Gyaandweep | Atharva Veda , Kanda 19, Sukta 24

येन देवं सवितारं परि देवा अधारयन् ।तेनेमं ब्रह्मणस्पते परि राष्ट्राय धत्तन ॥१॥

yena devaṃ savitāraṃ pari devā adhārayan |tenemaṃ brahmaṇaspate pari rāṣṭrāya dhattana ||1||

परीममिन्द्रमायुषे महे क्षत्राय धत्तन ।यथैनं जरसे नयाज्ज्योक्क्षत्रेऽधि जागरत्॥२॥

parīmamindramāyuṣe mahe kṣatrāya dhattana |yathainaṃ jarase nayājjyokkṣatre'dhi jāgarat||2||

परीममिन्द्रमायुषे महे श्रोत्राय धत्तन ।यथैनं जरसे नयाज्ज्योक्श्रोत्रेऽधि जागरत्॥३॥

parīmamindramāyuṣe mahe śrotrāya dhattana |yathainaṃ jarase nayājjyokśrotre'dhi jāgarat||3||

परि धत्त धत्त नो वर्चसेमं जरामृत्युं कृणुत दीर्घमायुः ।बृहस्पतिः प्रायच्छद्वास एतत्सोमाय राज्ञे परिधातवा उ ॥४॥

pari dhatta dhatta no varcasemaṃ jarāmṛtyuṃ kṛṇuta dīrghamāyuḥ |bṛhaspatiḥ prāyacchadvāsa etatsomāya rājñe paridhātavā u ||4||

जरां सु गच्छ परि धत्स्व वासो भवा गृष्टीनामभिशस्तिपा उ ।शतं च जीव शरदः पुरूची रायश्च पोषमुपसंव्ययस्व ॥५॥

jarāṃ su gaccha pari dhatsva vāso bhavā gṛṣṭīnāmabhiśastipā u |śataṃ ca jīva śaradaḥ purūcī rāyaśca poṣamupasaṃvyayasva ||5||

परीदं वासो अधिथाः स्वस्तयेऽभूर्वापीनामभिशस्तिपा उ ।शतं च जीव शरदः पुरूचीर्वसूनि चारुर्वि भजासि जीवन् ॥६॥

parīdaṃ vāso adhithāḥ svastaye'bhūrvāpīnāmabhiśastipā u |śataṃ ca jīva śaradaḥ purūcīrvasūni cārurvi bhajāsi jīvan ||6||

योगेयोगे तवस्तरं वाजेवाजे हवामहे ।सखाय इन्द्रमूतये ॥७॥

yogeyoge tavastaraṃ vājevāje havāmahe |sakhāya indramūtaye ||7||

हिरण्यवर्णो अजरः सुवीरो जरामृत्युः प्रजया सं विशस्व ।तदग्निराह तदु सोम आह बृहस्पतिः सविता तदिन्द्रः ॥८॥

hiraṇyavarṇo ajaraḥ suvīro jarāmṛtyuḥ prajayā saṃ viśasva |tadagnirāha tadu soma āha bṛhaspatiḥ savitā tadindraḥ ||8||

Languages