Gyaandweep | Atharva Veda , Kanda 4, Sukta 7

वारिदं वारयातै वरणावत्यामधि ।तत्रामृतस्यासिक्तं तेना ते वारये विषम् ॥१॥

vāridaṃ vārayātai varaṇāvatyāmadhi |tatrāmṛtasyāsiktaṃ tenā te vāraye viṣam ||1||

अरसं प्राच्यं विषमरसं यदुदीच्यम् ।अथेदमधराच्यं करम्भेण वि कल्पते ॥२॥

arasaṃ prācyaṃ viṣamarasaṃ yadudīcyam |athedamadharācyaṃ karambheṇa vi kalpate ||2||

करम्भं कृत्वा तिर्यं पीबस्पाकमुदारथिम् ।क्षुधा किल त्वा दुष्टनो जक्षिवान्त्स न रूरुपः ॥३॥

karambhaṃ kṛtvā tiryaṃ pībaspākamudārathim |kṣudhā kila tvā duṣṭano jakṣivāntsa na rūrupaḥ ||3||

वि ते मदं मदावति शरमिव पातयामसि ।प्र त्वा चरुमिव येषन्तं वचसा स्थापयामसि ॥४॥

vi te madaṃ madāvati śaramiva pātayāmasi |pra tvā carumiva yeṣantaṃ vacasā sthāpayāmasi ||4||

परि ग्राममिवाचितं वचसा स्थापयामसि ।तिष्ठा वृक्ष इव स्थाम्न्यभ्रिखाते न रूरुपः ॥५॥

pari grāmamivācitaṃ vacasā sthāpayāmasi |tiṣṭhā vṛkṣa iva sthāmnyabhrikhāte na rūrupaḥ ||5||

पवस्तैस्त्वा पर्यक्रीणन् दूर्शेभिरजिनैरुत ।प्रक्रीरसि त्वमोषधेऽभ्रिखाते न रूरुपः ॥६॥

pavastaistvā paryakrīṇan dūrśebhirajinairuta |prakrīrasi tvamoṣadhe'bhrikhāte na rūrupaḥ ||6||

अनाप्ता ये वः प्रथमा यानि कर्माणि चक्रिरे ।वीरान् नो अत्र मा दभन् तद्व एतत्पुरो दधे ॥७॥

anāptā ye vaḥ prathamā yāni karmāṇi cakrire |vīrān no atra mā dabhan tadva etatpuro dadhe ||7||

Languages