Gyaandweep | Atharva Veda , Kanda 3, Sukta 24

पयस्वतीरोषधयः पयस्वन् मामकं वचः ।अथो पयस्वतीनामा भरेऽहं सहस्रशः ॥१॥

payasvatīroṣadhayaḥ payasvan māmakaṃ vacaḥ |atho payasvatīnāmā bhare'haṃ sahasraśaḥ ||1||

वेदाहं पयस्वन्तं चकार धान्यं बहु ।संभृत्वा नाम यो देवस्तं वयं हवामहे योयो अयज्वनो गृहे ॥२॥

vedāhaṃ payasvantaṃ cakāra dhānyaṃ bahu |saṃbhṛtvā nāma yo devastaṃ vayaṃ havāmahe yoyo ayajvano gṛhe ||2||

इमा याः पञ्च प्रदिशो मानवीः पञ्च कृष्टयः ।वृष्टे शापं नदीरिवेह स्फातिं समावहान् ॥३॥

imā yāḥ pañca pradiśo mānavīḥ pañca kṛṣṭayaḥ |vṛṣṭe śāpaṃ nadīriveha sphātiṃ samāvahān ||3||

उदुत्सं शतधारं सहस्रधारमक्षितम् ।एवास्माकेदं धान्यं सहस्रधारमक्षितम् ॥४॥

udutsaṃ śatadhāraṃ sahasradhāramakṣitam |evāsmākedaṃ dhānyaṃ sahasradhāramakṣitam ||4||

शतहस्त समाहर सहस्रहस्त सं किर ।कृतस्य कार्यस्य चेह स्फातिं समावह ॥५॥

śatahasta samāhara sahasrahasta saṃ kira |kṛtasya kāryasya ceha sphātiṃ samāvaha ||5||

तिस्रो मात्रा गन्धर्वाणां चतस्रो गृहपत्न्याः ।तासां या स्फातिमत्तमा तया त्वाभि मृशामसि ॥६॥

tisro mātrā gandharvāṇāṃ catasro gṛhapatnyāḥ |tāsāṃ yā sphātimattamā tayā tvābhi mṛśāmasi ||6||

उपोहश्च समूहश्च क्षत्तारौ ते प्रजापते ।ताविहा वहतां स्फातिं बहुं भूमानमक्षितम् ॥७॥

upohaśca samūhaśca kṣattārau te prajāpate |tāvihā vahatāṃ sphātiṃ bahuṃ bhūmānamakṣitam ||7||

Languages