| |
|

This overlay will guide you through the buttons:

Sukta 1
अस्मा इदु प्र तवसे तुराय प्रयो न हर्मि स्तोमं माहिनाय ।ऋचीषमायाध्रिगव ओहमिन्द्राय ब्रह्माणि राततमा ॥१॥
asmā idu pra tavase turāya prayo na harmi stomaṃ māhināya .ṛcīṣamāyādhrigava ohamindrāya brahmāṇi rātatamā ..1..

Sukta 2
अस्मा इदु प्रय इव प्र यंसि भराम्यान्गूषं बाधे सुवृक्ति ।इन्द्राय हृदा मनसा मनीषा प्रत्नाय पत्ये धियो मर्जयन्त ॥२॥
asmā idu praya iva pra yaṃsi bharāmyāngūṣaṃ bādhe suvṛkti .indrāya hṛdā manasā manīṣā pratnāya patye dhiyo marjayanta ..2..

Sukta 3
अस्मा इदु त्यमुपमं स्वर्षां भराम्याङ्गूषमास्येन ।मंहिष्ठमछोक्तिभिर्मतीनां सुवृक्तिभिः सूरिं वावृधध्यै ॥३॥
asmā idu tyamupamaṃ svarṣāṃ bharāmyāṅgūṣamāsyena .maṃhiṣṭhamachoktibhirmatīnāṃ suvṛktibhiḥ sūriṃ vāvṛdhadhyai ..3..

Sukta 4
अस्मा इदु स्तोमं सं हिनोमि रथं न तष्टेव तत्सिनाय ।गिरश्च गिर्वाहसे सुवृक्तीन्द्राय विश्वमिन्वं मेधिराय ॥४॥
asmā idu stomaṃ saṃ hinomi rathaṃ na taṣṭeva tatsināya .giraśca girvāhase suvṛktīndrāya viśvaminvaṃ medhirāya ..4..

Sukta 5
अस्मा इदु सप्तिमिव श्रवस्येन्द्रायार्कं जुह्वा समञ्जे ।वीरं दानौकसं वन्दध्यै पुरां गूर्तश्रवसं दर्माणम् ॥५॥
asmā idu saptimiva śravasyendrāyārkaṃ juhvā samañje .vīraṃ dānaukasaṃ vandadhyai purāṃ gūrtaśravasaṃ darmāṇam ..5..

Sukta 6
अस्मा इदु त्वष्टा तक्षद्वज्रं स्वपस्तमं स्वर्यं रणाय ।वृत्रस्य चिद्विदद्येन मर्म तुजन्न् ईशानस्तुजता कियेधाः ॥६॥
asmā idu tvaṣṭā takṣadvajraṃ svapastamaṃ svaryaṃ raṇāya .vṛtrasya cidvidadyena marma tujann īśānastujatā kiyedhāḥ ..6..

Sukta 7
अस्येदु मातुः सवनेषु सद्यो महः पितुं पपिवां चार्वन्ना ।मुषायद्विष्णुः पचतं सहीयान् विध्यद्वराहं तिरो अद्रिमस्ता ॥७॥
asyedu mātuḥ savaneṣu sadyo mahaḥ pituṃ papivāṃ cārvannā .muṣāyadviṣṇuḥ pacataṃ sahīyān vidhyadvarāhaṃ tiro adrimastā ..7..

Sukta 8
अस्मा इदु ग्नाश्चिद्देवपत्नीरिन्द्रायार्कमहिहत्य ऊवुः ।परि द्यावापृथिवी जभ्र उर्वी नास्य ते महिमानं परि ष्टः ॥८॥
asmā idu gnāściddevapatnīrindrāyārkamahihatya ūvuḥ .pari dyāvāpṛthivī jabhra urvī nāsya te mahimānaṃ pari ṣṭaḥ ..8..

