Gyaandweep | Atharva Veda , Kanda 4, Sukta 22

इममिन्द्र वर्धय क्षत्रियं मे इमं विशामेकवृषं कृणु त्वम् ।निरमित्रान् अक्ष्णुह्यस्य सर्वांस्तान् रन्धयास्मा अहमुत्तरेषु ॥१॥

imamindra vardhaya kṣatriyaṃ me imaṃ viśāmekavṛṣaṃ kṛṇu tvam |niramitrān akṣṇuhyasya sarvāṃstān randhayāsmā ahamuttareṣu ||1||

एमं भज ग्रामे अश्वेषु गोषु निष्टं भज यो अमित्रो अस्य ।वर्ष्म क्षत्राणामयमस्तु राजेन्द्र शत्रुं रन्धय सर्वमस्मै ॥२॥

emaṃ bhaja grāme aśveṣu goṣu niṣṭaṃ bhaja yo amitro asya |varṣma kṣatrāṇāmayamastu rājendra śatruṃ randhaya sarvamasmai ||2||

अयमस्तु धनपतिर्धनानामयं विशां विश्पतिरस्तु राजा ।अस्मिन्न् इन्द्र महि वर्चांसि धेह्यवर्चसं कृणुहि शत्रुमस्य ॥३॥

ayamastu dhanapatirdhanānāmayaṃ viśāṃ viśpatirastu rājā |asminn indra mahi varcāṃsi dhehyavarcasaṃ kṛṇuhi śatrumasya ||3||

अस्मै द्यावापृथिवी भूरि वामं दुहाथां घर्मदुघे इव धेनू ।अयं राजा प्रिय इन्द्रस्य भूयात्प्रियो गवामोषधीनां पशूनाम् ॥४॥

asmai dyāvāpṛthivī bhūri vāmaṃ duhāthāṃ gharmadughe iva dhenū |ayaṃ rājā priya indrasya bhūyātpriyo gavāmoṣadhīnāṃ paśūnām ||4||

युनज्मि त उत्तरावन्तमिन्द्रं येन जयन्ति न पराजयन्ते ।यस्त्वा करदेकवृषं जनानामुत राज्ञामुत्तमं मानवानाम् ॥५॥

yunajmi ta uttarāvantamindraṃ yena jayanti na parājayante |yastvā karadekavṛṣaṃ janānāmuta rājñāmuttamaṃ mānavānām ||5||

उत्तरस्त्वमधरे ते सपत्ना ये के च राजन् प्रतिशत्रवस्ते ।एकवृष इन्द्रसखा जिगीवां छत्रूयतामा भरा भोजनानि ॥६॥

uttarastvamadhare te sapatnā ye ke ca rājan pratiśatravaste |ekavṛṣa indrasakhā jigīvāṃ chatrūyatāmā bharā bhojanāni ||6||

सिंहप्रतीको विशो अद्धि सर्वा व्याघ्रप्रतीकोऽव बाधस्व शत्रून् ।एकवृष इन्द्रसखा जिगीवां छत्रूयतामा खिदा भोजनानि ॥७॥

siṃhapratīko viśo addhi sarvā vyāghrapratīko'va bādhasva śatrūn |ekavṛṣa indrasakhā jigīvāṃ chatrūyatāmā khidā bhojanāni ||7||

Languages