Gyaandweep | Atharva Veda , Kanda 4, Sukta 8

भूतो भूतेषु पय आ दधाति स भूतानामधिपतिर्बभूव ।तस्य मृत्युश्चरति राजसूयं स राजा अनु मन्यतामिदम् ॥१॥

bhūto bhūteṣu paya ā dadhāti sa bhūtānāmadhipatirbabhūva |tasya mṛtyuścarati rājasūyaṃ sa rājā anu manyatāmidam ||1||

अभि प्रेहि माप वेन उग्रश्चेत्ता सपत्नहा ।आ तिष्ठ मित्रवर्धन तुभ्यं देवा अधि ब्रुवन् ॥२॥

abhi prehi māpa vena ugraścettā sapatnahā |ā tiṣṭha mitravardhana tubhyaṃ devā adhi bruvan ||2||

आतिष्ठन्तं परि विश्वे अभूषं छ्रियं वसानश्चरति स्वरोचिः ।महत्तद्वृष्णो असुरस्य नामा विश्वरूपो अमृतानि तस्थौ ॥३॥

ātiṣṭhantaṃ pari viśve abhūṣaṃ chriyaṃ vasānaścarati svarociḥ |mahattadvṛṣṇo asurasya nāmā viśvarūpo amṛtāni tasthau ||3||

व्याघ्रो अधि वैयाघ्रे वि क्रमस्व दिशो महीः ।विशस्त्वा सर्वा वाञ्छन्त्वापो दिव्याः पयस्वतीः ॥४॥

vyāghro adhi vaiyāghre vi kramasva diśo mahīḥ |viśastvā sarvā vāñchantvāpo divyāḥ payasvatīḥ ||4||

या आपो दिव्याः पयसा मदन्त्यन्तरिक्ष उत वा पृथिव्याम् ।तासां त्वा सर्वासामपामभि षिञ्चामि वर्चसा ॥५॥

yā āpo divyāḥ payasā madantyantarikṣa uta vā pṛthivyām |tāsāṃ tvā sarvāsāmapāmabhi ṣiñcāmi varcasā ||5||

अभि त्वा वर्चसासिचन्न् आपो दिव्याः पयस्वतीः ।यथासो मित्रवर्धनस्तथा त्वा सविता करत्॥६॥

abhi tvā varcasāsicann āpo divyāḥ payasvatīḥ |yathāso mitravardhanastathā tvā savitā karat||6||

एना व्याघ्रं परिषस्वजानाः सिंहं हिन्वन्ति महते सौभगाय ।समुद्रं न सुभुवस्तस्थिवांसं मर्मृज्यन्ते द्वीपिनमप्स्वन्तः ॥७॥

enā vyāghraṃ pariṣasvajānāḥ siṃhaṃ hinvanti mahate saubhagāya |samudraṃ na subhuvastasthivāṃsaṃ marmṛjyante dvīpinamapsvantaḥ ||7||

Languages