Gyaandweep | Atharva Veda , Kanda 4, Sukta 11

अनड्वान् दाधार पृथिवीमुत द्यामनड्वान् दाधारोर्वन्तरिक्षम् ।अनड्वान् दाधार प्रदिशः षडुर्वीरनड्वान् विश्वं भुवनमा विवेश ॥१॥

anaḍvān dādhāra pṛthivīmuta dyāmanaḍvān dādhārorvantarikṣam |anaḍvān dādhāra pradiśaḥ ṣaḍurvīranaḍvān viśvaṃ bhuvanamā viveśa ||1||

अनड्वान् इन्द्रः स पशुभ्यो वि चष्टे त्रयां छक्रो वि मिमीते अध्वनः ।भूतं भविष्यद्भुवना दुहानः सर्वा देवानां चरति व्रतानि ॥२॥

anaḍvān indraḥ sa paśubhyo vi caṣṭe trayāṃ chakro vi mimīte adhvanaḥ |bhūtaṃ bhaviṣyadbhuvanā duhānaḥ sarvā devānāṃ carati vratāni ||2||

इन्द्रो जातो मनुष्येष्वन्तर्घर्मस्तप्तश्चरति शोशुचानः ।सुप्रजाः सन्त्स उदारे न सर्षद्यो नाश्नीयादनडुहो विजानन् ॥३॥

indro jāto manuṣyeṣvantargharmastaptaścarati śośucānaḥ |suprajāḥ santsa udāre na sarṣadyo nāśnīyādanaḍuho vijānan ||3||

अनड्वान् दुहे सुकृतस्य लोक ऐनं प्याययति पवमानः पुरस्तात्।पर्जन्यो धारा मरुत ऊधो अस्य यज्ञः पयो दक्षिणा दोहो अस्य ॥४॥

anaḍvān duhe sukṛtasya loka ainaṃ pyāyayati pavamānaḥ purastāt|parjanyo dhārā maruta ūdho asya yajñaḥ payo dakṣiṇā doho asya ||4||

यस्य नेशे यज्ञपतिर्न यज्ञो नास्य दातेशे न प्रतिग्रहीता ।यो विश्वजिद्विश्वभृद्विश्वकर्मा घर्मं नो ब्रूत यतमश्चतुष्पात्॥५॥

yasya neśe yajñapatirna yajño nāsya dāteśe na pratigrahītā |yo viśvajidviśvabhṛdviśvakarmā gharmaṃ no brūta yatamaścatuṣpāt||5||

येन देवाः स्वरारुरुहुर्हित्वा शरीरममृतस्य नाभिम् ।तेन गेष्म सुकृतस्य लोकं घर्मस्य व्रतेन तपसा यशस्यवः ॥६॥

yena devāḥ svarāruruhurhitvā śarīramamṛtasya nābhim |tena geṣma sukṛtasya lokaṃ gharmasya vratena tapasā yaśasyavaḥ ||6||

इन्द्रो रूपेणाग्निर्वहेन प्रजापतिः परमेष्ठी विराट्।विश्वानरे अक्रमत वैश्वानरे अक्रमतानडुह्यक्रमत ।सोऽदृंहयत सोऽधारयत ॥७॥

indro rūpeṇāgnirvahena prajāpatiḥ parameṣṭhī virāṭ|viśvānare akramata vaiśvānare akramatānaḍuhyakramata |so'dṛṃhayata so'dhārayata ||7||

मध्यमेतदनडुहो यत्रैष वह आहितः ।एतावदस्य प्राचीनं यावान् प्रत्यङ्समाहितः ॥८॥

madhyametadanaḍuho yatraiṣa vaha āhitaḥ |etāvadasya prācīnaṃ yāvān pratyaṅsamāhitaḥ ||8||

यो वेदानडुहो दोहान्त्सप्तानुपदस्वतः ।प्रजां च लोकं चाप्नोति तथा सप्तऋषयो विदुः ॥९॥

yo vedānaḍuho dohāntsaptānupadasvataḥ |prajāṃ ca lokaṃ cāpnoti tathā saptaṛṣayo viduḥ ||9||

पद्भिः सेदिमवक्रामन्न् इरां जङ्घाभिरुत्खिदन् ।श्रमेणानड्वान् कीलालं कीनाशश्चाभि गच्छतः ॥१०॥

padbhiḥ sedimavakrāmann irāṃ jaṅghābhirutkhidan |śrameṇānaḍvān kīlālaṃ kīnāśaścābhi gacchataḥ ||10||

द्वादश वा एता रात्रीर्व्रत्या आहुः प्रजापतेः ।तत्रोप ब्रह्म यो वेद तद्वा अनडुहो व्रतम् ॥११॥

dvādaśa vā etā rātrīrvratyā āhuḥ prajāpateḥ |tatropa brahma yo veda tadvā anaḍuho vratam ||11||

दुहे सायं दुहे प्रातर्दुहे मध्यंदिनं परि ।दोहा ये अस्य संयन्ति तान् विद्मानुपदस्वतः ॥१२॥

duhe sāyaṃ duhe prātarduhe madhyaṃdinaṃ pari |dohā ye asya saṃyanti tān vidmānupadasvataḥ ||12||

Languages