः सुधायां मा धेहि परमे व्योमन् ॥६॥
udihyudihi sūrya varcasā mābhyudihi .dviṣaṃśca mahyaṃ radhyatu mā cāhaṃ dviṣate radhaṃ tavedviṣṇo bahudhā vīryāṇi .tvaṃ naḥ pṛṇīhi paśubhirviśvarūpaiḥ sudhāyāṃ mā dhehi parame vyoman ..6..

Sukta 7
उदिह्युदिहि सूर्य वर्चसा माभ्युदिहि ।आंश्च पश्यामि यांश्च न तेषु मा सुमतिं कृधि तवेद्विष्णो बहुधा वीर्याणि ।त्वं नः पृणीहि पशुभिर्विश्वरूपैः सुधायां मा धेहि परमे व्योमन् ॥७॥
udihyudihi sūrya varcasā mābhyudihi .āṃśca paśyāmi yāṃśca na teṣu mā sumatiṃ kṛdhi tavedviṣṇo bahudhā vīryāṇi .tvaṃ naḥ pṛṇīhi paśubhirviśvarūpaiḥ sudhāyāṃ mā dhehi parame vyoman ..7..

Sukta 8
मा त्वा दभन्त्सलिले अप्स्वन्तर्ये पाशिन उपतिष्ठन्त्यत्र ।हित्वाशस्तिं दिवमारुक्ष एतां स नो मृड सुमतौ ते स्याम तवेद्विष्णो बहुधा वीर्याणि ।त्वं नः पृणीहि पशुभिर्विश्वरूपैः सुधायां मा धेहि परमे व्योमन् ॥८॥
mā tvā dabhantsalile apsvantarye pāśina upatiṣṭhantyatra .hitvāśastiṃ divamārukṣa etāṃ sa no mṛḍa sumatau te syāma tavedviṣṇo bahudhā vīryāṇi .tvaṃ naḥ pṛṇīhi paśubhirviśvarūpaiḥ sudhāyāṃ mā dhehi parame vyoman ..8..

Sukta 9
त्वं न इन्द्र महते सौभगायादब्धेभिः परि पाह्यक्तुभिस्तवेद्विष्णो बहुधा वीर्याणि ।त्वं नः पृणीहि पशुभिर्विश्वरूपैः सुधायां मा धेहि परमे व्योमन् ॥९॥
tvaṃ na indra mahate saubhagāyādabdhebhiḥ pari pāhyaktubhistavedviṣṇo bahudhā vīryāṇi .tvaṃ naḥ pṛṇīhi paśubhirviśvarūpaiḥ sudhāyāṃ mā dhehi parame vyoman ..9..

Sukta 10
त्वं न इन्द्रोतिभिः शिवाभिः शंतमो भव ।आरोहंस्त्रिदिवं दिवो गृणानः सोमपीतये प्रियधामा स्वस्तये तवेद्विष्णो बहुधा वीर्याणि ।त्वं नः पृणीहि पशुभिर्विश्वरूपैः सुधायां मा धेहि परमे व्योमन् ॥१०॥ {१}
tvaṃ na indrotibhiḥ śivābhiḥ śaṃtamo bhava .ārohaṃstridivaṃ divo gṛṇānaḥ somapītaye priyadhāmā svastaye tavedviṣṇo bahudhā vīryāṇi .tvaṃ naḥ pṛṇīhi paśubhirviśvarūpaiḥ sudhāyāṃ mā dhehi parame vyoman ..10.. {1}

Sukta 11
त्वमिन्द्रासि विश्वजित्सर्ववित्पुरुहूतस्त्वमिन्द्र ।त्वमिन्द्रेमं सुहवं स्तोममेरयस्व स नो मृड सुमतौ ते स्याम तवेद्विष्णो बहुधा वीर्याणि ।त्वं नः पृणीहि पशुभिर्विश्वरूपैः सुधायां मा धेहि परमे व्योमन् ॥११॥
tvamindrāsi viśvajitsarvavitpuruhūtastvamindra .tvamindremaṃ suhavaṃ stomamerayasva sa no mṛḍa sumatau te syāma tavedviṣṇo bahudhā vīryāṇi .tvaṃ naḥ pṛṇīhi paśubhirviśvarūpaiḥ sudhāyāṃ mā dhehi parame vyoman ..11..

