Gyaandweep | Atharva Veda , Kanda 2, Sukta 13

आयुर्दा अग्ने जरसं वृणानो घृतप्रतीको घृतपृष्ठो अग्ने ।घृतं पीत्वा मधु चारु गव्यं पितेव पुत्रान् अभि रक्षतादिमम् ॥१॥

āyurdā agne jarasaṃ vṛṇāno ghṛtapratīko ghṛtapṛṣṭho agne |ghṛtaṃ pītvā madhu cāru gavyaṃ piteva putrān abhi rakṣatādimam ||1||

परि धत्त धत्त नो वर्चसेमं जरामृत्युं कृणुत दीर्घमायुः ।बृहस्पतिः प्रायच्छद्वास एतत्सोमाय राज्ञे परिधातवा उ ॥२॥

pari dhatta dhatta no varcasemaṃ jarāmṛtyuṃ kṛṇuta dīrghamāyuḥ |bṛhaspatiḥ prāyacchadvāsa etatsomāya rājñe paridhātavā u ||2||

परीदं वासो अधिथाः स्वस्तयेऽभूर्गृष्टीनामभिशस्तिपा उ ।शतं च जीव शरदः पुरूची रायश्च पोषमुपसंव्ययस्व ॥३॥

parīdaṃ vāso adhithāḥ svastaye'bhūrgṛṣṭīnāmabhiśastipā u |śataṃ ca jīva śaradaḥ purūcī rāyaśca poṣamupasaṃvyayasva ||3||

एह्यश्मानमा तिष्ठाश्मा भवतु ते तनूः ।कृण्वन्तु विश्वे देवा आयुष्टे शरदः शतम् ॥४॥

ehyaśmānamā tiṣṭhāśmā bhavatu te tanūḥ |kṛṇvantu viśve devā āyuṣṭe śaradaḥ śatam ||4||

यस्य ते वासः प्रथमवास्यं हरामस्तं त्वा विश्वेऽवन्तु देवाः ।तं त्वा भ्रातरः सुवृधा वर्धमानमनु जायन्तां बहवः सुजातम् ॥५॥

yasya te vāsaḥ prathamavāsyaṃ harāmastaṃ tvā viśve'vantu devāḥ |taṃ tvā bhrātaraḥ suvṛdhā vardhamānamanu jāyantāṃ bahavaḥ sujātam ||5||

Languages