Gyaandweep | Atharva Veda , Kanda 2, Sukta 12

द्यावापृथिवी उर्वन्तरिक्षं क्षेत्रस्य पत्न्युरुगायोऽद्भुतः ।उतान्तरिक्षमुरु वातगोपं त इह तप्यन्तां मयि तप्यमाने ॥१॥

dyāvāpṛthivī urvantarikṣaṃ kṣetrasya patnyurugāyo'dbhutaḥ |utāntarikṣamuru vātagopaṃ ta iha tapyantāṃ mayi tapyamāne ||1||

इदं देवाः शृणुत ये यज्ञिया स्थ भरद्वाजो मह्यमुक्थानि शंसति ।पाशे स बद्धो दुरिते नि युज्यतां यो अस्माकं मन इदं हिनस्ति ॥२॥

idaṃ devāḥ śṛṇuta ye yajñiyā stha bharadvājo mahyamukthāni śaṃsati |pāśe sa baddho durite ni yujyatāṃ yo asmākaṃ mana idaṃ hinasti ||2||

इदमिन्द्र शृणुहि सोमप यत्त्वा हृदा शोचता जोहवीमि ।वृश्चामि तं कुलिशेनेव वृक्षं यो अस्माकं मन इदं हिनस्ति ॥३॥

idamindra śṛṇuhi somapa yattvā hṛdā śocatā johavīmi |vṛścāmi taṃ kuliśeneva vṛkṣaṃ yo asmākaṃ mana idaṃ hinasti ||3||

अशीतिभिस्तिसृभिः सामगेभिरादित्येभिर्वसुभिरङ्गिरोभिः ।इष्टापूर्तमवतु नः पितॄणामामुं ददे हरसा दैव्येन ॥४॥

aśītibhistisṛbhiḥ sāmagebhirādityebhirvasubhiraṅgirobhiḥ |iṣṭāpūrtamavatu naḥ pitṝṇāmāmuṃ dade harasā daivyena ||4||

द्यावापृथिवी अनु मा दीधीथां विश्वे देवासो अनु मा रभध्वम् ।अङ्गिरसः पितरः सोम्यासः पापमार्छत्वपकामस्य कर्ता ॥५॥

dyāvāpṛthivī anu mā dīdhīthāṃ viśve devāso anu mā rabhadhvam |aṅgirasaḥ pitaraḥ somyāsaḥ pāpamārchatvapakāmasya kartā ||5||

अतीव यो मरुतो मन्यते नो ब्रह्म वा यो निन्दिषत्क्रियमाणम् ।तपूंषि तस्मै वृजिनानि सन्तु ब्रह्मद्विषं द्यौरभिसंतपाति ॥६॥

atīva yo maruto manyate no brahma vā yo nindiṣatkriyamāṇam |tapūṃṣi tasmai vṛjināni santu brahmadviṣaṃ dyaurabhisaṃtapāti ||6||

सप्त प्राणान् अष्टौ मन्यस्तांस्ते वृश्चामि ब्रह्मणा ।अया यमस्य सादनमग्निदूतो अरंकृतः ॥७॥

sapta prāṇān aṣṭau manyastāṃste vṛścāmi brahmaṇā |ayā yamasya sādanamagnidūto araṃkṛtaḥ ||7||

आ दधामि ते पदं समिद्धे जातवेदसि ।अग्निः शरीरं वेवेष्ट्वसुं वागपि गच्छतु ॥८॥

ā dadhāmi te padaṃ samiddhe jātavedasi |agniḥ śarīraṃ veveṣṭvasuṃ vāgapi gacchatu ||8||

Languages