Gyaandweep | Atharva Veda , Kanda 3, Sukta 12

इहैव ध्रुवां नि मिनोमि शालां क्षेमे तिष्ठाति घृतमुक्षमाणा ।तां त्वा शाले सर्ववीराः सुवीरा अरिष्टवीरा उप सं चरेम ॥१॥

ihaiva dhruvāṃ ni minomi śālāṃ kṣeme tiṣṭhāti ghṛtamukṣamāṇā |tāṃ tvā śāle sarvavīrāḥ suvīrā ariṣṭavīrā upa saṃ carema ||1||

इहैव ध्रुवा प्रति तिष्ठ शालेऽश्वावती गोमती सूनृतावती ।ऊर्जस्वती घृतवती पयस्वत्युच्छ्रयस्व महते सौभगाय ॥२॥

ihaiva dhruvā prati tiṣṭha śāle'śvāvatī gomatī sūnṛtāvatī |ūrjasvatī ghṛtavatī payasvatyucchrayasva mahate saubhagāya ||2||

धरुण्यसि शाले बृहच्छन्दाः पूतिधान्या ।आ त्वा वत्सो गमेदा कुमार आ धेनवः सायमास्पन्दमानाः ॥३॥

dharuṇyasi śāle bṛhacchandāḥ pūtidhānyā |ā tvā vatso gamedā kumāra ā dhenavaḥ sāyamāspandamānāḥ ||3||

इमां शालां सविता वायुरिन्द्रो बृहस्पतिर्नि मिनोतु प्रजानन् ।उक्षन्तूद्ना मरुतो घृतेन भगो नो राजा नि कृषिं तनोतु ॥४॥

imāṃ śālāṃ savitā vāyurindro bṛhaspatirni minotu prajānan |ukṣantūdnā maruto ghṛtena bhago no rājā ni kṛṣiṃ tanotu ||4||

मानस्य पत्नि शरणा स्योना देवी देवेभिर्निमितास्यग्रे ।तृणं वसाना सुमना असस्त्वमथास्मभ्यं सहवीरं रयिं दाः ॥५॥

mānasya patni śaraṇā syonā devī devebhirnimitāsyagre |tṛṇaṃ vasānā sumanā asastvamathāsmabhyaṃ sahavīraṃ rayiṃ dāḥ ||5||

ऋतेन स्थूणामधि रोह वंशोग्रो विराजन्न् अप वृङ्क्ष्व शत्रून् ।मा ते रिषन्न् उपसत्तारो गृहाणां शाले शतं जीवेम शरदः सर्ववीराः ॥६॥

ṛtena sthūṇāmadhi roha vaṃśogro virājann apa vṛṅkṣva śatrūn |mā te riṣann upasattāro gṛhāṇāṃ śāle śataṃ jīvema śaradaḥ sarvavīrāḥ ||6||

एमां कुमारस्तरुण आ वत्सो जगता सह ।एमां परिस्रुतः कुम्भ आ दध्नः कलशैरगुः ॥७॥

emāṃ kumārastaruṇa ā vatso jagatā saha |emāṃ parisrutaḥ kumbha ā dadhnaḥ kalaśairaguḥ ||7||

पूर्णं नारि प्र भर कुम्भमेतं घृतस्य धाराममृतेन संभृताम् ।इमां पातॄन् अमृतेन समङ्ग्धीष्टापूर्तमभि रक्षात्येनाम् ॥८॥

pūrṇaṃ nāri pra bhara kumbhametaṃ ghṛtasya dhārāmamṛtena saṃbhṛtām |imāṃ pātṝn amṛtena samaṅgdhīṣṭāpūrtamabhi rakṣātyenām ||8||

इमा आपः प्र भराम्ययक्ष्मा यक्ष्मनाशनीः ।गृहान् उप प्र सीदाम्यमृतेन सहाग्निना ॥९॥

imā āpaḥ pra bharāmyayakṣmā yakṣmanāśanīḥ |gṛhān upa pra sīdāmyamṛtena sahāgninā ||9||

Languages