Gyaandweep | Atharva Veda , Kanda 20, Sukta 71

महामिन्द्रः परश्च नु महित्वमस्तु वज्रिणे ।द्यौर्न प्रथिना शवः ॥१॥

mahāmindraḥ paraśca nu mahitvamastu vajriṇe |dyaurna prathinā śavaḥ ||1||

समोहे वा य आशत नरस्तोकस्य सनितौ ।विप्रासो वा धियायवः ॥२॥

samohe vā ya āśata narastokasya sanitau |viprāso vā dhiyāyavaḥ ||2||

यः कुक्षिः सोमपातमः समुद्र इव पिन्वते ।उर्वीरापो न काकुदः ॥३॥

yaḥ kukṣiḥ somapātamaḥ samudra iva pinvate |urvīrāpo na kākudaḥ ||3||

एवा ह्यस्य सूनृता विरप्शी गोमती मही ।पक्वा शाखा न दाशुषे ॥४॥

evā hyasya sūnṛtā virapśī gomatī mahī |pakvā śākhā na dāśuṣe ||4||

एवा हि ते विभूतय ऊतय इन्द्र मावते ।सद्यश्चित्सन्ति दाशुषे ॥५॥

evā hi te vibhūtaya ūtaya indra māvate |sadyaścitsanti dāśuṣe ||5||

एवा ह्यस्य काम्या स्तोम उक्थं च शंस्या ।इन्द्राय सोमपीतये ॥६॥

evā hyasya kāmyā stoma ukthaṃ ca śaṃsyā |indrāya somapītaye ||6||

इन्द्रेहि मत्स्यन्धसो विश्वेभिः सोमपर्वभिः ।महामभिष्टिरोजसा ॥७॥

indrehi matsyandhaso viśvebhiḥ somaparvabhiḥ |mahāmabhiṣṭirojasā ||7||

एमेनं सृजता सुते मन्दिमिन्द्राय मन्दिने ।चक्रिं विश्वानि चक्रये ॥८॥

emenaṃ sṛjatā sute mandimindrāya mandine |cakriṃ viśvāni cakraye ||8||

मत्स्वा सुशिप्र मन्दिभि स्तोमेभिर्विश्वचर्षणे ।सचैषु सवनेष्वा ॥९॥

matsvā suśipra mandibhi stomebhirviśvacarṣaṇe |sacaiṣu savaneṣvā ||9||

असृग्रमिन्द्र ते गिरः प्रति त्वामुदहासत ।अजोषा वृषभं पतिम् ॥१०॥

asṛgramindra te giraḥ prati tvāmudahāsata |ajoṣā vṛṣabhaṃ patim ||10||

सं चोदय चित्रमर्वाग्राध इन्द्र वरेण्यम् ।असदित्ते विभु प्रभु ॥११॥

saṃ codaya citramarvāgrādha indra vareṇyam |asaditte vibhu prabhu ||11||

अस्मान्त्सु तत्र चोदयेन्द्र राये रभस्वतः ।तुविद्युम्न यशस्वतः ॥१२॥

asmāntsu tatra codayendra rāye rabhasvataḥ |tuvidyumna yaśasvataḥ ||12||

सं गोमदिन्द्र वाजवदस्मे पृथु श्रवो बृहत्।विश्वायुर्धेह्यक्षितम् ॥१३॥

saṃ gomadindra vājavadasme pṛthu śravo bṛhat|viśvāyurdhehyakṣitam ||13||

अस्मे धेहि श्रवो बृहद्द्युम्नं सहस्रसातमम् ।इन्द्र ता रथिनीरिषः ॥१४॥

asme dhehi śravo bṛhaddyumnaṃ sahasrasātamam |indra tā rathinīriṣaḥ ||14||

वसोरिन्द्रं वसुपतिं गीर्भिर्गृणन्त ऋग्मियम् ।होम गन्तारमूतये ॥१५॥

vasorindraṃ vasupatiṃ gīrbhirgṛṇanta ṛgmiyam |homa gantāramūtaye ||15||

सुतेसुते न्योकसे बृहद्बृहत एदरिः ।इन्द्राय शूषमर्चति ॥१६॥

sutesute nyokase bṛhadbṛhata edariḥ |indrāya śūṣamarcati ||16||

Languages