Gyaandweep | Atharva Veda , Kanda 4, Sukta 20

आ पश्यति प्रति पश्यति परा पश्यति पश्यति ।दिवमन्तरिक्षमाद्भूमिं सर्वं तद्देवि पश्यति ॥१॥

ā paśyati prati paśyati parā paśyati paśyati |divamantarikṣamādbhūmiṃ sarvaṃ taddevi paśyati ||1||

तिस्रो दिवस्तिस्रः पृथिवीः षट्चेमाः प्रदिशाः पृथक्।त्वयाहं सर्वा भूतानि पश्यानि देव्योषधे ॥२॥

tisro divastisraḥ pṛthivīḥ ṣaṭcemāḥ pradiśāḥ pṛthak|tvayāhaṃ sarvā bhūtāni paśyāni devyoṣadhe ||2||

दिव्यस्य सुपर्णस्य तस्य हासि कनीनिका ।सा भूमिमा रुरोहिथ वह्यं श्रान्ता वधूरिव ॥३॥

divyasya suparṇasya tasya hāsi kanīnikā |sā bhūmimā rurohitha vahyaṃ śrāntā vadhūriva ||3||

तां मे सहस्राक्षो देवो दक्षिणे हस्त आ दधत्।तयाहं सर्वं पश्यामि यश्च शूद्र उतार्यः ॥४॥

tāṃ me sahasrākṣo devo dakṣiṇe hasta ā dadhat|tayāhaṃ sarvaṃ paśyāmi yaśca śūdra utāryaḥ ||4||

आविष्कृणुष्व रूपानि मात्मानमप गूहथाः ।अथो सहस्रचक्षो त्वं प्रति पश्याः किमीदिनः ॥५॥

āviṣkṛṇuṣva rūpāni mātmānamapa gūhathāḥ |atho sahasracakṣo tvaṃ prati paśyāḥ kimīdinaḥ ||5||

दर्शय मा यातुधानान् दर्शय यातुधान्यः ।पिशाचान्त्सर्वान् दर्शयेति त्वा रभ ओषधे ॥६॥

darśaya mā yātudhānān darśaya yātudhānyaḥ |piśācāntsarvān darśayeti tvā rabha oṣadhe ||6||

कश्यपस्य चक्षुरसि शुन्याश्च चतुरक्ष्याः ।वीध्रे सूर्यमिव सर्पन्तं मा पिशाचं तिरस्करः ॥७॥

kaśyapasya cakṣurasi śunyāśca caturakṣyāḥ |vīdhre sūryamiva sarpantaṃ mā piśācaṃ tiraskaraḥ ||7||

उदग्रभं परिपाणाद्यातुधानं किमीदिनम् ।तेनाहं सर्वं पश्याम्युत शूद्रमुतार्यम् ॥८॥

udagrabhaṃ paripāṇādyātudhānaṃ kimīdinam |tenāhaṃ sarvaṃ paśyāmyuta śūdramutāryam ||8||

यो अन्तरिक्षेण पतति दिवं यश्च अतिसर्पति ।भूमिं यो मन्यते नाथं तं पिशाचं प्र दर्शय ॥९॥

yo antarikṣeṇa patati divaṃ yaśca atisarpati |bhūmiṃ yo manyate nāthaṃ taṃ piśācaṃ pra darśaya ||9||

Languages