Gyaandweep | Atharva Veda , Kanda 19, Sukta 52

कामस्तदग्रे समवर्तत मनसो रेतः प्रथमं यदासीत्।स काम कामेन बृहता सयोनी रायस्पोषं यजमानाय धेहि ॥१॥

kāmastadagre samavartata manaso retaḥ prathamaṃ yadāsīt|sa kāma kāmena bṛhatā sayonī rāyaspoṣaṃ yajamānāya dhehi ||1||

त्वं काम सहसासि प्रतिष्ठितो विभुर्विभावा सख आ सखीयते ।त्वमुग्रः पृतनासु ससहिः सह ओजो यजमानाय धेहि ॥२॥

tvaṃ kāma sahasāsi pratiṣṭhito vibhurvibhāvā sakha ā sakhīyate |tvamugraḥ pṛtanāsu sasahiḥ saha ojo yajamānāya dhehi ||2||

दूराच्चकमानाय प्रतिपाणायाक्षये ।आस्मा अशृण्वन्न् आशाः कामेनाजनयन्त्स्वः ॥३॥

dūrāccakamānāya pratipāṇāyākṣaye |āsmā aśṛṇvann āśāḥ kāmenājanayantsvaḥ ||3||

कामेन मा काम आगन् हृदयाद्धृदयं परि ।यदमीषामदो मनस्तदैतूप मामिह ॥४॥

kāmena mā kāma āgan hṛdayāddhṛdayaṃ pari |yadamīṣāmado manastadaitūpa māmiha ||4||

यत्काम कामयमाना इदं कृण्मसि ते हविः ।तन् नः सर्वं समृध्यतामथैतस्य हविषो वीहि स्वाहा ॥५॥

yatkāma kāmayamānā idaṃ kṛṇmasi te haviḥ |tan naḥ sarvaṃ samṛdhyatāmathaitasya haviṣo vīhi svāhā ||5||

Languages