Gyaandweep | Atharva Veda , Kanda 2, Sukta 28

तुभ्यमेव जरिमन् वर्धतामयं मेममन्ये मृत्यवो हिंसिषुः शतं ये ।मातेव पुत्रं प्रमना उपस्थे मित्र एनं मित्रियात्पात्वंहसः ॥१॥

tubhyameva jariman vardhatāmayaṃ memamanye mṛtyavo hiṃsiṣuḥ śataṃ ye |māteva putraṃ pramanā upasthe mitra enaṃ mitriyātpātvaṃhasaḥ ||1||

मित्र एनं वरुणो वा रिशादा जरामृत्युं कृणुतां संविदानौ ।तदग्निर्होता वयुनानि विद्वान् विश्वा देवानां जनिमा विवक्ति ॥२॥

mitra enaṃ varuṇo vā riśādā jarāmṛtyuṃ kṛṇutāṃ saṃvidānau |tadagnirhotā vayunāni vidvān viśvā devānāṃ janimā vivakti ||2||

त्वमीशिषे पशूनां पार्थिवानां ये जाता उत वा ये जनित्राः ।मेमं प्राणो हासीन् मो अपानो मेमं मित्रा वधिषुर्मो अमित्राः ॥३॥

tvamīśiṣe paśūnāṃ pārthivānāṃ ye jātā uta vā ye janitrāḥ |memaṃ prāṇo hāsīn mo apāno memaṃ mitrā vadhiṣurmo amitrāḥ ||3||

द्यौष्ट्वा पिता पृथिवी माता जरामृत्युं कृणुतां संविदाने ।यथा जीवा अदितेरुपस्थे प्राणापानाभ्यां गुपितः शतं हिमाः ॥४॥

dyauṣṭvā pitā pṛthivī mātā jarāmṛtyuṃ kṛṇutāṃ saṃvidāne |yathā jīvā aditerupasthe prāṇāpānābhyāṃ gupitaḥ śataṃ himāḥ ||4||

इममग्ने आयुषे वर्चसे नय प्रियं रेतो वरुण मित्र राजन् ।मातेवास्मा अदिते शर्म यच्छ विश्वे देवा जरदष्टिर्यथासत्॥५॥

imamagne āyuṣe varcase naya priyaṃ reto varuṇa mitra rājan |mātevāsmā adite śarma yaccha viśve devā jaradaṣṭiryathāsat||5||

Languages