Jñānadvīpa | Atharva Veda , Kanda 2, Sukta 27

नेच्छत्रुः प्राशं जयाति सहमानाभिभूरसि ।प्राशं प्रतिप्राशो जह्यरसान् कृण्वोषधे ॥१॥

necchatruḥ prāśaṃ jayāti sahamānābhibhūrasi |prāśaṃ pratiprāśo jahyarasān kṛṇvoṣadhe ||1||

सुपर्णस्त्वान्वविन्दत्सूकरस्त्वाखनन् नसा ।प्राशं प्रतिप्राशो जह्यरसान् कृण्वोषधे ॥२॥

suparṇastvānvavindatsūkarastvākhanan nasā |prāśaṃ pratiprāśo jahyarasān kṛṇvoṣadhe ||2||

इन्द्रो ह चक्रे त्वा बाहावसुरेभ्य स्तरीतवे ।प्राशं प्रतिप्राशो जह्यरसान् कृण्वोषधे ॥३॥

indro ha cakre tvā bāhāvasurebhya starītave |prāśaṃ pratiprāśo jahyarasān kṛṇvoṣadhe ||3||

पाटामिन्द्रो व्याश्नादसुरेभ्य स्तरीतवे ।प्राशं प्रतिप्राशो जह्यरसान् कृण्वोषधे ॥४॥

pāṭāmindro vyāśnādasurebhya starītave |prāśaṃ pratiprāśo jahyarasān kṛṇvoṣadhe ||4||

तयाहं शत्रून्त्साक्ष इन्द्रः सालावृकामिव ।प्राशं प्रतिप्राशो जह्यरसान् कृण्वोषधे ॥५॥

tayāhaṃ śatrūntsākṣa indraḥ sālāvṛkāmiva |prāśaṃ pratiprāśo jahyarasān kṛṇvoṣadhe ||5||

रुद्र जलाषभेषज नीलशिखण्ड कर्मकृत्।प्राशं प्रतिप्राशो जह्यरसान् कृण्वोषधे ॥६॥

rudra jalāṣabheṣaja nīlaśikhaṇḍa karmakṛt|prāśaṃ pratiprāśo jahyarasān kṛṇvoṣadhe ||6||

तस्य प्राशं त्वं जहि यो न इन्द्राभिदासति ।अधि नो ब्रूहि शक्तिभिः प्राशि मामुत्तरं कृधि ॥७॥

tasya prāśaṃ tvaṃ jahi yo na indrābhidāsati |adhi no brūhi śaktibhiḥ prāśi māmuttaraṃ kṛdhi ||7||

Languages