Gyaandweep | Atharva Veda , Kanda 20, Sukta 30

प्र ते महे विदथे शंसिषं हरी प्र ते वन्वे वनुषो हर्यतं मदम् ।घृतं न यो हरिभिश्चारु सेचत आ त्वा विशन्तु हरिवर्पसं गिरः ॥१॥

pra te mahe vidathe śaṃsiṣaṃ harī pra te vanve vanuṣo haryataṃ madam |ghṛtaṃ na yo haribhiścāru secata ā tvā viśantu harivarpasaṃ giraḥ ||1||

हरिं हि योनिमभि ये समस्वरन् हिन्वन्तो हरी दिव्यं यथा सदः ।आ यं पृणन्ति हरिभिर्न धेनव इन्द्राय शूशं हरिवन्तमर्चत ॥२॥

hariṃ hi yonimabhi ye samasvaran hinvanto harī divyaṃ yathā sadaḥ |ā yaṃ pṛṇanti haribhirna dhenava indrāya śūśaṃ harivantamarcata ||2||

सो अस्य वज्रो हरितो य आयसो हरिर्निकामो हरिरा गभस्त्योः ।द्युम्नी सुशिप्रो हरिमन्युसायक इन्द्रे नि रूपा हरिता मिमिक्षिरे ॥३॥

so asya vajro harito ya āyaso harirnikāmo harirā gabhastyoḥ |dyumnī suśipro harimanyusāyaka indre ni rūpā haritā mimikṣire ||3||

दिवि न केतुरधि धायि हर्यतो विव्यचद्वज्रो हरितो न रंह्या ।तुददहिं हरिशिप्रो य आयसः सहस्रशोका अभवद्धरिम्भरः ॥४॥

divi na keturadhi dhāyi haryato vivyacadvajro harito na raṃhyā |tudadahiṃ hariśipro ya āyasaḥ sahasraśokā abhavaddharimbharaḥ ||4||

त्वंत्वमहर्यथा उपस्तुतः पूर्वेभिरिन्द्र हरिकेश यज्वभिः ।त्वं हर्यसि तव विश्वमुक्थ्यमसामि राधो हरिजात हर्यतम् ॥५॥

tvaṃtvamaharyathā upastutaḥ pūrvebhirindra harikeśa yajvabhiḥ |tvaṃ haryasi tava viśvamukthyamasāmi rādho harijāta haryatam ||5||

Languages