Gyaandweep | Atharva Veda , Kanda 3, Sukta 6

पुमान् पुंसः परिजातोऽश्वत्थः खदिरादधि ।स हन्तु शत्रून् मामकान् यान् अहं द्वेष्मि ये च माम् ॥१॥

pumān puṃsaḥ parijāto'śvatthaḥ khadirādadhi |sa hantu śatrūn māmakān yān ahaṃ dveṣmi ye ca mām ||1||

तान् अश्वत्थ निः शृणीहि शत्रून् वैबाधदोधतः ।इन्द्रेण वृत्रघ्ना मेदी मित्रेण वरुणेन च ॥२॥

tān aśvattha niḥ śṛṇīhi śatrūn vaibādhadodhataḥ |indreṇa vṛtraghnā medī mitreṇa varuṇena ca ||2||

यथाश्वत्थ निरभनोऽन्तर्महत्यर्णवे ।एवा तान्त्सर्वान् निर्भङ्ग्धि यान् अहं द्वेष्मि ये च माम् ॥३॥

yathāśvattha nirabhano'ntarmahatyarṇave |evā tāntsarvān nirbhaṅgdhi yān ahaṃ dveṣmi ye ca mām ||3||

यः सहमानश्चरसि सासहान इव ऋषभः ।तेनाश्वत्थ त्वया वयं सपत्नान्त्सहिषीमहि ॥४॥

yaḥ sahamānaścarasi sāsahāna iva ṛṣabhaḥ |tenāśvattha tvayā vayaṃ sapatnāntsahiṣīmahi ||4||

सिनात्वेनान् निर्ऋतिर्मृत्योः पाशैरमोक्यैः ।अश्वत्थ शत्रून् मामकान् यान् अहं द्वेष्मि ये च माम् ॥५॥

sinātvenān nirṛtirmṛtyoḥ pāśairamokyaiḥ |aśvattha śatrūn māmakān yān ahaṃ dveṣmi ye ca mām ||5||

यथाश्वत्थ वानस्पत्यान् आरोहन् कृणुषेऽधरान् ।एवा मे शत्रोर्मूर्धानं विष्वग्भिन्द्धि सहस्व च ॥६॥

yathāśvattha vānaspatyān ārohan kṛṇuṣe'dharān |evā me śatrormūrdhānaṃ viṣvagbhinddhi sahasva ca ||6||

तेऽधराञ्चः प्र प्लवन्तां छिन्ना नौरिव बन्धनात्।न वैबाधप्रणुत्तानां पुनरस्ति निवर्तनम् ॥७॥

te'dharāñcaḥ pra plavantāṃ chinnā nauriva bandhanāt|na vaibādhapraṇuttānāṃ punarasti nivartanam ||7||

प्रैणान् नुदे मनसा प्र चित्तेनोत ब्रह्मणा ।प्रैणान् वृक्षस्य शाखयाश्वत्थस्य नुदामहे ॥८॥

praiṇān nude manasā pra cittenota brahmaṇā |praiṇān vṛkṣasya śākhayāśvatthasya nudāmahe ||8||

Languages