Gyaandweep | Atharva Veda , Kanda 3, Sukta 19

संशितं म इदं ब्रह्म संशितं वीर्यं बलम् ।संशितं क्षत्रमजरमस्तु जिष्णुर्येषामस्मि पुरोहितः ॥१॥

saṃśitaṃ ma idaṃ brahma saṃśitaṃ vīryaṃ balam |saṃśitaṃ kṣatramajaramastu jiṣṇuryeṣāmasmi purohitaḥ ||1||

समहमेषां राष्ट्रं स्यामि समोजो वीर्यं बलम् ।वृश्चामि शत्रूणां बाहून् अनेन हविषा अहम् ॥२॥

samahameṣāṃ rāṣṭraṃ syāmi samojo vīryaṃ balam |vṛścāmi śatrūṇāṃ bāhūn anena haviṣā aham ||2||

नीचैः पद्यन्तामधरे भवन्तु ये नः सूरिं मघवानं पृतन्यान् ।क्षिणामि ब्रह्मणामित्रान् उन् नयामि स्वान् अहम् ॥३॥

nīcaiḥ padyantāmadhare bhavantu ye naḥ sūriṃ maghavānaṃ pṛtanyān |kṣiṇāmi brahmaṇāmitrān un nayāmi svān aham ||3||

तीक्ष्णीयांसः परशोरग्नेस्तीक्ष्णतरा उत ।इन्द्रस्य वज्रात्तीक्ष्णीयांसो येषामस्मि पुरोहितः ॥४॥

tīkṣṇīyāṃsaḥ paraśoragnestīkṣṇatarā uta |indrasya vajrāttīkṣṇīyāṃso yeṣāmasmi purohitaḥ ||4||

एषामहमायुधा सं स्याम्येषां राष्ट्रं सुवीरं वर्धयामि ।एषां क्षत्रमजरमस्तु जिष्ण्वेषां चित्तं विश्वेऽवन्तु देवाः ॥५॥

eṣāmahamāyudhā saṃ syāmyeṣāṃ rāṣṭraṃ suvīraṃ vardhayāmi |eṣāṃ kṣatramajaramastu jiṣṇveṣāṃ cittaṃ viśve'vantu devāḥ ||5||

उद्धर्षन्तां मघवन् वाजिनान्युद्वीराणां जयतामेतु घोषः ।पृथग्घोषा उलुलयः केतुमन्त उदीरताम् ।देवा इन्द्रज्येष्ठा मरुतो यन्तु सेनया ॥६॥

uddharṣantāṃ maghavan vājinānyudvīrāṇāṃ jayatāmetu ghoṣaḥ |pṛthagghoṣā ululayaḥ ketumanta udīratām |devā indrajyeṣṭhā maruto yantu senayā ||6||

प्रेता जयता नर उग्रा वः सन्तु बाहवः ।तीक्ष्णेषवोऽबलधन्वनो हतोग्रायुधा अबलान् उग्रबाहवः ॥७॥

pretā jayatā nara ugrā vaḥ santu bāhavaḥ |tīkṣṇeṣavo'baladhanvano hatogrāyudhā abalān ugrabāhavaḥ ||7||

अवसृष्टा परा पत शरव्ये ब्रह्मसंशिते ।जय अमित्रान् प्र पद्यस्व जह्येषां वरंवरं मामीषां मोचि कश्चन ॥८॥

avasṛṣṭā parā pata śaravye brahmasaṃśite |jaya amitrān pra padyasva jahyeṣāṃ varaṃvaraṃ māmīṣāṃ moci kaścana ||8||

Languages