Gyaandweep | Atharva Veda , Kanda 19, Sukta 47

आ रात्रि पार्थिवं रजः पितुरप्रायि धामभिः ।दिवः सदांसि बृहती वि तिष्ठस आ त्वेषं वर्तते तमः ॥१॥

ā rātri pārthivaṃ rajaḥ pituraprāyi dhāmabhiḥ |divaḥ sadāṃsi bṛhatī vi tiṣṭhasa ā tveṣaṃ vartate tamaḥ ||1||

न यस्याः पारं ददृशे न योयुवद्विश्वमस्यां नि विशते यदेजति ।अरिष्टासस्त उर्वि तमस्वति रात्रि पारमशीमहि भद्रे पारमशीमहि ॥२॥

na yasyāḥ pāraṃ dadṛśe na yoyuvadviśvamasyāṃ ni viśate yadejati |ariṣṭāsasta urvi tamasvati rātri pāramaśīmahi bhadre pāramaśīmahi ||2||

ये ते रात्रि नृचक्षसो द्रष्टारो नवतिर्नव ।अशीतिः सन्त्यष्टा उतो ते सप्त सप्ततिः ॥३॥

ye te rātri nṛcakṣaso draṣṭāro navatirnava |aśītiḥ santyaṣṭā uto te sapta saptatiḥ ||3||

षष्टिश्च षट्च रेवति पञ्चाशत्पञ्च सुम्नयि ।चत्वारश्चत्वारिंशच्च त्रयस्त्रिंशच्च वाजिनि ॥४॥

ṣaṣṭiśca ṣaṭca revati pañcāśatpañca sumnayi |catvāraścatvāriṃśacca trayastriṃśacca vājini ||4||

द्वौ च ते विंशतिश्च ते रात्र्येकादशावमाः ।तेभिर्नो अद्य पायुभिर्नु पाहि दुहितर्दिवः ॥५॥

dvau ca te viṃśatiśca te rātryekādaśāvamāḥ |tebhirno adya pāyubhirnu pāhi duhitardivaḥ ||5||

रक्षा माकिर्नो अघशंस ईशत मा नो दुःशंस ईशत ।मा नो अद्य गवां स्तेनो मावीनां वृक ईशत ॥६॥

rakṣā mākirno aghaśaṃsa īśata mā no duḥśaṃsa īśata |mā no adya gavāṃ steno māvīnāṃ vṛka īśata ||6||

माश्वानां भद्रे तस्करो मा नृणां यातुधान्यः ।परमेभिः पथिभि स्तेनो धावतु तस्करः ।परेण दत्वती रज्जुः परेणाघायुरर्षतु ॥७॥

māśvānāṃ bhadre taskaro mā nṛṇāṃ yātudhānyaḥ |paramebhiḥ pathibhi steno dhāvatu taskaraḥ |pareṇa datvatī rajjuḥ pareṇāghāyurarṣatu ||7||

अध रात्रि तृष्टधूममशीर्षाणमहिं कृणु ।हनू वृकस्य जम्भया स्तेनं द्रुपदे जहि ॥८॥

adha rātri tṛṣṭadhūmamaśīrṣāṇamahiṃ kṛṇu |hanū vṛkasya jambhayā stenaṃ drupade jahi ||8||

त्वयि रात्रि वसामसि स्वपिष्यामसि जागृहि ।गोभ्यो नः शर्म यछाश्वेभ्यः पुरुषेभ्यः ॥९॥

tvayi rātri vasāmasi svapiṣyāmasi jāgṛhi |gobhyo naḥ śarma yachāśvebhyaḥ puruṣebhyaḥ ||9||

Languages