Sukta 12
अदब्धो दिवि पृथिव्यामुतासि न त आपुर्महिमानमन्तरिक्षे ।अदब्धेन ब्रह्मणा वावृधानः स त्वं न इन्द्र दिवि षं छर्म यच्छ तवेद्विष्णो बहुधा वीर्याणि ।त्वं नः पृणीहि पशुभिर्विश्वरूपैः सुधायां मा धेहि परमे व्योमन् ॥१२॥
adabdho divi pṛthivyāmutāsi na ta āpurmahimānamantarikṣe .adabdhena brahmaṇā vāvṛdhānaḥ sa tvaṃ na indra divi ṣaṃ charma yaccha tavedviṣṇo bahudhā vīryāṇi .tvaṃ naḥ pṛṇīhi paśubhirviśvarūpaiḥ sudhāyāṃ mā dhehi parame vyoman ..12..

Sukta 13
या त इन्द्र तनूरप्सु या पृथिव्यां यान्तरग्नौ या ते इन्द्र पवमाने स्वर्विदि ।ययेन्द्र तन्वाऽन्तरिक्षं व्यापिथ तया न इन्द्र तन्वा शर्म यच्छ तवेद्विष्णो बहुधा वीर्याणि ।त्वं नः पृणीहि पशुभिर्विश्वरूपैः सुधायां मा धेहि परमे व्योमन् ॥१३॥
yā ta indra tanūrapsu yā pṛthivyāṃ yāntaragnau yā te indra pavamāne svarvidi .yayendra tanvā'ntarikṣaṃ vyāpitha tayā na indra tanvā śarma yaccha tavedviṣṇo bahudhā vīryāṇi .tvaṃ naḥ pṛṇīhi paśubhirviśvarūpaiḥ sudhāyāṃ mā dhehi parame vyoman ..13..

Sukta 14
त्वामिन्द्र ब्रह्मणा वर्धयन्तः सत्त्रं नि षेदुर्ऋषयो नाधमानास्तवेद्विष्णो बहुधा वीर्याणि ।त्वं नः पृणीहि पशुभिर्विश्वरूपैः सुधायां मा धेहि परमे व्योमन् ॥१४॥
tvāmindra brahmaṇā vardhayantaḥ sattraṃ ni ṣedurṛṣayo nādhamānāstavedviṣṇo bahudhā vīryāṇi .tvaṃ naḥ pṛṇīhi paśubhirviśvarūpaiḥ sudhāyāṃ mā dhehi parame vyoman ..14..

Sukta 15
त्वं तृतं त्वं पर्येष्युत्सं सहस्रधारं विदथं स्वर्विदं तवेद्विष्णो बहुधा वीर्याणि ।त्वं नः पृणीहि पशुभिर्विश्वरूपैः सुधायां मा धेहि परमे व्योमन् ॥१५॥
tvaṃ tṛtaṃ tvaṃ paryeṣyutsaṃ sahasradhāraṃ vidathaṃ svarvidaṃ tavedviṣṇo bahudhā vīryāṇi .tvaṃ naḥ pṛṇīhi paśubhirviśvarūpaiḥ sudhāyāṃ mā dhehi parame vyoman ..15..

