Gyaandweep | Atharva Veda , Kanda 3, Sukta 28

एकैकयैषा सृष्ट्या सं बभूव यत्र गा असृजन्त भूतकृतो विश्वरूपाः ।यत्र विजायते यमिन्यपर्तुः सा पशून् क्षिणाति रिफती रुशती ॥१॥

ekaikayaiṣā sṛṣṭyā saṃ babhūva yatra gā asṛjanta bhūtakṛto viśvarūpāḥ |yatra vijāyate yaminyapartuḥ sā paśūn kṣiṇāti riphatī ruśatī ||1||

एषा पशून्त्सं क्षिणाति क्रव्याद्भूत्वा व्यद्वरी ।उतैनां ब्रह्मणे दद्यात्तथा स्योना शिवा स्यात्॥२॥

eṣā paśūntsaṃ kṣiṇāti kravyādbhūtvā vyadvarī |utaināṃ brahmaṇe dadyāttathā syonā śivā syāt||2||

शिवा भव पुरुषेभ्यो गोभ्यो अश्वेभ्यः शिवा ।शिवास्मै सर्वस्मै क्षेत्राय शिवा न इहैधि ॥३॥

śivā bhava puruṣebhyo gobhyo aśvebhyaḥ śivā |śivāsmai sarvasmai kṣetrāya śivā na ihaidhi ||3||

इह पुष्टिरिह रस इह सहस्रसातमा भव ।पशून् यमिनि पोषय ॥४॥

iha puṣṭiriha rasa iha sahasrasātamā bhava |paśūn yamini poṣaya ||4||

यत्रा सुहार्दः सुकृतो मदन्ति विहाय रोगं तन्वः स्वायाः ।तं लोकं यमिन्यभिसंबभूव सा नो मा हिंसीत्पुरुषान् पशूंश्च ॥५॥

yatrā suhārdaḥ sukṛto madanti vihāya rogaṃ tanvaḥ svāyāḥ |taṃ lokaṃ yaminyabhisaṃbabhūva sā no mā hiṃsītpuruṣān paśūṃśca ||5||

यत्रा सुहार्दां सुकृतामग्निहोत्रहुतां यत्र लोकः ।तं लोकं यमिन्यभिसंबभूव सा नो मा हिंसीत्पुरुषान् पशूंश्च ॥६॥

yatrā suhārdāṃ sukṛtāmagnihotrahutāṃ yatra lokaḥ |taṃ lokaṃ yaminyabhisaṃbabhūva sā no mā hiṃsītpuruṣān paśūṃśca ||6||

Languages