Gyaandweep | Atharva Veda , Kanda 20, Sukta 6

इन्द्र त्वा वृषभं वयं सुते सोमे हवामहे ।स पाहि मध्वो अन्धसः ॥१॥

indra tvā vṛṣabhaṃ vayaṃ sute some havāmahe |sa pāhi madhvo andhasaḥ ||1||

इन्द्र क्रतुविदं सुतं सोमं हर्य पुरुष्टुत ।पिबा वृषस्व तातृपिम् ॥२॥

indra kratuvidaṃ sutaṃ somaṃ harya puruṣṭuta |pibā vṛṣasva tātṛpim ||2||

इन्द्र प्र णो धितावानं यज्ञं विश्वेभिर्देवेभिर्।तिर स्तवान विश्पते ॥३॥

indra pra ṇo dhitāvānaṃ yajñaṃ viśvebhirdevebhir|tira stavāna viśpate ||3||

इन्द्र सोमाः सुता इमे तव प्र यन्ति सत्पते ।क्षयं चन्द्रास इन्दवः ॥४॥

indra somāḥ sutā ime tava pra yanti satpate |kṣayaṃ candrāsa indavaḥ ||4||

दधिष्वा जठरे सुतं सोममिन्द्र वरेण्यम् ।तव द्युक्षास इन्दवः ॥५॥

dadhiṣvā jaṭhare sutaṃ somamindra vareṇyam |tava dyukṣāsa indavaḥ ||5||

गिर्वणः पाहि नः सुतं मधोर्धाराभिरज्यसे ।इन्द्र त्वादातमिद्यशः ॥६॥

girvaṇaḥ pāhi naḥ sutaṃ madhordhārābhirajyase |indra tvādātamidyaśaḥ ||6||

अभि द्युम्नानि वनिन इन्द्रं सचन्ते अक्षिता ।पीत्वी सोमस्य वावृधे ॥७॥

abhi dyumnāni vanina indraṃ sacante akṣitā |pītvī somasya vāvṛdhe ||7||

अर्वावतो न आ गहि परावतश्च वृत्रहन् ।इमा जुषस्व नो गिरः ॥८॥

arvāvato na ā gahi parāvataśca vṛtrahan |imā juṣasva no giraḥ ||8||

यदन्तरा परावतमर्वावतं च हूयसे ।इन्द्रेह तत आ गहि ॥९॥

yadantarā parāvatamarvāvataṃ ca hūyase |indreha tata ā gahi ||9||

Languages