Sukta 16
त्वं रक्षसे प्रदिशश्चतस्रस्त्वं शोचिषा नभसी वि भासि ।त्वमिमा विश्वा भुवनानु तिष्ठस ऋतस्य पन्थामन्वेषि विद्वांस्तवेद्विष्णो बहुधा वीर्याणि ।त्वं नः पृणीहि पशुभिर्विश्वरूपैः सुधायां मा धेहि परमे व्योमन् ॥१६॥
tvaṃ rakṣase pradiśaścatasrastvaṃ śociṣā nabhasī vi bhāsi .tvamimā viśvā bhuvanānu tiṣṭhasa ṛtasya panthāmanveṣi vidvāṃstavedviṣṇo bahudhā vīryāṇi .tvaṃ naḥ pṛṇīhi paśubhirviśvarūpaiḥ sudhāyāṃ mā dhehi parame vyoman ..16..

Sukta 17
पञ्चभिः पराङ्तपस्येकयार्वाङशस्तिमेषि सुदिने बाधमानस्तवेद्विष्णो बहुधा वीर्याणि ।त्वं नः पृणीहि पशुभिर्विश्वरूपैः सुधायां मा धेहि परमे व्योमन् ॥१७॥
pañcabhiḥ parāṅtapasyekayārvāṅaśastimeṣi sudine bādhamānastavedviṣṇo bahudhā vīryāṇi .tvaṃ naḥ pṛṇīhi paśubhirviśvarūpaiḥ sudhāyāṃ mā dhehi parame vyoman ..17..

Sukta 18
त्वमिन्द्रस्त्वं महेन्द्रस्त्वं लोकस्त्वं प्रजापतिः ।तुभ्यं यज्ञो वि तायते तुभ्यं जुह्वति जुह्वतस्तवेद्विष्णो बहुधा वीर्याणि ।त्वं नः पृणीहि पशुभिर्विश्वरूपैः सुधायां मा धेहि परमे व्योमन् ॥१८॥
tvamindrastvaṃ mahendrastvaṃ lokastvaṃ prajāpatiḥ .tubhyaṃ yajño vi tāyate tubhyaṃ juhvati juhvatastavedviṣṇo bahudhā vīryāṇi .tvaṃ naḥ pṛṇīhi paśubhirviśvarūpaiḥ sudhāyāṃ mā dhehi parame vyoman ..18..

Sukta 19
असति सत्प्रतिष्ठितं सति भूतं प्रतिष्ठितम् ।भूतं ह भव्य आहितं भव्यं भूते प्रतिष्ठितं तवेद्विष्णो बहुधा वीर्याणि ।त्वं नः पृणीहि पशुभिर्विश्वरूपैः सुधायां मा धेहि परमे व्योमन् ॥१९॥
asati satpratiṣṭhitaṃ sati bhūtaṃ pratiṣṭhitam .bhūtaṃ ha bhavya āhitaṃ bhavyaṃ bhūte pratiṣṭhitaṃ tavedviṣṇo bahudhā vīryāṇi .tvaṃ naḥ pṛṇīhi paśubhirviśvarūpaiḥ sudhāyāṃ mā dhehi parame vyoman ..19..

Sukta 20
शुक्रोऽसि भ्राजोऽसि ।स यथा त्वं भ्राजता भ्राजोऽस्येवाहं भ्राजता भ्राज्यासम् ॥२०॥ {२}
śukro'si bhrājo'si .sa yathā tvaṃ bhrājatā bhrājo'syevāhaṃ bhrājatā bhrājyāsam ..20.. {2}

Sukta 21
रुचिरसि रोचोऽसि ।स यथा त्वं रुच्या रोचोऽस्येवाहं पशुभिश्च ब्राह्मणवर्चसेन च रुचिषीय ॥२१॥
rucirasi roco'si .sa yathā tvaṃ rucyā roco'syevāhaṃ paśubhiśca brāhmaṇavarcasena ca ruciṣīya ..21..

Sukta 22
उद्यते नम उदायते नम उदिताय नमः ।विराजे नमः स्वराजे नमः सम्राजे नमः ॥२२॥
udyate nama udāyate nama uditāya namaḥ .virāje namaḥ svarāje namaḥ samrāje namaḥ ..22..

