Gyaandweep | Atharva Veda , Kanda 4, Sukta 37

त्वया पूर्वमथर्वाणो जघ्नू रक्षांस्योषधे ।त्वया जघान कश्यपस्त्वया कण्वो अगस्त्यः ॥१॥

tvayā pūrvamatharvāṇo jaghnū rakṣāṃsyoṣadhe |tvayā jaghāna kaśyapastvayā kaṇvo agastyaḥ ||1||

त्वया वयमप्सरसो गन्धर्वांस्चातयामहे ।अजशृङ्ग्यज रक्षः सर्वान् गन्धेन नाशय ॥२॥

tvayā vayamapsaraso gandharvāṃscātayāmahe |ajaśṛṅgyaja rakṣaḥ sarvān gandhena nāśaya ||2||

नदीं यन्त्वप्सरसोऽपां तारमवश्वसम् ।गुल्गुलूः पीला नलद्यौक्षगन्धिः प्रमन्दनी ।तत्परेताप्सरसः प्रतिबुद्धा अभूतन ॥३॥

nadīṃ yantvapsaraso'pāṃ tāramavaśvasam |gulgulūḥ pīlā naladyaukṣagandhiḥ pramandanī |tatparetāpsarasaḥ pratibuddhā abhūtana ||3||

यत्राश्वत्था न्यग्रोधा महावृक्षाः शिखण्डिनः ।तत्परेताप्सरसः प्रतिबुद्धा अभूतन ॥४॥

yatrāśvatthā nyagrodhā mahāvṛkṣāḥ śikhaṇḍinaḥ |tatparetāpsarasaḥ pratibuddhā abhūtana ||4||

यत्र वः प्रेङ्खा हरिता अर्जुना उत यत्राघाताः कर्कर्यः संवदन्ति ।तत्परेताप्सरसः प्रतिबुद्धा अभूतन ॥५॥

yatra vaḥ preṅkhā haritā arjunā uta yatrāghātāḥ karkaryaḥ saṃvadanti |tatparetāpsarasaḥ pratibuddhā abhūtana ||5||

एयमगन्न् ओषधीनां वीरुधां वीर्यावती ।अजशृङ्ग्यराटकी तीक्ष्णशृङ्गी व्यृषतु ॥६॥

eyamagann oṣadhīnāṃ vīrudhāṃ vīryāvatī |ajaśṛṅgyarāṭakī tīkṣṇaśṛṅgī vyṛṣatu ||6||

आनृत्यतः शिखण्डिनो गन्धर्वस्याप्सरापतेः ।भिनद्मि मुष्कावपि यामि शेपः ॥७॥

ānṛtyataḥ śikhaṇḍino gandharvasyāpsarāpateḥ |bhinadmi muṣkāvapi yāmi śepaḥ ||7||

भीमा इन्द्रस्य हेतयः शतमृष्टीरयस्मयीः ।ताभिर्हविरदान् गन्धर्वान् अवकादान् व्यृषतु ॥८॥

bhīmā indrasya hetayaḥ śatamṛṣṭīrayasmayīḥ |tābhirhaviradān gandharvān avakādān vyṛṣatu ||8||

भीमा इन्द्रस्य हेतयः शतमृष्टीर्हिरण्ययीः ।ताभिर्हविरदान् गन्धर्वान् अवकादान् व्यृषतु ॥९॥

bhīmā indrasya hetayaḥ śatamṛṣṭīrhiraṇyayīḥ |tābhirhaviradān gandharvān avakādān vyṛṣatu ||9||

अवकादान् अभिशोचान् अप्सु ज्योतय मामकान् ।पिशाचान्त्सर्वान् ओषधे प्र मृणीहि सहस्व च ॥१०॥

avakādān abhiśocān apsu jyotaya māmakān |piśācāntsarvān oṣadhe pra mṛṇīhi sahasva ca ||10||

श्वेवैकः कपिरिवैकः कुमारः सर्वकेशकः ।प्रियो दृश इव भूत्वा गन्धर्वः सचते स्त्रियस्।तमितो नाशयामसि ब्रह्मणा वीर्यावता ॥११॥

śvevaikaḥ kapirivaikaḥ kumāraḥ sarvakeśakaḥ |priyo dṛśa iva bhūtvā gandharvaḥ sacate striyas|tamito nāśayāmasi brahmaṇā vīryāvatā ||11||

जाया इद्वो अप्सरसो गन्धर्वाः पतयो यूयम् ।अप धावतामर्त्या मर्त्यान् मा सचध्वम् ॥१२॥

jāyā idvo apsaraso gandharvāḥ patayo yūyam |apa dhāvatāmartyā martyān mā sacadhvam ||12||

Languages