Gyaandweep | Atharva Veda , Kanda 4, Sukta 15

समुत्पतन्तु प्रदिशो नभस्वतीः समभ्राणि वातजूतानि यन्तु ।महऋषभस्य नदतो नभस्वतो वाश्रा आपः पृथिवीं तर्पयन्तु ॥१॥

samutpatantu pradiśo nabhasvatīḥ samabhrāṇi vātajūtāni yantu |mahaṛṣabhasya nadato nabhasvato vāśrā āpaḥ pṛthivīṃ tarpayantu ||1||

समीक्षयन्तु तविषाः सुदानवोऽपां रसा ओषधीभिः सचन्ताम् ।वर्षस्य सर्गा महयन्तु भूमिं पृथग्जायन्तामोषधयो विश्वरूपाः ॥२॥

samīkṣayantu taviṣāḥ sudānavo'pāṃ rasā oṣadhībhiḥ sacantām |varṣasya sargā mahayantu bhūmiṃ pṛthagjāyantāmoṣadhayo viśvarūpāḥ ||2||

समीक्षयस्व गायतो नभांस्यपां वेगासः पृथगुद्विजन्ताम् ।वर्षस्य सर्गा महयन्तु भूमिं पृथग्जायन्तां वीरुधो विश्वरूपाः ॥३॥

samīkṣayasva gāyato nabhāṃsyapāṃ vegāsaḥ pṛthagudvijantām |varṣasya sargā mahayantu bhūmiṃ pṛthagjāyantāṃ vīrudho viśvarūpāḥ ||3||

गणास्त्वोप गायन्तु मारुताः पर्जन्य घोषिणः पृथक्।सर्गा वर्षस्य वर्षतो वर्षन्तु पृथिवीमनु ॥४॥

gaṇāstvopa gāyantu mārutāḥ parjanya ghoṣiṇaḥ pṛthak|sargā varṣasya varṣato varṣantu pṛthivīmanu ||4||

उदीरयत मरुतः समुद्रतस्त्वेषो अर्को नभ उत्पातयाथ ।महऋषभस्य नदतो नभस्वतो वाश्रा आपः पृथिवीं तर्पयन्तु ॥५॥

udīrayata marutaḥ samudratastveṣo arko nabha utpātayātha |mahaṛṣabhasya nadato nabhasvato vāśrā āpaḥ pṛthivīṃ tarpayantu ||5||

अभि क्रन्द स्तनयार्दयोदधिं भूमिं पर्जन्य पयसा समङ्धि ।त्वया सृष्टं बहुलमैतु वर्षमाशारैषी कृशगुरेत्वस्तम् ॥६॥

abhi kranda stanayārdayodadhiṃ bhūmiṃ parjanya payasā samaṅdhi |tvayā sṛṣṭaṃ bahulamaitu varṣamāśāraiṣī kṛśaguretvastam ||6||

सं वोऽवन्तु सुदानव उत्सा अजगरा उत ।मरुद्भिः प्रच्युता मेघा वर्षन्तु पृथिवीमनु ॥७॥

saṃ vo'vantu sudānava utsā ajagarā uta |marudbhiḥ pracyutā meghā varṣantu pṛthivīmanu ||7||

आशामाशां वि द्योततां वाता वान्तु दिशोदिशः ।मरुद्भिः प्रच्युता मेघाः सं यन्तु पृथिवीमनु ॥८॥

āśāmāśāṃ vi dyotatāṃ vātā vāntu diśodiśaḥ |marudbhiḥ pracyutā meghāḥ saṃ yantu pṛthivīmanu ||8||

आपो विद्युदभ्रं वर्षं सं वोऽवन्तु सुदानव उत्सा अजगरा उत ।मरुद्भिः प्रच्युता मेघाः प्रावन्तु पृथिवीमनु ॥९॥

āpo vidyudabhraṃ varṣaṃ saṃ vo'vantu sudānava utsā ajagarā uta |marudbhiḥ pracyutā meghāḥ prāvantu pṛthivīmanu ||9||

अपामग्निस्तनूभिः संविदानो य ओषधीनामधिपा बभूव ।स नो वर्षं वनुतां जातवेदाः प्राणं प्रजाभ्यो अमृतं दिवस्परि ॥१०॥

apāmagnistanūbhiḥ saṃvidāno ya oṣadhīnāmadhipā babhūva |sa no varṣaṃ vanutāṃ jātavedāḥ prāṇaṃ prajābhyo amṛtaṃ divaspari ||10||

प्रजापतिः सलिलादा समुद्रादाप ईरयन्न् उदधिमर्दयाति ।प्र प्यायतां वृष्णो अश्वस्य रेतोऽर्वान् एतेन स्तनयित्नुनेहि ॥११॥

prajāpatiḥ salilādā samudrādāpa īrayann udadhimardayāti |pra pyāyatāṃ vṛṣṇo aśvasya reto'rvān etena stanayitnunehi ||11||

अपो निषिञ्चन्न् असुरः पिता नः श्वसन्तु गर्गरा अपां वरुणाव नीचीरपः सृज ।वदन्तु पृश्निबाहवो मण्डूका इरिणानु ॥१२॥

apo niṣiñcann asuraḥ pitā naḥ śvasantu gargarā apāṃ varuṇāva nīcīrapaḥ sṛja |vadantu pṛśnibāhavo maṇḍūkā iriṇānu ||12||

संवत्सरं शशयाना ब्राह्मणा व्रतचारिणः ।वाचं पर्जन्यजिन्वितां प्र मण्डूका अवादिषुः ॥१३॥

saṃvatsaraṃ śaśayānā brāhmaṇā vratacāriṇaḥ |vācaṃ parjanyajinvitāṃ pra maṇḍūkā avādiṣuḥ ||13||

उपप्रवद मण्डूकि वर्षमा वद तादुरि ।मध्ये ह्रदस्य प्लवस्व विगृह्य चतुरः पदः ॥१४॥

upapravada maṇḍūki varṣamā vada tāduri |madhye hradasya plavasva vigṛhya caturaḥ padaḥ ||14||

खण्वखा३ खैमखा३ मध्ये तदुरि ।वर्षं वनुध्वं पितरो मरुतां मन इच्छत ॥१५॥

khaṇvakhā3 khaimakhā3 madhye taduri |varṣaṃ vanudhvaṃ pitaro marutāṃ mana icchata ||15||

महान्तं कोशमुदचाभि षिञ्च सविद्युतं भवतु वातु वातः ।तन्वतां यज्ञं बहुधा विसृष्टा आनन्दिनीरोषधयो भवन्तु ॥१६॥

mahāntaṃ kośamudacābhi ṣiñca savidyutaṃ bhavatu vātu vātaḥ |tanvatāṃ yajñaṃ bahudhā visṛṣṭā ānandinīroṣadhayo bhavantu ||16||

Languages