Gyaandweep | Atharva Veda , Kanda 3, Sukta 29

यद्राजानो विभजन्त इष्टापूर्तस्य षोडशं यमस्यामी सभासदः ।अविस्तस्मात्प्र मुञ्चति दत्तः शितिपात्स्वधा ॥१॥

yadrājāno vibhajanta iṣṭāpūrtasya ṣoḍaśaṃ yamasyāmī sabhāsadaḥ |avistasmātpra muñcati dattaḥ śitipātsvadhā ||1||

सर्वान् कामान् पूरयत्याभवन् प्रभवन् भवन् ।आकूतिप्रोऽविर्दत्तः शितिपान्न् नोप दस्यति ॥२॥

sarvān kāmān pūrayatyābhavan prabhavan bhavan |ākūtipro'virdattaḥ śitipānn nopa dasyati ||2||

यो ददाति शितिपादमविं लोकेन संमितम् ।स नाकमभ्यारोहति यत्र शुल्को न क्रियते अबलेन बलीयसे ॥३॥

yo dadāti śitipādamaviṃ lokena saṃmitam |sa nākamabhyārohati yatra śulko na kriyate abalena balīyase ||3||

पञ्चापूपं शितिपादमविं लोकेन संमितम् ।प्रदातोप जीवति पितॄणां लोकेऽक्षितम् ॥४॥

pañcāpūpaṃ śitipādamaviṃ lokena saṃmitam |pradātopa jīvati pitṝṇāṃ loke'kṣitam ||4||

पञ्चापूपं शितिपादमविं लोकेन संमितम् ।प्रदातोप जीवति सूर्यामासयोरक्षितम् ॥५॥

pañcāpūpaṃ śitipādamaviṃ lokena saṃmitam |pradātopa jīvati sūryāmāsayorakṣitam ||5||

इरेव नोप दस्यति समुद्र इव पयो महत्।देवौ सवासिनाविव शितिपान् नोप दस्यति ॥६॥

ireva nopa dasyati samudra iva payo mahat|devau savāsināviva śitipān nopa dasyati ||6||

क इदं कस्मा अदात्कामः कामायादात्।कामो दाता कामः प्रतिग्रहीता कामः समुद्रमा विवेश ।कामेन त्वा प्रति गृह्नामि कामैतत्ते ॥७॥

ka idaṃ kasmā adātkāmaḥ kāmāyādāt|kāmo dātā kāmaḥ pratigrahītā kāmaḥ samudramā viveśa |kāmena tvā prati gṛhnāmi kāmaitatte ||7||

भूमिष्ट्वा प्रति गृह्णात्वन्तरिक्षमिदं महत्।माहं प्राणेन मात्मना मा प्रजया प्रतिगृह्य वि राधिषि ॥८॥

bhūmiṣṭvā prati gṛhṇātvantarikṣamidaṃ mahat|māhaṃ prāṇena mātmanā mā prajayā pratigṛhya vi rādhiṣi ||8||

Languages