Sukta 23
अस्तंयते नमोऽस्तमेष्यते नमोऽस्तमिताय नमः ।विराजे नमः स्वराजे नमः सम्राजे नमः ॥२३॥
astaṃyate namo'stameṣyate namo'stamitāya namaḥ .virāje namaḥ svarāje namaḥ samrāje namaḥ ..23..

Sukta 24
उदगादयमादित्यो विश्वेन तपसा सह ।सपत्नान् मह्यं रन्धयन् मा चाहं द्विषते रधं तवेद्विष्णो बहुधा वीर्याणि ।त्वं नः पृणीहि पशुभिर्विश्वरूपैः सुधायां मा धेहि परमे व्योमन् ॥२४॥
udagādayamādityo viśvena tapasā saha .sapatnān mahyaṃ randhayan mā cāhaṃ dviṣate radhaṃ tavedviṣṇo bahudhā vīryāṇi .tvaṃ naḥ pṛṇīhi paśubhirviśvarūpaiḥ sudhāyāṃ mā dhehi parame vyoman ..24..

Sukta 25
आदित्य नावमारुक्षः शतारित्रां स्वस्तये ।अहर्मात्यपीपरो रात्रिं सत्राति पारय ॥२५॥
āditya nāvamārukṣaḥ śatāritrāṃ svastaye .aharmātyapīparo rātriṃ satrāti pāraya ..25..

Sukta 26
सूर्य नावमारुक्षः शतारित्रां स्वस्तये ।रात्रिं मात्यपीपरोऽहः सत्राति पारय ॥२६॥
sūrya nāvamārukṣaḥ śatāritrāṃ svastaye .rātriṃ mātyapīparo'haḥ satrāti pāraya ..26..

Sukta 27
प्रजापतेरावृतो ब्रह्मणा वर्मणाहं कश्यपस्य ज्योतिषा वर्चसा च ।जरदष्टिः कृतवीर्यो विहायाः सहस्रायुः सुकृतश्चरेयम् ॥२७॥
prajāpaterāvṛto brahmaṇā varmaṇāhaṃ kaśyapasya jyotiṣā varcasā ca .jaradaṣṭiḥ kṛtavīryo vihāyāḥ sahasrāyuḥ sukṛtaścareyam ..27..

Sukta 28
परिवृतो ब्रह्मणा वर्मणाहं कश्यपस्य ज्योतिषा वर्चसा च ।मा मा प्रापन्न् इषवो दैव्या या मा मानुषीरवसृष्टाः वधाय ॥२८॥
parivṛto brahmaṇā varmaṇāhaṃ kaśyapasya jyotiṣā varcasā ca .mā mā prāpann iṣavo daivyā yā mā mānuṣīravasṛṣṭāḥ vadhāya ..28..

Sukta 29
ऋतेन गुप्त ऋतुभिश्च सर्वैर्भूतेन गुप्तो भव्येन चाहम् ।मा मा प्रापत्पाप्मा मोत मृत्युरन्तर्दधेऽहं सलिलेन वाचः ॥२९॥
ṛtena gupta ṛtubhiśca sarvairbhūtena gupto bhavyena cāham .mā mā prāpatpāpmā mota mṛtyurantardadhe'haṃ salilena vācaḥ ..29..

Sukta 30
अग्निर्मा गोप्ता परि पातु विश्वतः उद्यन्त्सूर्यो नुदतां मृत्युपाशान् ।व्युच्छन्तीरुषसः पर्वता ध्रुवाः सहस्रं प्राणा मय्या यतन्ताम् ॥३०॥ {३}
agnirmā goptā pari pātu viśvataḥ udyantsūryo nudatāṃ mṛtyupāśān .vyucchantīruṣasaḥ parvatā dhruvāḥ sahasraṃ prāṇā mayyā yatantām ..30.. {3}

Add to Playlist

Practice Later

No Playlist Found

Create a Verse Post


namo namaḥ!

भाषा चुने (Choose Language)

namo namaḥ!

Sign Up to practice more than 60 Vedic Scriptures and 100 of chants, one verse at a time.

Login to track your learning and teaching progress.


Sign In