Gyaandweep | Atharva Veda , Kanda 19, Sukta 36

शतवारो अनीनशद्यक्ष्मान् रक्षांसि तेजसा ।आरोहन् वर्चसा सह मणिर्दुर्णामचातनः ॥१॥

śatavāro anīnaśadyakṣmān rakṣāṃsi tejasā |ārohan varcasā saha maṇirdurṇāmacātanaḥ ||1||

शृङ्गाभ्यां रक्षो नुदते मूलेन यातुधान्यः ।मध्येन यक्ष्मं बाधते नैनं पाप्माति तत्रति ॥२॥

śṛṅgābhyāṃ rakṣo nudate mūlena yātudhānyaḥ |madhyena yakṣmaṃ bādhate nainaṃ pāpmāti tatrati ||2||

ये यक्ष्मासो अर्भका महान्तो ये च शब्दिनः ।सर्वां दुर्णामहा मणिः शतवारो अनीनशत्॥३॥

ye yakṣmāso arbhakā mahānto ye ca śabdinaḥ |sarvāṃ durṇāmahā maṇiḥ śatavāro anīnaśat||3||

शतं वीरान् अजनयच्छतं यक्ष्मान् अपावपत्।दुर्णाम्नः सर्वान् हत्वाव रक्षांसि धूनुते ॥४॥

śataṃ vīrān ajanayacchataṃ yakṣmān apāvapat|durṇāmnaḥ sarvān hatvāva rakṣāṃsi dhūnute ||4||

हिरण्यशृङ्ग ऋषभः शातवारो अयं मणिः ।दुर्णाम्नः सर्वांस्तृध्वाव रक्षांस्यक्रमीत्॥५॥

hiraṇyaśṛṅga ṛṣabhaḥ śātavāro ayaṃ maṇiḥ |durṇāmnaḥ sarvāṃstṛdhvāva rakṣāṃsyakramīt||5||

शतमहं दुर्णाम्नीनां गन्धर्वाप्सरसां शतम् ।शतं शश्वन्वतीनां शतवारेण वारये ॥६॥

śatamahaṃ durṇāmnīnāṃ gandharvāpsarasāṃ śatam |śataṃ śaśvanvatīnāṃ śatavāreṇa vāraye ||6||

Languages