Gyaandweep | Atharva Veda , Kanda 20, Sukta 63

Sukta 1

इमा नु कं भुवना सीषधामेन्द्रश्च विश्वे च देवाः ।यज्ञं च नस्तन्वं च प्रजां चादित्यैरिन्द्रः सह चीकॢपाति ॥१॥

imā nu kaṃ bhuvanā sīṣadhāmendraśca viśve ca devāḥ .yajñaṃ ca nastanvaṃ ca prajāṃ cādityairindraḥ saha cīkḷpāti ..1..

Sukta 2

आदित्यैरिन्द्रः सगणो मरुद्भिरस्माकं भूत्वविता तनूनाम् ।हत्वाय देवा असुरान् यदायन् देवा देवत्वमभिरक्षमाणाः ॥२॥

ādityairindraḥ sagaṇo marudbhirasmākaṃ bhūtvavitā tanūnām .hatvāya devā asurān yadāyan devā devatvamabhirakṣamāṇāḥ ..2..

Sukta 3

प्रत्यञ्चमर्कमनयं छचीभिरादित्स्वधामिषिरां पर्यपश्यन् ।अया वाजं देवहितं सनेम मदेम शतहिमाः सुवीराः ॥३॥

pratyañcamarkamanayaṃ chacībhirāditsvadhāmiṣirāṃ paryapaśyan .ayā vājaṃ devahitaṃ sanema madema śatahimāḥ suvīrāḥ ..3..

Sukta 4

य एक इद्विदयते वसु मर्ताय दाशुषे ।ईशानो अप्रतिष्कुत इन्द्रो अङ्ग ॥४॥

ya eka idvidayate vasu martāya dāśuṣe .īśāno apratiṣkuta indro aṅga ..4..

Sukta 5

कदा मर्तमराधसं पदा क्षुम्पमिव स्फुरत्।कदा नः शुश्रवद्गिर इन्द्रो अङ्ग ॥५॥

kadā martamarādhasaṃ padā kṣumpamiva sphurat.kadā naḥ śuśravadgira indro aṅga ..5..

Sukta 6

यश्चिद्धि त्वा बहुभ्य आ सुतावामाविवासति ।उग्रं तत्पत्यते शव इन्द्रो अङ्ग ॥६॥

yaściddhi tvā bahubhya ā sutāvāmāvivāsati .ugraṃ tatpatyate śava indro aṅga ..6..

Sukta 7

य इन्द्र सोमपातमो मदः शविष्ठ चेतति ।येना हंसि न्यत्त्रिणं तमीमहे ॥७॥

ya indra somapātamo madaḥ śaviṣṭha cetati .yenā haṃsi nyattriṇaṃ tamīmahe ..7..

Sukta 8

येना दशग्वमध्रिगुं वेपयन्तं स्वर्णरम् ।येना समुद्रमाविथा तमीमहे ॥८॥

yenā daśagvamadhriguṃ vepayantaṃ svarṇaram .yenā samudramāvithā tamīmahe ..8..

Sukta 9

येन सिन्धुं महीरपो रथामिव प्रचोदयः ।पन्थामृतस्य यातवे तमीमहे ॥९॥

yena sindhuṃ mahīrapo rathāmiva pracodayaḥ .panthāmṛtasya yātave tamīmahe ..9..

Languages