Gyaandweep | Atharva Veda , Kanda 19, Sukta 7

चित्राणि साकं दिवि रोचनानि सरीसृपाणि भुवने जवानि ।तुर्मिशं सुमतिमिच्छमानो अहानि गीर्भिः सपर्यामि नाकम् ॥१॥

citrāṇi sākaṃ divi rocanāni sarīsṛpāṇi bhuvane javāni |turmiśaṃ sumatimicchamāno ahāni gīrbhiḥ saparyāmi nākam ||1||

सुहवमग्ने कृत्तिका रोहिणी चास्तु भद्रं मृगशिरः शमार्द्रा ।पुनर्वसू सूनृता चारु पुष्यो भानुराश्लेषा अयनं मघा मे ॥२॥

suhavamagne kṛttikā rohiṇī cāstu bhadraṃ mṛgaśiraḥ śamārdrā |punarvasū sūnṛtā cāru puṣyo bhānurāśleṣā ayanaṃ maghā me ||2||

पुण्यं पूर्वा फल्गुन्यौ चात्र हस्तश्चित्रा शिवा स्वाति सुखो मे अस्तु ।राधे विशाखे सुहवानुराधा ज्येष्ठा सुनक्षत्रमरिष्ट मूलम् ॥३॥

puṇyaṃ pūrvā phalgunyau cātra hastaścitrā śivā svāti sukho me astu |rādhe viśākhe suhavānurādhā jyeṣṭhā sunakṣatramariṣṭa mūlam ||3||

अन्नं पूर्वा रासतां मे अषाढा ऊर्जं देव्युत्तरा आ वहन्तु ।अभिजिन् मे रासतां पुण्यमेव श्रवणः श्रविष्ठाः कुर्वतां सुपुष्टिम् ॥४॥

annaṃ pūrvā rāsatāṃ me aṣāḍhā ūrjaṃ devyuttarā ā vahantu |abhijin me rāsatāṃ puṇyameva śravaṇaḥ śraviṣṭhāḥ kurvatāṃ supuṣṭim ||4||

आ मे महच्छतभिषग्वरीय आ मे द्वया प्रोष्ठपदा सुशर्म ।आ रेवती चाश्वयुजौ भगं म आ मे रयिं भरण्य आ वहन्तु ॥५॥

ā me mahacchatabhiṣagvarīya ā me dvayā proṣṭhapadā suśarma |ā revatī cāśvayujau bhagaṃ ma ā me rayiṃ bharaṇya ā vahantu ||5||

Languages