Gyaandweep | Atharva Veda , Kanda 2, Sukta 34

य ईशे पशुपतिः पशूनां चतुष्पदामुत यो द्विपदाम् ।निष्क्रीतः स यज्ञियं भागमेतु रायस्पोषा यजमानं सचन्ताम् ॥१॥

ya īśe paśupatiḥ paśūnāṃ catuṣpadāmuta yo dvipadām |niṣkrītaḥ sa yajñiyaṃ bhāgametu rāyaspoṣā yajamānaṃ sacantām ||1||

प्रमुञ्चन्तो भुवनस्य रेतो गातुं धत्त यजमानाय देवाः ।उपाकृतं शशमानं यदस्थात्प्रियं देवानामप्येतु पाथः ॥२॥

pramuñcanto bhuvanasya reto gātuṃ dhatta yajamānāya devāḥ |upākṛtaṃ śaśamānaṃ yadasthātpriyaṃ devānāmapyetu pāthaḥ ||2||

ये बध्यमानमनु दीध्याना अन्वैक्षन्त मनसा चक्षुषा च ।अग्निष्टान् अग्रे प्र मुमोक्तु देवो विश्वकर्मा प्रजया संरराणः ॥३॥

ye badhyamānamanu dīdhyānā anvaikṣanta manasā cakṣuṣā ca |agniṣṭān agre pra mumoktu devo viśvakarmā prajayā saṃrarāṇaḥ ||3||

ये ग्राम्याः पशवो विश्वरूपा विरूपाः सन्तो बहुधैकरूपाः ।वायुष्टान् अग्रे प्र मुमोक्तु देवः प्रजापतिः प्रजया संरराणः ॥४॥

ye grāmyāḥ paśavo viśvarūpā virūpāḥ santo bahudhaikarūpāḥ |vāyuṣṭān agre pra mumoktu devaḥ prajāpatiḥ prajayā saṃrarāṇaḥ ||4||

प्रजानन्तः प्रति गृह्णन्तु पूर्वे प्राणमङ्गेभ्यः पर्याचरन्तम् ।दिवं गच्छ प्रति तिष्ठा शरीरैः स्वर्गं याहि पथिभिर्देवयानैः ॥५॥

prajānantaḥ prati gṛhṇantu pūrve prāṇamaṅgebhyaḥ paryācarantam |divaṃ gaccha prati tiṣṭhā śarīraiḥ svargaṃ yāhi pathibhirdevayānaiḥ ||5||

Languages