Gyaandweep | Atharva Veda , Kanda 19, Sukta 45

ऋणादृणमिव सं नय कृत्यां कृत्याकृतो गृहम् ।चक्षुर्मन्त्रस्य दुर्हार्दः पृष्टीरपि शृणाञ्जन ॥१॥

ṛṇādṛṇamiva saṃ naya kṛtyāṃ kṛtyākṛto gṛham |cakṣurmantrasya durhārdaḥ pṛṣṭīrapi śṛṇāñjana ||1||

यदस्मासु दुष्वप्न्यं यद्गोषु यच्च नो गृहे ।अनामगस्तं च दुर्हार्दः प्रियः प्रति मुञ्चताम् ॥२॥

yadasmāsu duṣvapnyaṃ yadgoṣu yacca no gṛhe |anāmagastaṃ ca durhārdaḥ priyaḥ prati muñcatām ||2||

अपामूर्ज ओजसो वावृधानमग्नेर्जातमधि जातवेदसः ।चतुर्वीरं पर्वतीयं यदाञ्जनं दिशः प्रदिशः करदिच्छिवास्ते ॥३॥

apāmūrja ojaso vāvṛdhānamagnerjātamadhi jātavedasaḥ |caturvīraṃ parvatīyaṃ yadāñjanaṃ diśaḥ pradiśaḥ karadicchivāste ||3||

चतुर्वीरं बध्यत आञ्जनं ते सर्वा दिशो अभयास्ते भवन्तु ।ध्रुवस्तिष्ठासि सवितेव चार्य इमा विशो अभि हरन्तु ते बलिम् ॥४॥

caturvīraṃ badhyata āñjanaṃ te sarvā diśo abhayāste bhavantu |dhruvastiṣṭhāsi saviteva cārya imā viśo abhi harantu te balim ||4||

आक्ष्वैकं मणिमेकं क्र्णुष्व स्नाह्येकेना पिबैकमेषाम् ।चतुर्वीरं नैर्ऋतेभ्यश्चतुर्भ्यो ग्राह्या बन्धेभ्यः परि पात्वस्मान् ॥५॥

ākṣvaikaṃ maṇimekaṃ krṇuṣva snāhyekenā pibaikameṣām |caturvīraṃ nairṛtebhyaścaturbhyo grāhyā bandhebhyaḥ pari pātvasmān ||5||

अग्निर्माग्निनावतु प्राणायापानायायुषे वर्चस ओजसे ।तेजसे स्वस्तये सुभूतये स्वाहा ॥६॥

agnirmāgnināvatu prāṇāyāpānāyāyuṣe varcasa ojase |tejase svastaye subhūtaye svāhā ||6||

इन्द्रो मेन्द्रियेणावतु प्राणायापानायायुषे वर्चस ओजसे ।तेजसे स्वस्तये सुभूतये स्वाहा ॥७॥

indro mendriyeṇāvatu prāṇāyāpānāyāyuṣe varcasa ojase |tejase svastaye subhūtaye svāhā ||7||

सोमो मा सौम्येनावतु प्राणायापानायायुषे वर्चस ओजसे ।तेजसे स्वस्तये सुभूतये स्वाहा ॥८॥

somo mā saumyenāvatu prāṇāyāpānāyāyuṣe varcasa ojase |tejase svastaye subhūtaye svāhā ||8||

भगो मा भगेनावतु प्राणायापानायायुषे वर्चस ओजसे ।तेजसे स्वस्तये सुभूतये स्वाहा ॥९॥

bhago mā bhagenāvatu prāṇāyāpānāyāyuṣe varcasa ojase |tejase svastaye subhūtaye svāhā ||9||

मरुतो मा गणैरवन्तु प्राणायापानायुषे वर्चस ओजसे तेजसे ।स्वस्तये सुभूतये स्वाहा ॥१०॥

maruto mā gaṇairavantu prāṇāyāpānāyuṣe varcasa ojase tejase |svastaye subhūtaye svāhā ||10||

Languages