Sukta 9
अस्येदेव प्र रिरिचे महित्वं दिवस्पृथिव्याः पर्यन्तरिक्षात्।स्वरालिन्द्रो दम आ विश्वगूर्तः स्वरिरमत्रो ववक्षे रणाय ॥९॥
asyedeva pra ririce mahitvaṃ divaspṛthivyāḥ paryantarikṣāt.svarālindro dama ā viśvagūrtaḥ svariramatro vavakṣe raṇāya ..9..

Sukta 10
अस्येदेव शवसा शुशन्तं वि वृश्चद्वज्रेण वृत्रमिन्द्रः ।गा न व्राणा अवनीरमुञ्चदभि श्रवो दावने सचेताः ॥१०॥
asyedeva śavasā śuśantaṃ vi vṛścadvajreṇa vṛtramindraḥ .gā na vrāṇā avanīramuñcadabhi śravo dāvane sacetāḥ ..10..

Sukta 11
अस्येदु त्वेषसा रन्त सिन्धवः परि यद्वज्रेण सीमयच्छत्।ईशानकृद्दाशुषे दशस्यन् तुर्वीतये गाधं तुर्वणिः कः ॥११॥
asyedu tveṣasā ranta sindhavaḥ pari yadvajreṇa sīmayacchat.īśānakṛddāśuṣe daśasyan turvītaye gādhaṃ turvaṇiḥ kaḥ ..11..

Sukta 12
अस्मा इदु प्र भरा तूतुजानो वृत्राय वज्रमीशानः कियेधाः ।गोर्न पर्व वि रदा तिरश्चेष्यन्न् अर्णांस्यपां चरध्यै ॥१२॥
asmā idu pra bharā tūtujāno vṛtrāya vajramīśānaḥ kiyedhāḥ .gorna parva vi radā tiraśceṣyann arṇāṃsyapāṃ caradhyai ..12..

Sukta 13
अस्येदु प्र ब्रूहि पूर्व्याणि तुरस्य कर्माणि नव्य उक्थैः ।युधे यदिष्णान आयुधान्यृघायमाणो निरिणाति शत्रून् ॥१३॥
asyedu pra brūhi pūrvyāṇi turasya karmāṇi navya ukthaiḥ .yudhe yadiṣṇāna āyudhānyṛghāyamāṇo niriṇāti śatrūn ..13..

Sukta 14
अस्येदु भिया गिरयश्च दृल्हा द्यावा च भूमा जनुषस्तुजेते ।उपो वेनस्य जोगुवान ओणिं सद्यो भुवद्वीर्याय नोधाः ॥१४॥
asyedu bhiyā girayaśca dṛlhā dyāvā ca bhūmā januṣastujete .upo venasya joguvāna oṇiṃ sadyo bhuvadvīryāya nodhāḥ ..14..

Sukta 15
अस्मा इदु त्यदनु दाय्येषामेको यद्वव्ने भूरेरीशानः ।प्रैतशं सूर्ये पस्पृधानं सौवश्व्ये सुष्विमावदिन्द्रः ॥१५॥
asmā idu tyadanu dāyyeṣāmeko yadvavne bhūrerīśānaḥ .praitaśaṃ sūrye paspṛdhānaṃ sauvaśvye suṣvimāvadindraḥ ..15..

Sukta 16
एवा ते हारियोजना सुवृक्तीन्द्र ब्रह्माणि गोतमासो अक्रन् ।ऐषु विश्वपेशसं धियं धाः प्रातर्मक्षू धियावसुर्जगम्यात्॥१६॥
evā te hāriyojanā suvṛktīndra brahmāṇi gotamāso akran .aiṣu viśvapeśasaṃ dhiyaṃ dhāḥ prātarmakṣū dhiyāvasurjagamyāt..16..

Add to Playlist

Practice Later

No Playlist Found

Create a Verse Post


namo namaḥ!

भाषा चुने (Choose Language)

namo namaḥ!

Sign Up to practice more than 60 Vedic Scriptures and 100 of chants, one verse at a time.

Login to track your learning and teaching progress.


Sign In