Gyaandweep | Atharva Veda , Kanda 3, Sukta 10

प्रथमा ह व्युवास सा धेनुरभवद्यमे ।सा नः पयस्वती दुहामुत्तरामुत्तरां समाम् ॥१॥

prathamā ha vyuvāsa sā dhenurabhavadyame |sā naḥ payasvatī duhāmuttarāmuttarāṃ samām ||1||

यां देवाः प्रतिनन्दन्ति रात्रिं धेनुमुपायतीम् ।संवत्सरस्य या पत्नी सा नो अस्तु सुमङ्गली ॥२॥

yāṃ devāḥ pratinandanti rātriṃ dhenumupāyatīm |saṃvatsarasya yā patnī sā no astu sumaṅgalī ||2||

संवत्सरस्य प्रतिमां यां त्वा रात्र्युपास्महे ।सा न आयुष्मतीं प्रजां रायस्पोषेण सं सृज ॥३॥

saṃvatsarasya pratimāṃ yāṃ tvā rātryupāsmahe |sā na āyuṣmatīṃ prajāṃ rāyaspoṣeṇa saṃ sṛja ||3||

इयमेव सा या प्रथमा व्यौच्छदास्वितरासु चरति प्रविष्टा ।महान्तो अस्यां महिमानो अन्तर्वधूर्जिगाय नवगज्जनित्री ॥४॥

iyameva sā yā prathamā vyaucchadāsvitarāsu carati praviṣṭā |mahānto asyāṃ mahimāno antarvadhūrjigāya navagajjanitrī ||4||

वानस्पत्या ग्रावाणो घोषमक्रत हविष्कृण्वन्तः परिवत्सरीणम् ।एकाष्टके सुप्रजसः सुवीरा वयं स्याम पतयो रयीणाम् ॥५॥

vānaspatyā grāvāṇo ghoṣamakrata haviṣkṛṇvantaḥ parivatsarīṇam |ekāṣṭake suprajasaḥ suvīrā vayaṃ syāma patayo rayīṇām ||5||

इडायास्पदं घृतवत्सरीसृपं जातवेदः प्रति हव्या गृभाय ।ये ग्राम्याः पशवो विश्वरूपास्तेषां सप्तानां मयि रन्तिरस्तु ॥६॥

iḍāyāspadaṃ ghṛtavatsarīsṛpaṃ jātavedaḥ prati havyā gṛbhāya |ye grāmyāḥ paśavo viśvarūpāsteṣāṃ saptānāṃ mayi rantirastu ||6||

आ मा पुष्टे च पोषे च रात्रि देवानां सुमतौ स्याम ।पूर्णा दर्वे परा पत सुपूर्णा पुनरा पत ।सर्वान् यज्ञान्त्संभुञ्जतीषमूर्जं न आ भर ॥७॥

ā mā puṣṭe ca poṣe ca rātri devānāṃ sumatau syāma |pūrṇā darve parā pata supūrṇā punarā pata |sarvān yajñāntsaṃbhuñjatīṣamūrjaṃ na ā bhara ||7||

आयमगन्त्संवत्सरः पतिरेकाष्टके तव ।सा न आयुष्मतीं प्रजां रायस्पोषेण सं सृज ॥८॥

āyamagantsaṃvatsaraḥ patirekāṣṭake tava |sā na āyuṣmatīṃ prajāṃ rāyaspoṣeṇa saṃ sṛja ||8||

ऋतून् यज ऋतुपतीन् आर्तवान् उत हायनान् ।समाः संवत्सरान् मासान् भूतस्य पतये यजे ॥९॥

ṛtūn yaja ṛtupatīn ārtavān uta hāyanān |samāḥ saṃvatsarān māsān bhūtasya pataye yaje ||9||

ऋतुभ्यष्ट्वार्तवेभ्यो माद्भ्यः संवत्सरेभ्यः ।धात्रे विधात्रे समृधे भूतस्य पतये यजे ॥१०॥

ṛtubhyaṣṭvārtavebhyo mādbhyaḥ saṃvatsarebhyaḥ |dhātre vidhātre samṛdhe bhūtasya pataye yaje ||10||

इडया जुह्वतो वयं देवान् घृतवता यजे ।गृहान् अलुभ्यतो वयं सं विशेमोप गोमतः ॥११॥

iḍayā juhvato vayaṃ devān ghṛtavatā yaje |gṛhān alubhyato vayaṃ saṃ viśemopa gomataḥ ||11||

एकाष्टका तपसा तप्यमाना जजान गर्भं महिमानमिन्द्रम् ।तेन देवा व्यसहन्त शत्रून् हन्ता दस्यूनामभवच्छचीपतिः ॥१२॥

ekāṣṭakā tapasā tapyamānā jajāna garbhaṃ mahimānamindram |tena devā vyasahanta śatrūn hantā dasyūnāmabhavacchacīpatiḥ ||12||

इन्द्रपुत्रे सोमपुत्रे दुहितासि प्रजापतेः ।कामान् अस्माकं पूरय प्रति गृह्णाहि नो हविः ॥१३॥

indraputre somaputre duhitāsi prajāpateḥ |kāmān asmākaṃ pūraya prati gṛhṇāhi no haviḥ ||13||

Languages