Gyaandweep | Atharva Veda , Kanda 19, Sukta 3

दिवस्पृथिव्याः पर्यन्तरिक्षाद्वनस्पतिभ्यो अध्योषधीभ्यः ।यत्रयत्र विभृतो जातवेदास्तत स्तुतो जुषमाणो न एहि ॥१॥

divaspṛthivyāḥ paryantarikṣādvanaspatibhyo adhyoṣadhībhyaḥ |yatrayatra vibhṛto jātavedāstata stuto juṣamāṇo na ehi ||1||

यस्ते अप्सु महिमा यो वनेषु य ओषधीषु पशुष्वप्स्वन्तः ।अग्ने सर्वास्तन्वः सं रभस्व ताभिर्न एहि द्रविणोदा अजस्रः ॥२॥

yaste apsu mahimā yo vaneṣu ya oṣadhīṣu paśuṣvapsvantaḥ |agne sarvāstanvaḥ saṃ rabhasva tābhirna ehi draviṇodā ajasraḥ ||2||

यस्ते देवेषु महिमा स्वर्गो या ते तनुः पितृष्वाविवेश ।पुष्टिर्या ते मनुष्येषु पप्रथेऽग्ने तया रयिमस्मासु धेहि ॥३॥

yaste deveṣu mahimā svargo yā te tanuḥ pitṛṣvāviveśa |puṣṭiryā te manuṣyeṣu paprathe'gne tayā rayimasmāsu dhehi ||3||

श्रुत्कर्णाय कवये वेद्याय वचोभिर्वाकैरुप यामि रातिम् ।यतो भयमभयं तन् नो अस्त्वव देवानां यज हेडो अग्ने ॥४॥

śrutkarṇāya kavaye vedyāya vacobhirvākairupa yāmi rātim |yato bhayamabhayaṃ tan no astvava devānāṃ yaja heḍo agne ||4||

Languages