Gyaandweep | Atharva Veda , Kanda 4, Sukta 23

अग्नेर्मन्वे प्रथमस्य प्रचेतसः पाञ्चजन्यस्य बहुधा यमिन्धते ।विशोविशः प्रविशिवांसमीमहे स नो मुञ्चत्वंहसः ॥१॥

agnermanve prathamasya pracetasaḥ pāñcajanyasya bahudhā yamindhate |viśoviśaḥ praviśivāṃsamīmahe sa no muñcatvaṃhasaḥ ||1||

यथा हव्यं वहसि जातवेदो यथा यज्ञं कल्पयसि प्रजानन् ।एवा देवेभ्यः सुमतिं न आ वह स नो मुञ्चत्वंहसः ॥२॥

yathā havyaṃ vahasi jātavedo yathā yajñaṃ kalpayasi prajānan |evā devebhyaḥ sumatiṃ na ā vaha sa no muñcatvaṃhasaḥ ||2||

यामन्यामन्न् उपयुक्तं वहिष्ठं कर्मङ्कर्मन्न् आभगमग्निमीडे ।रक्षोहणं यज्ञवृधं घृताहुतं स नो मुञ्चत्वंहसः ॥३॥

yāmanyāmann upayuktaṃ vahiṣṭhaṃ karmaṅkarmann ābhagamagnimīḍe |rakṣohaṇaṃ yajñavṛdhaṃ ghṛtāhutaṃ sa no muñcatvaṃhasaḥ ||3||

सुजातं जातवेदसमग्निं वैश्वानरं विभुम् ।हव्यवाहं हवामहे स नो मुञ्चत्वंहसः ॥४॥

sujātaṃ jātavedasamagniṃ vaiśvānaraṃ vibhum |havyavāhaṃ havāmahe sa no muñcatvaṃhasaḥ ||4||

येन ऋषयो बलमद्योतयन् युजा येनासुराणामयुवन्त मायाः ।येनाग्निना पणीन् इन्द्रो जिगाय स नो मुञ्चत्वंहसः ॥५॥

yena ṛṣayo balamadyotayan yujā yenāsurāṇāmayuvanta māyāḥ |yenāgninā paṇīn indro jigāya sa no muñcatvaṃhasaḥ ||5||

येन देवा अमृतमन्वविन्दन् येनौषधीर्मधुमतीरकृण्वन् ।येन देवाः स्वराभरन्त्स नो मुञ्चत्वंहसः ॥६॥

yena devā amṛtamanvavindan yenauṣadhīrmadhumatīrakṛṇvan |yena devāḥ svarābharantsa no muñcatvaṃhasaḥ ||6||

यस्येदं प्रदिशि यद्विरोचते यज्जातं जनितव्यं च केवलम् ।स्तौम्यग्निं नाथितो जोहवीमि स नो मुञ्चत्वंहसः ॥७॥

yasyedaṃ pradiśi yadvirocate yajjātaṃ janitavyaṃ ca kevalam |staumyagniṃ nāthito johavīmi sa no muñcatvaṃhasaḥ ||7||

Languages