Gyaandweep | Atharva Veda , Kanda 3, Sukta 5

आयमगन् पर्णमणिर्बली बलेन प्रमृणन्त्सपत्नान् ।ओजो देवानां पय ओषधीनां वर्चसा मा जिन्वन्त्वप्रयावन् ॥१॥

āyamagan parṇamaṇirbalī balena pramṛṇantsapatnān |ojo devānāṃ paya oṣadhīnāṃ varcasā mā jinvantvaprayāvan ||1||

मयि क्षत्रं पर्णमणे मयि धारयताद्रयिम् ।अहं राष्ट्रस्याभीवर्गे निजो भूयासमुत्तमः ॥२॥

mayi kṣatraṃ parṇamaṇe mayi dhārayatādrayim |ahaṃ rāṣṭrasyābhīvarge nijo bhūyāsamuttamaḥ ||2||

यं निदधुर्वनस्पतौ गुह्यं देवाः प्रियं मणिम् ।तमस्मभ्यं सहायुषा देवा ददतु भर्तवे ॥३॥

yaṃ nidadhurvanaspatau guhyaṃ devāḥ priyaṃ maṇim |tamasmabhyaṃ sahāyuṣā devā dadatu bhartave ||3||

सोमस्य पर्णः सह उग्रमागन्न् इन्द्रेण दत्तो वरुणेन शिष्टः ।तं प्रियासं बहु रोचमानो दीर्घायुत्वाय शतशारदाय ॥४॥

somasya parṇaḥ saha ugramāgann indreṇa datto varuṇena śiṣṭaḥ |taṃ priyāsaṃ bahu rocamāno dīrghāyutvāya śataśāradāya ||4||

आ मारुक्षत्पर्णमणिर्मह्या अरिष्टतातये ।यथाहमुत्तरोऽसान्यर्यम्ण उत संविदः ॥५॥

ā mārukṣatparṇamaṇirmahyā ariṣṭatātaye |yathāhamuttaro'sānyaryamṇa uta saṃvidaḥ ||5||

ये धीवानो रथकाराः कर्मारा ये मनीषिणः ।उपस्तीन् पर्ण मह्यं त्वं सर्वान् कृण्वभितो जनान् ॥६॥

ye dhīvāno rathakārāḥ karmārā ye manīṣiṇaḥ |upastīn parṇa mahyaṃ tvaṃ sarvān kṛṇvabhito janān ||6||

ये राजानो राजकृतः सूता ग्रामण्यश्च ये ।उपस्तीन् पर्ण मह्यं त्वं सर्वान् कृण्वभितो जनान् ॥७॥

ye rājāno rājakṛtaḥ sūtā grāmaṇyaśca ye |upastīn parṇa mahyaṃ tvaṃ sarvān kṛṇvabhito janān ||7||

पर्णोऽसि तनूपानः सयोनिर्वीरो वीरेण मया ।संवत्सरस्य तेजसा तेन बध्नामि त्वा मणे ॥८॥

parṇo'si tanūpānaḥ sayonirvīro vīreṇa mayā |saṃvatsarasya tejasā tena badhnāmi tvā maṇe ||8||

Languages