Gyaandweep | Atharva Veda , Kanda 20, Sukta 23

आ तू न इन्द्र मद्र्यग्घुवानः सोमपीतये ।हरिभ्यां याह्यद्रिवः ॥१॥

ā tū na indra madryagghuvānaḥ somapītaye |haribhyāṃ yāhyadrivaḥ ||1||

सत्तो होता न ऋत्वियस्तिस्तिरे बर्हिरानुषक्।अयुज्रन् प्रातरद्रयः ॥२॥

satto hotā na ṛtviyastistire barhirānuṣak|ayujran prātaradrayaḥ ||2||

इमा ब्रह्म ब्रह्मवाहः क्रियन्त आ बर्हिः सीद ।वीहि शूर पुरोलाशम् ॥३॥

imā brahma brahmavāhaḥ kriyanta ā barhiḥ sīda |vīhi śūra purolāśam ||3||

रारन्धि सवनेषु ण एषु स्तोमेषु वृत्रहन् ।उक्थेष्विन्द्र गिर्वणः ॥४॥

rārandhi savaneṣu ṇa eṣu stomeṣu vṛtrahan |uktheṣvindra girvaṇaḥ ||4||

मतयः सोमपामुरुं रिहन्ति शवसस्पतिम् ।इन्द्रं वत्सं न मातरः ॥५॥

matayaḥ somapāmuruṃ rihanti śavasaspatim |indraṃ vatsaṃ na mātaraḥ ||5||

स मन्दस्वा ह्यन्धसो राधसे तन्वा महे ।न स्तोतारं निदे करः ॥६॥

sa mandasvā hyandhaso rādhase tanvā mahe |na stotāraṃ nide karaḥ ||6||

वयमिन्द्र त्वायवो हविष्मन्तो जरामहे ।उत त्वमस्मयुर्वसो ॥७॥

vayamindra tvāyavo haviṣmanto jarāmahe |uta tvamasmayurvaso ||7||

मारे अस्मद्वि मुमुचो हरिप्रियार्वाङ्याहि ।इन्द्र स्वधावो मत्स्वेह ॥८॥

māre asmadvi mumuco haripriyārvāṅyāhi |indra svadhāvo matsveha ||8||

अर्वाञ्चं त्वा सुखे रथे वहतामिन्द्र केशिना ।घृतस्नू बर्हिरासदे ॥९॥

arvāñcaṃ tvā sukhe rathe vahatāmindra keśinā |ghṛtasnū barhirāsade ||9||

Languages