Gyaandweep | Atharva Veda , Kanda 20, Sukta 93

उत्त्वा मन्दन्तु स्तोमाः कृणुष्व राधो अद्रिवः ।अव ब्रह्मद्विषो जहि ॥१॥

uttvā mandantu stomāḥ kṛṇuṣva rādho adrivaḥ |ava brahmadviṣo jahi ||1||

पदा पणींरराधसो नि बाधस्व महामसि ।नहि त्वा कश्चन प्रति ॥२॥

padā paṇīṃrarādhaso ni bādhasva mahāmasi |nahi tvā kaścana prati ||2||

त्वमीशिषे सुतानामिन्द्र त्वमसुतानाम् ।त्वं राजा जनानाम् ॥३॥

tvamīśiṣe sutānāmindra tvamasutānām |tvaṃ rājā janānām ||3||

ईङ्खयन्तीरपस्युव इन्द्रं जातमुपासते ।भेजानासः सुवीर्यम् ॥४॥

īṅkhayantīrapasyuva indraṃ jātamupāsate |bhejānāsaḥ suvīryam ||4||

त्वमिन्द्र बलादधि सहसो जात ओजसः ।त्वं वृषन् वृषेदसि ॥५॥

tvamindra balādadhi sahaso jāta ojasaḥ |tvaṃ vṛṣan vṛṣedasi ||5||

त्वमिन्द्रासि वृत्रहा व्यन्तरिक्षमतिरः ।उद्द्यामस्तभ्ना ओजसा ॥६॥

tvamindrāsi vṛtrahā vyantarikṣamatiraḥ |uddyāmastabhnā ojasā ||6||

त्वमिन्द्र सजोषसमर्कं बिभर्षि बाह्वोः ।वज्रं शिशान ओजसा ॥७॥

tvamindra sajoṣasamarkaṃ bibharṣi bāhvoḥ |vajraṃ śiśāna ojasā ||7||

त्वमिन्द्राभिभुरसि विश्वा जातान्योजसा ।स विश्वा भुव आभवः ॥८॥

tvamindrābhibhurasi viśvā jātānyojasā |sa viśvā bhuva ābhavaḥ ||8||

Languages